MARKUS 1
1
LOPNA VI YESU HAY GALILEYA
Kusta vi Yohana ma Baptisma
Mat 3:1-12; Luk 3:1-18
1Tun cawta vi Labara ma firina vi Yesu Kristu goora vi Lawna. 2Ki ɗo'ay hay ɗerwelda vi Esaya sa ma jobta-Lawna nala:
Humaŋu, nan gi sa ma sunda vanis goy vokaŋu,
kay nam ma kot hagata vokaŋu.
3Kayni mi del sa ma ka siwel hay fulda,
kotgi hagana vi Bum-Sumuna
Moɗgi hagana valam goy ɗigere.#1:3 Fi kayni hay Es 40:3.
4Yohana kal ay goyo; nam li baptisma goy hay fulda, nam kus yoboyn kay baptisma vi hamda kay gida vi sulukŋa. 5Sum sa hay gal Yudiya hiɗi sum sa hay Yerusalem kaf ma talamu, hay li ma nisi ham sulukŋa visi goy hamna, nam lisi baptisma hay niy-lumna Yordan.
6May Yohana sligara valamu mi ɗuŋus lamgana, kanti ma furamna mi ɗigiyna, tina valamu mi baara hiɗi yumna ma hay fulda may. 7Nam ka siwel yoboyn tam sumun ala: sa ma gaŋeraŋ suwan nanu ka co bugolanu, nan may nagay kay her gaa'a kay but zigew ma vun tuguruna valamn goyɗi. 8Nanu, nan ligi baptisma hiɗi niyna, may nam ma ligi baptisma hiɗi Ŋusta-Peldetta.
Yesu fi baptisma fina, Matna nememu
Mat 4:1-11; Luk 3:21-22; 4:1-13
9Hay li namna kayni, Yesu fokay Nasaret hay Galileya pa, nam ma tam Yohana. Yohana lum baptisma hay niy-lumna Yordan. 10Hay li ma Yesu jikay kulo hay niyn pa, nam wi wuralawna mali goyo, Ŋusta vi Lawna ki gukka nala sir gaa kalamu. 11Nam hum della ay goy hay wuralawn pa ka di ala:
Naŋu mi Goora van ma hayan kaŋŋa, naŋ kiran ŋaa'a ŋolo.
12Wulini wulini Ŋusta gi ir Yesu goy hay fulda. 13Nam musi hay fulda ir buur dok-fiɗi, Satan nememu. Nam ay hiɗi muur ma fulla, sa sunda-wuralawna sunumu may.
Hay Kapernawum, yita vi sa hatayn sa fiɗina
Mat 4:12-22; Luk 4:14-15; 5:1-11; Yoh 1:34-43
14Bugol gita vi Yohana hay daŋgayna, Yesu kal hay Galileya; nam kus labara ma firina vi Lawna, 15ka di ala: Liyn coowa, mulda-wuralawna maawa goboyo, hamgiya, vigi hay labara ma firina.
16Hay li ma nam jik kel niy-lumna Galileya, nam wi ɓosiyom tuwsin ma' cuk luwanna visi goloŋ lak, kayni Simon hiɗi Andre, Nisi si sum sa ciwna. 17Yesu disiya: tapgiyay kuɗanu, nan min muɗgi goy sa ciw sumuna. 18Wulini wulini nisi hin luwanna visiya, tapay kuɗumu. 19Hay li ma nam raw vokom neeɗa kayni, nam wi Yakub goora vi Sebedew hiɗi Yohana ɓasulumna, nisi lakay hay lumda taɓ ir luwanna visi lak. 20Wulini wulini nam yisiya, nisi hin busi Sebedew hiɗi sa sunumna hay lumda, nisi tap kuɗ Yesu de'.
