SA KA KITANA 17
17
LABARA VI SA KA KITANA TUNI KAY TUWAMU TUWAMU
Mikka kot Lawayna ma waana
1San kep ziyna valam ay kulo kay hiɗiyta Efrayim yum Mikka. 2Nam di tam sulumu: Gurjuta vag ta sikel birim kep hiɗi dira' kis, ta san kula' kagu, ta nan humag beɗ kuɗa'ta kayni, yawa' mi nanu. Heɗe, gurju na'ta yawni. Bugolda sulum di'e: Goora vanu, nan gaŋ bolawa hay sem Ma-Vatɗina. 3Gurjuta ta ir sikel birim kep hiɗi dira' kista nam vula' goy mi sulumu. Sulum di'e: Gurju na'ta kayni nan min vula' goy mi Ma-Vatɗina ir maŋ naŋu, goora vanu, kay hiɗi na'a naŋ ma in va ma sli tuw sana ma ceɗay guna hiɗi ma yoray kawayna, nan hot vulaŋgawa.
4Nam hot vul gurjut mi sulumu. Sulum yaw gurjut ir sikel kis-ma', na' vula' mi sa ma yor kawayna. San kot va ma sli tuw sana ma yorayna hiɗi ma ceɗayna, nisi colom hay ziyna vi Mikka. 5Mikka namna ziyda ta girif Lawna ka vo valam zaw, nam kot sligara vi mul-ma-ɗifinna hiɗi terafim, goora valam mara kep nam vulum goy hay lopna, goor namna muɗ sunum ki mul-ma-ɗifinna nala.
6Hay buur namna kayni mul may kay sa Israyel noŋɗi, gigekaw lum mi va ma kuɗ hayamna. 7Sa ma joriyo kep may hay Betlehem hay Yuda, hay jafna vi Yuda; namu mi sa ma Levitna, nam ay musi ziy hay liy namna.
8Sa namna fokis hay hoyok-ziyn Betlehem vi Yuda pa, kal gar liyn ma li ziya hay li ma kiram ŋaa'a. Hay tu'da valam hay hagata, nam co kulo kay hiɗiyta vi Efrayim, ta-ta nam tupa kay ziyna vi Mikka. 9Mikka ka jobom ala naŋ may arige pa? Nam ka hotom dit ala nan mi sa ma Levitna, ziyna van hay Betlehem hay Yuda, nan poy kayn kay gar liyn ma kiran ŋaa'a kay li ziy haya. 10Mikka di talamu: Musaŋ hiɗi nan tani, naŋ ma sunan ki bun nala, ki mul-ma-ɗifinna van nala lay, nan as wurakaŋ gurjut sikel doogo hay busata, vulaŋ sligar ma naŋ min lay, vulaŋ sle ma ŋom ŋil tuwaŋ kaf. Sa ma Levitna kal vo talamu. 11Nam vilek hay dikamu kay mus hiɗi sa namna, nam ɗuw sa ma joriyon kayni ki kep jar gurona valam nala. 12Mikka tun sa ma Levitna kayni hay lopna, sa ma joriyon kayni muɗi ki mul-ma-ɗifinna valam nala, nam musi hay ziyna valamu.
13Mikka di'e: Wulin kayn nan wi ala Ma-Vatɗina ma lan ŋaat yo, kay sa ma Levitna zawni mi mul-ma-ɗifinna vanu.
Currently Selected:
SA KA KITANA 17: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001