Rut 1
1
Elimelecpa Moab nacionman ripukusqanmanta
1Israel nacionpi juezkuna kamachikuchkaptinkum muchuy karqa, chaymi Judá lawpi Belén llaqtayuq runa ripukurqa warmintin hinaspa iskaynin qari churinkunapiwan, Moab lawman chaypiña yachanankupaq. 2Chay runapa sutinmi karqa Elimelec, warminpañataq Noemí, iskaynin churinkunapañataqmi Mahlonwan Quelión. Paykunaqa karqaku Judá nacionpi Belén law Efrata llaqtayuqmi. Paykunam Moab lawman chayaruspanku chaypiña yacharqaku.
3Ichaqa qosan Elimelec wañukuptinmi Noemiyqa sapallanña qeparurqa iskaynin qari wawankunapiwan. 4Paykunam Moabita warmikunawan casarakururqaku; chay warmikunapa sutinkum karqa Orfa chaynataq Rut. Yaqa chunka wataña Moabpi yachachkaptinkum 5Mahlonwan Quelionpas wañukurqaku, chaymi Noemiyqa sapallanña qeparullarqa mana qosayuq mana wawayuq.
Belén llaqtaman, Noemiywan Rut risqankumanta
6Moab lawpi yachachkaspam Noemí uyarirurqa llaqtamasinkunaman Dios allin cosecha qoykusqanta, chaymi Moabmanta iskaynin llumchuyninkunapiwan llaqtanman kutikurqa. 7Chaynapim yachasqanku allpamanta lloqsispanku Judá lawman rirqaku. 8Richkaptinkum llumchuyninkunata Noemí nirqa:
Mamaykichikpa wasinman sapakama kutikuychik. Diosyá bendecisunkichik imaynam qamkunapas ñoqawan chaynataq wañukuq wawaykunawanpas ruwasqaykichikman hina. 9Diostaqyá qaritapas sapakamaman qosunkichik casarakuspa wasikichikpi hawkayayta tarinaykichikpaq, nispa.
Chaynata nispa Noemí muchaykariptinmi qaparispa waqakuywan 10llumchuyninkuna nirqaku:
Ñoqaykuqa qanwanmi llaqtaykiman ripusaqku, nispanku.
11Noemiyñataqmi nirqa:
Kutikuychik wawallaykuna. ¿Imapaqtaq ñoqawan riwaqchik? Manañam wawaypas kanqañachu casarakunaykichikpaq. 12¡Kutikuychik wawallaykuna! qosayuq kanaypaqpas payañam kani. “Wawayuqraqmi kasaq” nispay kunan tuta qosaywan puñuruyman hinaspa qari wawakunata wachakuruptiypas 13¿hatunyanankamachu suyawaqchikraq? ¿Paykunata kuyaspachu suyawaqchik mana casarakuspa? ¡Manam wawallaykuna! qamkunamantapas aswan llakisqam tarikuni Diospa piñakuynin ñoqapa contraypi kasqanrayku, nispa.
14Hinaptinmi paykuna huktawan qaparispa waqarqaku. Chaymantam Orfaqa suegranta muchaykuspan kutikurqa, Rutñataqmi Noemiywan qeparurqa. 15Chaymi huktawan Noemí nirqa:
Waqaya llumchuymasikipas llaqtanman, diosninkunaman kutikun; chaynayá qampas kutikuy, nispa.
16Rutmi ichaqa nirqa:
Ama ruegawaychu qanmanta rakikuspa kutikunaypaqqa. Maymi risqaykimanmi ñoqapas risaq, maymi yachasqaykipim yachasaq, llaqtaykim kanqa llaqtay, Diosnikim kanqa Diosniy. 17Maypim wañukusqaykipim ñoqapas wañusaq, chaypitaqmi pampakusaqpas. Sichum kawsananchikkama qanmanta rakikuptiyqa Diosyá anchata castigawachun, wañuyllañam qamtawan ñoqataqa rakinawasunchik, nispa.
18Rut mana imaraykupas rakikuyta munaptinmi, Noemiyqa chayta qawaykuspa manaña hikutarqañachu. 19Chaynapim iskayninku ripukurqaku Belén llaqtaman, chayaruptinkum llaqtantin lliw runakuna paykunamanta admirakurqaku. Hinaptinmi warmikuna ninakurqaku:
¿Noemiychus wak warmiqa? nispanku.
20Chaymi Noemiyñataq nirqa:
Amaña #1.20 Hebreo simipi Noemí ninanqa “miski, kusisqa” ninanmi.Noemí niwaychikñachu, aswanqa #1.20 Hebreo simipi Mara ninanqa “qatqe, piñasqa” ninanmi.Mara niwaychikña, Tukuy Atiyniyuq Diospa sinchi llakirachiwasqanrayku. 21Kaymantaqa lloqsirqani tukuy imayuqmi, ichaqa Diosmi mana imayuqtaña kutirachimuwan. Chaynaqa, ¿imapaqñataq Noemí nisparaq sutichawankichik? Diosmi ñoqapa contraypi hatarirun, Tukuy Atiyniyuqmi llakirachiwan, nispa.
22Chaynatamá Noemí kutimurqa Moab llaqtayuq llumchuynin Rutpiwan. Moab lawmanta lloqsimuspam Belén llaqtaman chayarurqaku cebada rutuy qallarichkaptin.
Currently Selected:
Rut 1: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012