Yer-goyta tara'a tara'a
Mat 8:14-17; Luk 4:31-44
21Nisi kal hay Kapernawum. Hay buura vi Sabatna, Yesu kal hay sinagogŋa, nam tun caw hata. 22Nisi muɗi ɦuyum kay hatta valamu, kay nam ka hatsi ki sa ma donot kuɗum nala, may ki sa wi-ɗota naɗi. 23Hay na'ta sa ma ful ma liwisn kalamna ay musi jarsi hay sinagogŋ dam', nam ka siwel ala: 24naŋ min lum hiɗi numa mi mige? Naŋ Yesu ma Nasaretna? Naŋ ma kayni kay cuma goyo. Nan waŋ goy ŋaa'a ŋolo, naŋ mi ma Peldetna vi Lawna. 25Yesu bayamu dumu: Baŋ vunaŋu, kalaŋay goy hay san kayni. 26Fulla ma liwisna ɦiwir san kayni ŋolo, bugolda nam ciriy ŋolo, kal goy hay sana. 27Sumun kaf muɗ ɦuyum', nisi ka job tuwsi jar tuwsi ala: Nam kayni mi meloge? Hatta wuliya ta hati hiɗi dono'o! Nam law tam fuliyan ma liwisna, fuliyan gat kuɗumu may. 28Labara vi Yesu meray goy koloy ŋolo hay gal nagat Galileya pet.
Yesu muɗ sa moyn ŋolo goy ŋaa'a
Mat 8:14-17; Luk 4:38-41
29Hay li ma nisi cukay goy hay sinagogŋa cukŋa, wulini wulini nisi cuk vo hay ziyna vi Simon hiɗi Andre; Yakub hiɗi Yohana cuk vo hiɗi nisiya. 30May kuno Simonda buri moyo kay tuwa' zumaliya, wulini wulini nisi di Yesu ka'a. 31Nam tuɗ kata'a, va' ɓa' kulo'o, moyna hina'a, na' tun caw sunsiya.
32Hay li ma vulatita coowa, bugol ɗikŋa vi fatta, nisi mar sum sa moyn kaf talamu, hiɗi sa ful kisina kaw. 33Sum sa hay hoyok-ziyn kaf tok tuwsi hay vun-ziyda. 34Sum sa ka las kay moyn mara'a mara'a ŋolo nam yersi goyo, nam digiɗ fuliyan goyo kaw, nam hin fuliyan diɗi, kay nisi wumu.
35Hay ŋarpita, hay li ma liyn bay fo goy ŋaa tuwa, Yesu fokay kulo'o kal goy hay liy ma fulla, nam tun caw siɗawa. 36Simon hiɗi nisi sa kuɗumna li tuwsi koloyo kay garamu. 37Hay li ma nisi fumawa, nisi dumu: sumun kaf ka garaŋu. 38Yesu disiya: tuɗaygi goy hay liyn mara'a, hay naga ma goboyna, kay nan ma kus labara ma firina ɗawni kaw; kay kuɗ na'ta kayni nan kal ay goyo. 39Nam tuɗ hay galla vi Galileya kaf, kus yoboyn hay sinagogayna, digiɗ fuliyan goyo kaw.
Sa ma kuturuna yeri goyo
Mat 8:2-4; Luk 5:12-16; 17:12-19
40Sa ma kuturuna ma talamu, girif gaa vokomu, dum hiɗi giɗel delta ala: la naŋ mina, naŋ yeran goy yerge. 41Nam muɗ kiram haw ŋolo, nam meɗ ɓalam goyo, jomu, dum ala nan miniya, yeraŋ goyo. 42Wulini wulini moy-kuturuna hinimu, nam yeray goyo. 43Bugol kayni Yesu gatam vunamu, gum iramu. 44Yesu dum ala: laŋ ŋali, naŋ ma di kayni mi saɗi, may tuɗaŋu ɗekaŋ tuwaŋ kir muliyan-sa-ɗifinna, vulaŋ va ma li ɗifini kay yerta-goyta vaŋu ki Musus di tay nala,#1:44 ɗuw hay Slv 14:1-32. kay kayni ma li di-goyta tisiya. 45May nam kal goy jiy kayni, nam tun caw siwel goy ŋolo kay slen kayni, nam jok labara goyo kaw, ta-ta Yesu muɗ kal kulo hay hoyok-ziyn goy haraŋ loɗi, nisi ka cubum goy jiya, hay liy ma wiŋŋa, nisi ka coy talamu hay liyn kafe.
Currently Selected:
MARKUS 1: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001