YouVersion Logo
Search Icon

GATTA-SEM-MA'TA 20

20
Sum sa as kay tuɗ vun duurɗina
1Hay li ma nigi cukawa goyo kay dur sa gawt kigina, la irgi wi kulumayna, keke-ma-duura hiɗi sumun ŋol ɦini-ɦini suwgi nigiya, nigi ma li nar kisiɗi; kay Ma-Vatɗina Lawna vigiya ma kalgiyay goy hay nagat Egipte pana, nam ka hiɗi nigiya. 2Hay li ma duura coowa goboyo, mul-ma-ɗifinna ma ɦur kulo goboyo, law tam sumuna. 3Nam ma di ala: Humgiya, Israyella, vaydi nigi ka tuɗ tam sa gawt kigina kay dursiya. Narta ma kal hay dikgiɗi, ligi narɗi, tuwgi wirgi kisiɗi, ligi tuwgi voksi keŋ-keŋɗi. 4Kay Ma-Vatɗina Lawna vigiya ka tuɗ vokgiya, kay dur sa gawt kigina hay baŋalgiya, kay nam min suɗgi goyo.
5Sa ŋulona vi sojena ma muɗ irsi kirsiya di tisi ala: Sa ma in ziy ta wuliya may bay mala' vuna' tuwa ka su? La ka'a, nam hot vo'o, kay a nam mit vun duura may sa mara mala' vuna' hay baŋalamu kayni asɗi. 6Sa ma pi gulda-guldana may bay ja vuɗna valam tuwa ka su? La ka'a, nam hot vo'o hay ziyna valamu, kay a nam mit vun duura, may sa mara ja vuɗna vi gulda-guldan hay baŋalamu kayn may asɗi. 7Sa ma cat kalam gaɓiya may bay sli kalam tuwa ka su? La ka'a, nam hot vo hay ziyna valamu, kay a nam mit vun duura may sa mara sla' hay baŋalamu kayn may asɗi. 8Sa ŋulona vi sojena ma law tam sumun lo, nisi ma disi ala: Sa ma tuwam nari, ma kursulit may hay dikamɗi ka su? La ka'a, nam ma hot vo hay ziyna valamu, kay la naɗi nam ɗawn ma muɗ sum segen nari. 9Hay li ma sa ŋulona vi sojen vunsi vatawa, nisi ma tun soje sa ŋulona kuɗ vokŋa vokŋa.
Slita vi hoyok-ziyna
10Hay li ma nigi coowa kat hoyok-ziya kay li duura, nigi ma job tam sum sa hay hoyok-ziyna kay nisi tap kuɗgi bay duura. 11La nisi humgiyawa mal vun-galanawa goyo, sum sa hay hoyok-ziy namna nigi ma muɗsi gorvo vigiya, nisi as kay vulgi taara kaw. 12La nisi min tap kuɗgiɗi, min kay durgiya, nala nigi ma ŋuy hoyok-ziyna visiya. 13Ma-Vatɗina Lawna vigiya ma vulsi hay ɓigiya, ki kayn nala sa jufayn kaf nigi ma calsi goy hiɗi kew-gaferaŋa. 14May boyna, gurosgurayna hiɗi farayna, sle ma hay hoyok-ziyn kaf, sle ma ɓuraŋŋa kaf, nigi ma vurumumu, nigi ma ti sle ma ɓuraŋŋa ma nigi yawam hay ɓam sa gawt kigina sa Ma-Vatɗina Lawna vigi vulsi hay ɓigiya. 15Nigi ma li ki kayn nala kaw kat hoyok-ziyn kaf ma ka goy gine'e hiɗi nigiya, ma may tapay hiɗi hoyok-ziyna vi jaf-sum nisin lakŋiɗina. 16May hay hoyok-ziyna vi sum nisina ma Ma-Vatɗina Lawna vulgit vocon ɗawni, sle ma sukka hayamna kaf nigi as kay hin mara iriɗi. 17Kay nigi ma cum goy kafe, sa Hititna, sa Amoriyana, sa Kanaaniyana, sa Feresiyena, sa Heviyena hiɗi sa Yebusiyena, ki Ma-Vatɗina Lawna vigiya di tigi nala, 18kay nisi ma hatgiya a nigi ma sli kuɗ liwista kaf ta nisi ka li'e hay sem lawayna visiya, a nigi ma li suluk kat Ma-Vatɗina Lawna vigiya kayni may hay liyamɗi. 19Hoyok-ziy ma nigi min slumna la nigi ŋuyumawa, la nigi musawa ta-ta goy ŋoromu, gu ma piy (hay sinena) nigi ma param gaaɗi, nigi as tum vuɗamu, may kaam goyɗi. Kay gu ma hay sinena nam may mi sa'a kay nigi durumɗi. 20May gu ma as vu'ɗina nigi as param gaa'a, nigi as gi zlaɓ hiɗi namu kat hoyok-ziyna ma nigi ka durumna, ta-ta nigi sli hoyok-ziy namna tuwa.

Currently Selected:

GATTA-SEM-MA'TA 20: Massana

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy