SA KA KITANA 2
2
Sum sa Israyella min hum vun Lawnɗi
1Sa ma sunda vi Ma-Vatɗina fokay hay Gilgal hay galla vi Bokim pa di'e: Nan yawgi ay goy hay nagat Egipte pa, nan margi hay nagat ta nan yi va kan ala nan min vula' mi sumaygiya. Nan digi jew ala bonota van ta nan juna' hiɗi nigita nan min ja' jara' goy noŋɗi, 2may nigiya, nan digi ala nigi ma vi bono hiɗi sum sa hay nagat na'ta tanɗi, nan digi ala giwin-ma-ɗifinna visiya nigi ma ɦom gaa'a, may nigi min human vunanɗi, nigi li nala kayn kay mige? 3Wulin kayn nan digiya: Nan as a digiɗ sum nisin goy vokgi loɗi; nisi ma lak kulo delgiya, lawayna visi ma lin ti jawta ta gani gaa vokgita. 4Hay li ma sa ma sunda vi Lawna di tam gurona vi Israyel dina, sumun kaf mun tiyn digi-digi', 5liyn namna nisi tunum selem ala Bokim, nisi li ɗifin mi Ma-Vatɗina hay liyn namna.
Mitta vi Yosuwa, sa ka kitana
6Bugolda Yosuwa gi ir sumun vo'o, gurona vi Israyel gigekaw tun iram hay nagata ta vuli ir malamta, kay mus haya'a. 7Hay li ma Yosuwa hiɗi sum sa maariyana sa hin bugolomna sa wi lop ŋulo ma Lawna lum kirsin ka iri tuwana, sumun sun Lawn hay buurta kaf. 8May bugol kayni Yosuwa goora vi Nun, sa ma sunda vi Ma-Vatɗina mitawa, busata valam co kis hiɗi diram doogo. 9Nisi pum hay nagat ta ir ɓurawt vula' malamta, hay Timnat-Herez, kulo kay hiɗiyta vi Efrayim, hay gal ma gaana vi hiɗiyta Gaas. 10Bugol kayni sa wi Yosuwana, sa li lop hiɗi nam kuɗ tuwsin kaf tap kuɗ sumaysi sa hay zulla kaf. Jaf ma biya bugoldana may mi jaf ma wi Lawnɗi, ŋaata ta Lawn la' tam sumaysi sa Israyella nisi min wa'ɗi kaw.
Nisi noy Lawn goyo
11Gurona vi Israyel li slen ma may kir Lawn ŋaaɗina. Nisi tun caw sun Baal. 12Ma-Vatɗina Lawna vi sumaysiya, nam ma yawsiyay goy hay nagata Egipte pana nisi noyom goyo, lawayna vi sum sa ziysi ŋuyi tisina nisi tun caw sunumu, tun caw girifimu, nisi muɗ dik Ma-Vatɗin hiy katsiya. 13Nisi hin Ma-Vatɗin goyo, tun caw sun Baal hiɗi Astarte.
14Ma-Vatɗina muɗ hiy ŋolo katam sum sa Israyella, nam hinsi goy hay ɓam sa gawt kisina, hin sa gawta co'o kay tisi ɓuraŋi. Nam gussi goy hay ɓam sum sa ziysi ŋuyi tisina. Donota visi ta dur sa gawt kisina tay loɗi. 15Arigekaw ma nisi tuɗa, ɓam Ma-Vatɗina ka buri goy voksi waŋ' kay lisi joo'o, kayn ki Ma-Vatɗina di tisi nala, ki nam yi va kalam nala.#2:15 Ɗuw dita vi Ma-Vatɗina hay Gsm 28. Lasta ta ŋolda irsi wa' noŋ wi'. 16Bugol kayni Lawna laksi sum sa ka kitan voksiya, sum sa ka kitan butsi goy hay ɓam sa tisi ɓuraŋŋa. 17May nisi min hum kuɗ sum sa tuni voksi kay ka kitan kisin noŋɗi, kay tuwsi muɗi viyuw kuɗ lawayn ma waana, girif gaa vok lawayn ma waana. Hagat ta sumaysi poy haya' jewta, ta hum kuɗ gatta vi Lawnta nisi hina' goyo, nisi min li ki sumaysi nala loɗi. 18Hay li ma Ma-Vatɗina tun sa ma ka kitanawa kisiya, nam kay tuwam tun vokomu, buur kaf ma sa ma ka kitan ka jarsiya, nam butsi goy hay ɓam sa gawt kisina, hay li ma nisi ka tiya kay las ma sumun lassina hiɗi curoɗ ma sumun curoɗsina ni, nisi muɗ kir Ma-Vatɗin haw de'. 19May hay li ma sa ma ka kitan mitawana, nisi tun caw muɗ tuwsi liwis lo suw sumaysiya, nisi tun caw girif lawayn ma waana. Nisi so tuwsi hay poyta joota na'ta hiɗi so'otta vi dikga.
20Kuɗ kayni ɦiyda vi Ma-Vatɗin jor vok ŋolo tisiya, nam di'e: Wulin kayni sum nisina min hum kuɗ bonota ta nan juna'ays hiɗi sumaysitɗi, nisi min human vunanɗi, 21nala sum sa Yosuwa hinsi ays ziy tisina, sa nam as a digiɗsi goyɗin lakŋi, nan as a digiɗsi goy voksi loɗi lay. 22Sum nisin kisi na lak', nan min wak Israyel hiɗi nisiya. 23Sum sa Ma-Vatɗin digiɗsi ays goy hiɗi ɓam Yosuwaɗina, nam hinsi hay tun-sukka, nam gar kay digiɗsi goy gosoyɗi.
Currently Selected:
SA KA KITANA 2: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001