Juan 10
10
Allin michiqmanta
1Cheqaptapunim nikichik: Pipas ovejapa corralninman mana punkunta yaykuspa huklawnin yaykuqqa suwam hinaspa salteaqmi. 2Punkun yaykuqmi ichaqa ovejakunapa michiqnin. 3Punku nanachikuqpas yaykunanpaqmi punkuta kichaykun, ovejakunapas qayakuynintam uyarinku; payqa ovejakunatapas sutinmantakama qayaspanmi corralninmanta hawaman hurqon. 4Ovejakunata kanchanmanta hurqoruspanmi puntata rin, ovejakunañataqmi qayasqanta uyarispa qatinku. 5Mana reqsisqantaqa manam qatinkuchu, aswanqa qayakuyninta mana reqsisqanraykum ayqekunku, nispa.
6Chay rikchanachiyta niptinpas, manam paykunaqa imamantam nisqantapas entienderqakuchu.
Allin michiqqa Jesuslla kasqanmanta
7Jesusmi huktawan nirqa:
Cheqaptapunim nikichik, ñoqam ovejakunapa yaykunan punku kani. 8Ñoqamanta ñawpaqta hamuqkunaqa suwakunawan salteaqkunam karqaku, chaymi ovejakunaqa mana kasurqachu. 9Ñoqam punku kani, pipas ñoqantakama yaykuqqa salvasqam kanqa. Yaykunqam, hinaspam lloqsinqa, pastokunatapas tarinqataqmi.
10Suwaqa hamun suwakuqmi, wañuchiqmi hinaspa purmachiqmi. Ñoqam ichaqa hamurqani kawsanaykichikpaq hinaspa kawsaypa huntasqan kanaykichikpaq. 11#Ez 34.11-12.Ñoqaqa allin michiqmi kani. Allin michiqqa ovejankunaraykum vidanta qon. 12Pagollapaq michiqmi ichaqa, atoq hamuptinpas ovejakunata saqeruspan ayqekun; payqa mana michiqninku kasqanrayku, nitaqmi ovejakunapas paypachu. Chaymi ovejakunatapas atoq hapiruspan cheqerachin. 13Chay runaqa pagollapaq michisqanraykum ayqekun, ovejakunamantaqa manam imapas qokunchu.
14-15 #
Mt 11.27; Lc 10.22. Ñoqaqa allin michiqmi kani. Imaynam Taytay ñoqata reqsiwan chaynam ñoqapas Taytayta reqsini, chaynam ñoqapas ovejaykunata reqsini, paykunapas reqsiwantaqmi. Ñoqaqa ovejakunaraykum vidayta qoni. 16Kachkantaqmi kay corralpi kaqkunamanta sapaq ovejaykunapas. Paykunatapas pusamuptiymi qayakuyniyta uyarinqaku, chaynapim huk kanchallaña kanqaku, michiqninkupas hukllañam kanqa.
17Vidayta qospay kaqmanta kawsarimusqayraykum Taytay kuyawan. 18Manam pipas vidaytaqa qechuwanmanchu, kikiymantam qosaq. Makillaypim kachkan qonaypaqpas chaynataq kawsarimunaypaqpas. Chaynatam Taytay kamachiwarqa.
19Chaykuna rimasqanta uyarispankum llapa judiokuna rakinakuyman chayarurqaku. 20Achkaqmi nirqaku:
Imapaqmi uyarinkichik, payqa demonioyuq locom, nispanku.
21Wakiqninñataqmi nirqaku:
Demoniopa huntasqanqa manam kaynataqa rimanmanchu. Demonioqa manataqmi ñawsataqa qawarichinmanchu, nispanku.
Jesusta judiokuna wischupakusqankumanta
22Jerusalén llaqtapim para tiempopi templo Dedicación fiesta karqa. 23Jesusmi Salomonpa portalninpi purichkarqa. 24Chaymi judiokuna muyuruspanku nirqaku:
¿Haykapikamataq iskayrayachiwankiku? Qam Cristo kaspaykiqa cheqaptayá willawayku, nispanku.
25Jesusñataqmi nirqa:
Ñam nirqaykichikña ichaqa manam creerqankichikchu, Taytaypa atiy qowasqanwanmi tukuy imata ruwani, chaykunam ñoqamanta willakun. 26Qamkunaqa manam ovejaykunachu kankichik chaymi mana creenkichikchu. 27Ovejaykunaqa vozniytam uyarin, ñoqapas paykunataqa reqsinim, chaymi paykunaqa qatiwanku. 28Ñoqam paykunaman wiñay kawsayta qoni chaymi paykunaqa mana haykapipas chinkanqakuchu, manataqmi pipas makiymantaqa qechuwanqachu. 29Tukuy ima qoqniy Taytayqa llapanmantapas atiyniyuqmi, chaymi mana pipas atinmanchu Taytaypa makinmanta qechuytaqa. 30Taytaywanqa hukllam kaniku.
31Judiokunañataqmi huktawan hatarirqaku rumiwan chamqaparunankupaq. 32Jesusñataqmi nirqa:
Achkatam ruwarqani allin ruwaykunata Taytaypa atiy qowasqanwan, chaynaqa ¿mayqanninmantataq rumiwan chamqawayta munankichik? nispa.
33 #
Lv 24.16. Judiokunañataqmi nirqaku:
Chamqapaytaqa munaykiku manam allin ruwasqaykimantachu, aswanqa rimaspayki Diosta piñachisqaykimantam chaynataq runa kachkaspayki Dios tukusqaykimantam, nispanku.
34 #
Sal 82.6. Jesusñataqmi nirqa:
Qamkunapa leynikichikpim qellqasqa kachkan: “Ñoqam nirqaykichik qamkunaqa dioskuna kasqaykichikta nispa” niq. 35Manam negachwanchu Qellqapa nisqantaqa. Diosqa suticharqa dioskunawanqa willakusqankuna chaskiqkunatam. 36Taytam sapaqchawaspan ñoqata kay pachaman kachamuwarqa, chaynaqa ¿imaynataq ninkichik qamkunaqa: “Diostam kamichkan” nispaykichikqa, “Diospa Churinmi kani” nisqayraykuqa? 37Taytapa ruwanankunata mana ruwaptiyqa amayá creewaychikchu, 38sichum ruwaptiyqa manaña ñoqapi creespaykichikpas ruwasqaykunapiyá creeychik, chaynapim Taytawanqa huklla kasqayta yachankichik.
39Huktawanmi Jesusta presochayta munarqaku ichaqa paykunamantam lluptirurqa.
40 #
Jn 1.28. Jesusmi huktawan Jordán mayupa waklawninman kutirqa, ñawpaqta Juanpa bautizasqan lawman. Hinaspam chaypi qeparqa. 41Chaymanmi achkallaña runakuna rispanku ninakurqaku:
Juanqa manam ima milagrotapas ruwarqachu, Jesusmanta nisqanmi ichaqa cheqap, nispanku.
42Chaypim Jesusman achkaq iñirqaku.
Currently Selected:
Juan 10: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012