YouVersion Logo
Search Icon

Proverbios 1

1
Yachaywan rimaykuna imapaqmi kasqanmanta
1 # 1 R 4.32. Kaykunam Israel nacionpa reynin Davidpa churin Salomonpa yachaywan rimarisqan simikuna.
2Kaykunaqa qellqasqa karqa,
yachaytawan yachachikuyta haypanapaqmi,
sumaq rimaykunata entiendenapaqmi;
3chaynapi corregisqa kanapaq,
yachaywan imatapas ruwanapaq,
allin ruwaq kanapaq, allin tanteoyuq kanapaq,
hinaspa mana pimanpas sayapakunapaq.
4Mana yachayniyuqkunata yachayniyuqtaña ruwananpaq,
jovenkunatapas allin tanteakuqta,
allin yachayniyuqtaña ruwananpaq.
5Yachayniyuq runapas chayta uyarispanmi yachayninta huntachin,
yachayniyuq runapas aswanraqmi yachayta chaskinqa,
6yachaywan rimaykunapa nisqanta entiendenanpaq,
yachayniyuqkunapa rimasqanta entiendenanpaq.
7 # Job 28.28; Sal 111.10; Pr 9.10. Yachaypa qallariyninqa Tayta Diosta kasukuymi;
mana yachayniyuq runaqa
yachaytawan yachachikuytam wischupakun.
Jovenkunapaq yachachikuykuna
8Churilláy, taytaykipa rimapayasusqaykitayá uyariy,
mamaykipa yachachisusqaykitaqa amayá qonqaychu.
9Chay nisusqaykikunaqa umaykipaq kuyayllapaq corona hinam kanqa,
kunkaykipaqpas kuyayllapaq collar hinam kanqa.
10Churilláy,
huchasapakuna engañayta munasuptikiqa
ama kasuychu.
11Sichum nisunki:
“Hakuchik runata wateqamusun,
inocente runata wañuchimusun,
12sepultura hinaraq kawsachkaqllata mikuramusun,
imaynam ayata sepultura millpun, chaynam millpuramusun.
13Hinaspanchikmi tukuy ima kapuqniyuq kasun,
wasinchiktapas suwakusqanchikwanmi huntachikusun.
14Hamuy, ñoqaykuwan hukllawakuy partekitaqa chaskinkim,
hukllaman huñuruspam rakinakusun”,
nisuptikiqa,
15churilláy ama munaychu paykunawan riytaqa,
aswanqa paykunapa ñanninmanta asurikuy;
16paykunaqa mana allinkuna ruwaqmi chaylla kallpanku,
runa wañuchiqpas utqaymanmi kallpanku.
17Pawaq animalkunapa rikusqanta
toqlla churayqa yanqapaqmi.
18Chay runakunaqa kikillankum wañuyman qarakuchkanku,
kikillankupaqmi toqllatapas churakuchkanku.
19Chaynam tukuy imayuq karuyta munaq runaqa,
chay munaynillanmi wañuymanpas apanqa.
Yachaymi jovenkunata maskachkan
20Yachaymi callekunapi qayakun,
plazakunapim hatunmanta qaparin.
21 # Pr 8.1-3. Runakunapa huñunakunan esquinakunapim qaparin,
llaqtapa punkunkunapim kaynata nin:
22Mana yachayniyuq jovenkuna,
¿haykapikamataq mana yachayniyuq kankichik?
¿haykapikamataq burlakuynikichikpi kusikuspa
yachayta cheqninkichik?
23Rimapayasqaykunata uyariychik,
hinaptinqa espirituywan huntachispaymi
imam piensasqaykunata reqsichisqaykichik.
24Qamkunaqa qayachkaptiypas
manam uyarirqankichikchu,
makiyta haywarimuchkaptiypas
manam kaqpaqpas hapirqankichikchu.
25Aswanraqmi consejasqaykunatapas wischupakurqankichik,
rimapayasqaykunatapas manam kasukurqankichikchu.
26Chayraykum ñoqapas ñakariypi kaptikichik,
manchakuy hamusuptikichik burlakusaq;
27manchakusqaykichik wayra-para hina hamuptinmi,
sasachakuy sinchi viento hina hamuptinmi,
llakipi kaptikichikmi,
ñakarichisqa kaptikichikmi asikusaq.
28Chay punchawpim qayakamuwankichik,
ichaqa manam uyarisqaykichikchu,
tutapaymanta maskawaspaykichikpas
manam tariwankichikchu.
29Yachayta wischupakuspa Tayta Diosta mana kasukusqaykichikraykum,
30rimapayasqaykunata mana uyarispa,
yachachikuyniykunata wischupakusqaykichikraykum,
31mana allin ruwaynikichikpa rurunta mikunkichik,
mana allin munaynikichiktam saksankichik.
32Mana yachayniyuqkunataqa
mana yachayniyuq kayninmi wañurachinqa.
Mana tanteakuy yachaq runataqa,
mana tanteakuy yachaq kayninmi chinkarachinqa.
33Pipas uyariwaqniymi ichaqa
hawkalla kawsakunqa,
ima sasachakuytapas mana manchakuspam
hawkalla kawsakunqa.

Currently Selected:

Proverbios 1: RCHQ2

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy