2 YOHANA 1
1
Ɗek-goyta hiɗi gi-deɓta
1Sa ma maara ɗo tam Kiriya ta vilekay-goyta hiɗi gurona va'a, sa nan minsiya hay gasita. May mi nan kepɗi, may tam nisi kaf sa wi gasitawa kaw. 2Kuɗ gasita ta ka musi hayaya, ta min mus hiɗi naya ta-ta hay vatɗita:
3Slugota, lamanda, hiɗi toyta ma lak hiɗi nigiya, kay kayni may vi Bumna hiɗi Yesu Kristu, Goora vi Bumna hay gasita hiɗi minda.
Minda jar ɓosiyom tuwsina
1 Yoh 5:1-3
4Nan ka firi ŋolo kay nan fi gurona vag sara'a ka poy hay gasita, kuɗ vun-ma-gatna ma numa'a fumay vi Bumna pa. 5Wulin kayni, Kiriya, va ma nan ɗo tag tan kayni may mi vun-ma-gat ma wuliɗi, mi vun-ma-gatna ma nay fum hay cawa'ta tuniti pa, ala nay ma li hiɗi minda jar-tuwaya tuwaya. 6Ŋaata vi minda kayn ala nay ma poy hay vun-ma-gatna valamu. Kayni mi vun-ma-gatna ma nigi as poy hayamna, ki nigi hatawa hay tun cawta pa nala.
Sa hat hatta ta bay-gasita
1 Yoh 4:1-6
7Wulini sum sa ɗut sumun goyna ŋolo dusiyawa goy kay nagata, nisi may vi ala Yesu ma hay nagata hay sliw-tuw sanaɗi. Nisi kayni si sa ɗut sumuna hiɗi anti-kristuwayna. 8Ŋomgi tuwgi ŋaa'a kay vuɗna vi lopna vuma'a ma ba goyɗi, may kay nigi ma fi wurakŋa hay liyam kafe.
9Sa ma cal hagata goyo, mus hay hatta vi Kristuɗi, Lawna may hayamɗi; sa ma mus hay hatta, Bumna hiɗi Goora ka hayamu. 10La sa co katgiya, may nam mar hatta kayn kalamɗi, nigi ma vum vo hay ziyna vigiɗi; nigi ma gum deɓɗi kaw, 11kay sa ma gum deɓna ka tap hiɗi namu hay lopna valamu ma joona.#1:11 Ɗuw hay 1 Kor 5:9-13.
12Slen ŋolo ka kanu kay ɗo tigiya, may nan min ɗom hay ɗerweldaɗi, ɗom hiɗi aŋkrenɗi kaw#12 aŋkre min di ala niy-ɗota. may nam min coys goy vigiya, lawgi hiɗi vunan noŋo, kay firita vaya fi hob kulo'o.
13Gurona vi ɓasukga ta vilekay-goyta ka gag deɓisa.
Currently Selected:
2 YOHANA 1: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001