GATTA-SEM-MA'TA 34
34
Mitta vi Musus
1Musus fokis hay fulda vi Mowab pa, nam jik kulo kay hiɗiyt Nebo, hay sin-hiɗiyta Pisga, ɗiger vok Yeriko. Ma-Vatɗina ɗekem nagat kiram kafe. Hay Galaad pa ta-ta hay Dan, 2nagat Neftali kafe, nagata vi Efrayim hiɗi Manase, nagata vi Yuda kaf ta-ta vun niy-lum ma gal vulatina, 3fulda vi Negeb, galla vi Yordan, lokŋa vi Yeriko, hoyok-ziyn ma gu-gomon hayna ta-ta hay Sowar. 4Ma-Vatɗina dumu: Kayni ti nagata ta nan yi va kanu ala nan min vula' mi Abraham, mi Isaak, mi Yakub, hiɗi jafna visiya. Nan ɗekaŋ nagat kaynawa, naŋ wa'awa hiɗi iraŋu, may naŋ as kal haya'ɗi.
5Musus sa ma sunda vi Ma-Vatɗina mit hay liyn namna, hay nagata vi Mowab, ki Ma-Vatɗina vul hagata nala. 6Ma-Vatɗina pum hay lokŋa hay nagata Mowab, ɗiger vok Bet-Pewor. Sa may wum yam usamɗi ta-ta vaydi. 7Hay li ma Musus mit kayni, busata valam asay kis kalam dok-ma'. Iram ka ɗuw dok-dok; dono ma talamna bay vat tuwa kaw; 8sum sa Israyella tiy Musus ir buur dok-ɦidi, hay fulda vi Mowab; bugol kayni buur ma tiyna hiɗi do'olla vatawa.
9Yosuwa goora vi Nun ay hobi hiɗi ŋusta ta yalla, kay Musus bar ɓalam kalamu. Sum sa Israyella hum kuɗumu, nisi li kuɗ dita ta Ma-Vatɗina disit vun Mususta.
10Sa ma jobta mara'a ma fok kulo'o hay Israyel ki Musus nala, ma wi ir tuwsi hiɗi Lawna ki Musus nala mayɗi. 11Sa as ŋra hiɗi namɗi kuɗ ɗekka hiɗi gul-yalda kaf ta Ma-Vatɗina gum kay la' hay nagat Egipte kat Farawn, kat sa sunda valamu hiɗi nagata valam noŋ kafe, 12hiɗi lop ma ɦuyumda kuɗumna ma Musus lumu hiɗi ɓalam ma gaŋeraŋa kir sa Israyella kafe.
Currently Selected:
GATTA-SEM-MA'TA 34: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001