YouVersion Logo
Search Icon

MIKKA 1

1
Ma-Vatɗina law joo'o kat Israyel hiɗi Yuda
1Kayni mi yoboyna vi Ma-Vatɗina ma nam di'e tam Mikka, sa ma hay nagat Moreset, kayni hay liyna vi Yotam, hiɗi Ahas, hiɗi Ezekiyas,
muliyana vi Yuda, nam wi ɗekka kay Samariya hiɗi Yerusalem.
2Humgiya nigi sumun kaf,
tun ŋalda vagu,
nak nagata hiɗi sum sa hayag kafna.
Hin Bum-Sumuna Ma-Vatɗina wi va ma nigi lumna,
Bum-Sumuna may goy hay Tempella valam ma peldetna pa,
3kay ɗuwgiya,
Ma-Vatɗina min kalay goy hay liyna valam ma musta pa,
nam ka jik gaa'a,
nam ka poy kulo kay liyn ma jiŋiliŋŋa vi nagata.
4hiɗiyn ma gaa kuɗ selemna ka mun goyo,
hor-ɦuɗukŋa ka mal goy kay tuwamu,
ki diyakŋa vok kuta nala,
ki niyn jaŋ hay liy ma beɗna nala.
5Slen zawni kaf li'e kuɗ jiw-zlata vi Yakub,
kuɗ sulukŋa vi sum sa hay ziyna vi Israyel.
Jiw-zlata vi Yakub mi mige?
May mi Samariya ɗisu?
Liyn ma ɗiŋiriŋŋa vi Yuda mi mige?
May ti Yerusalem ɗisu?
6Samariya nan muɗa ɗawni,
ki sine ma goorhoyon dakay hayamna nala,
ki sine ma pi gulda-guldan haya nala,
hiɗiyn ma hayamna,
nan ma zutum gaa hay liyn ma wiŋŋa,
baga' ma viy gaana nan ma patam kulo'o.
7Lawayna visi kaf nan ma tom goyo,
faray ma nisi fum hiɗi hagat ta liwista kut ma tumu,
Lawayna ma waana visi kaf nan ma vatam goyo,
wurakŋa ma nisi fum kuɗ jiw-zlata visi kaf,
nam ma hot ɗawn hay liyam ma wurakŋa vi viyuwta.
8Kuɗ kayni nan ma tiya,
nan ma yor tuwanu,
nan ma poy nala'a bay cuk tuguru senu,
nan ma buw ki turlon nala,
nan ma ciriya ki rigetna nala.
9Kay mil ma ta'na nam may citɗi,
vunam co ta-ta hay Yuda.
Bum-Sumuna coowa hay vun-ziyna vanu
ta-ta hay Yerusalem.
10Nigi ma vi labar namna hay nagat Gat noŋɗi,
nigi ma tiy hay Akko noŋɗi kaw.
Rugusgi tuwgi gaa hay nagata hay Bet-Lefra.
11Kalgiya, nigi sa li ziy hay Safir,
kalgi hay nalata hiɗi zulota,
boy sa ziyna visi hay Sanaan as cuk goy loɗi,
do'olla ma nigi ti'e hay Bet-Atsel
as hingi tun suk noŋɗi.
12Na'a ta musi ziy hay Marot ka jiriya kay gar su'da,
kay yorta jikiyawa gaa'a,
na' may goy vi Ma-Vatɗina pa.
Na' coowa ta-ta kulo vun Yerusalem goŋ'.
13Nigi boy sa hay Lakisna,
gangi kekena vigiya hiɗi kulumayna,
nigi si sa zut gurona vi Siyon hay sulukŋa sem ma jewna.
Kay ci-matta vi Israyel may goy hay nigi pa.
14Kuɗ kayni jargi ma ja goyo hiɗi Moreset-Gat,
ziyna vi Akzib ma hin muliyana vi Israyel hay zulota.
15Nan min marag sa ma kolda mara'a lo,
nak ta musi ziy hay Maresa,
gajijita vi Israyel ma kal ta-ta hay Adullam.
16Welag yag goyo,
kaag ŋusag goyo,
kayni kay gurona vag sa dikag minsi ŋolla,
kulotag yag goy vaniya ki bakŋa nala,
kay gurona vag kal ɗawn goy gorvo'o,
gine hiɗi naku.

Currently Selected:

MIKKA 1: Massana

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy