2 KORINTENA 1
1
Ɗek-tuwta hiɗi gi-deɓta
1Paulus, apostolla vi Yesu Kristu, kuɗ minda vi Lawna, hiɗi ɓasuyn Timotewus, tam tapna vi Lawna sa ka hay Korinte, tam sa tapna kaf kaw sa ka hay Akaya pet. 2Slugota tigiya, hiɗi toyta vi Lawna, Buya, hiɗi Bum-Sumuna vaya Yesu Kristu.
3Suburta tam Lawna Bum Bum-Sumuna vaya Yesu Kristu, Bum slugota hiɗi Lawn ma vul teŋ-irta mi sumun kafe, 4nam ma teŋma irma hay zumalda vuma kaf, kay numa kaw fi teŋ ir nisi sa ka hay zumalda tara'a tara'a kaf, hiɗi teŋ-irta ta Lawna teŋma irma hiɗi na'ta, 5kay ki numa'a ci lasta ŋolo hay Kristu nala kaw, numa ka fi teŋ-irta ŋolo hay Kristu. 6La numa ka ziy zumalda, kayni kay vulgi teŋ-irta, kay vulgi su'da kaw; la irma numa ka teŋiya, kayni kay vulgi teŋ-irta migi nigiya, kay nigi ma li nagaya kay ziy zumalda na'ta ta numa ka haya'ta kaw. 7Cubta-sle'ta vuma kigiya ka dono'o, kay numa wi ala, ki nigi tap hay lasta, nala nigi ma tap hay teŋ-irta kaw.
Lasta ta nisi fa' jewta
8Kay, ɓosiyonna, numa min ala nigi ma lak hay bay-widaɗi kay zumalda ta co kuma'a hay Asiya, na' nek ŋolo, suw donota vuma'a, ta-ta numa muɗ var ala numa ma lak iriɗi. 9Awa, numa var ala numa coowa vun mitta gasi, kay numa'a tun vida vuma'a kay tuwmaɗi, may kay Lawna, nam ma day sa mitin kulona. 10Nam ma butma'awa goyo, ka butma goyo kaw kay mitta ŋol na'ta, nam ma numa ka zamam ɓalamu kay nam ma butma goyo hay kayni kaw, 11nigi kaw ma gut kuma'a hay siɗawta; nala sumun ŋolo ma fi slugota na'ta kuɗma numa'a, sumun ŋolo ma vul gi-deɓta (mi Lawna) kuɗma numa'a.
12Kay va ma numa subur tuwma kalamna kayni, mi di-goyta vi tap-wida vuma'a, kay hay li ma numa poy hay nagata vok irgi kayni, numa poy hiɗi peldetta, hiɗi gasita ta may vi Lawna pa, may hiɗi yalla vi sliwnaɗi, may hiɗi slugota vi Lawna. 13Kay numa ɗo va mara tigiɗi, may mi va ma nigi ka jaŋamu, ma nigi ka wumna kaw, nan var ala nigi ma wumu ta-ta hay dabaŋ-gu'ta. 14Ki nigi waawa wulin neeɗa kaw ala suburta vuma'a ka hay nigiya, nala suburta vigiya ka hay numa'a kaw hay buura vi Bum-Sumuna vaya Yesu.
15Kuɗ na'ta kayni, nan min tuɗis katgi jewe, kay nigi ma fi slugota sem kep lo: 16Goy vigi pa nan min cap Makedoniya, bugolda goy Makedoniya pa nan ma hotay goy vigiya, kay nigi ma gan diran hay Yuda. 17Hay li ma nan var kay li kayni; nan vara' kayn ti varta hefteŋga su? Lebo sle ma nan colomna nan colom kayni hay varta vi sliwna, kay awa hiɗi a'a ma li hayan (ma' pete) su? 18May ki Lawna ka gasiya nala, yoboy ma nan dum tigina awa hiɗi a'a (ma' pete) may hayamɗi. 19Kay Yesu Kristu Goora vi Lawna, nam ma nanu hiɗi Silvanus hiɗi Timotewus kusum tigina, nam may awa hiɗi a'aɗi, namu mi awa. 20Kay dita-ŋaɓayta vi Lawna ka ŋolo, na'a mi awa hay namu; na'a mi Amen hay namu kaw, kay vul gajijita tam Lawna. 21May nam ma junma dono'o hiɗi nigiya, ɦok mul kaya kaw, kayni mi Lawna. 22Nam ma tun soona valamawa kaya, ma vulay deŋga vi Ŋusta valamawa hay dikaya.
23May nan min yi sem Lawna kan ala: Nan min tuɗis katgiɗi kayni kay hingi bay lawta.#1:23 Ɗuw 1 Kor 4:21. 24May kay numa li gaŋeraŋ kay vida vigiyaɗi, may numa min tap firi hiɗi nigiya, kay mige nigi lakay dono'o hay vida.
Currently Selected:
2 KORINTENA 1: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001