Wɩlʋʋ 1
1
Mbʋ́ Yesu kɔm ɛwɩlɩ ɛyáa yɔ, ḿbʋ́ wɛnɩ takayaɣ kanɛ ka-taa
1Mbʋ́ mbʋ́ Yesu Krɩstʋ wɩlaa yɔ, pʋ-tɔm pama takayaɣ kanɛ ka-taa. Ɛsɔ wɩlɩnɩ-ɩ-pʋ se ɛwɩlɩ ɛ-tʋmlaɖaa nɛ pana mbʋ́ pʋkɔŋ labʋ alɩwaatʋ pazɩ taa yɔ nɛ ɛtɩŋnɩ e-tiyiyu yɔɔ nɛ ɛwɩlɩ-pʋ ɛ-tʋmlaɖʋ Yohanɛɛsɩ. 2Ɛ́lɛ́ lɩzɩnɩ mbʋ́ pɩtɩŋa payɩ ɛnawa yɔ pɩ-aseɣɖe: ɛlɩzɩ-ɖɩ Ɛsɔtɔm nɛ nɖɩ́ Yesu Krɩstʋ ñalɩzaa yɔ pɔ-yɔɔ. 3Weyi ɛkalɩɣ tɔm ndʋ́ tɩlɩnɩ Ɛsɔ cɔlɔ nɛ pama-tʋ takayaɣ kanɛ ka-taa yɔ, ehiɣ ɛ-tɩ! Mbá paba ñewelesiɣ-tʋ nɛ pɔɖɔkʋʋ-tʋ yɔ, pehiɣ pa-tɩ! Mbʋ́ pʋyɔɔ yɔ, alɩwaatʋ wɩzɩ talʋʋ.
Pɛsɛɣ Aazii hɔɔlʋʋ taa Krɩstʋ aŋgba lʋbɛ taa ñɩma
4Ma Yohanɛɛsɩ, mɛnsɛɣnɩ Krɩstʋ aŋgba lʋbɛ wena awɛ Aazii hɔɔlʋʋ taa yɔ a-taa ñɩma: Ɛsɔ nɛ feziŋ lʋbɛ weyi ɩwɛ e-kewiyaɣ kpelaɣ ɛsɩndaa yɔ, palabɩ-mɩ lootiye nɛ pɛhɛzɩ mɩ-laŋa. Ɛnʋ wɛna, ɛnʋ kɛwɛna, ɛnʋ kaɣnɩ kɔm. 5Yesu Krɩstʋ weyi ɛkɛ aseɣɖe tʋ weyi ɛlakɩ mbʋ́ ɛɖʋwa se ɛlakɩ yɔ, ɛlabɩ-mɩ ḿbʋ́ ɖɔɖɔ. Ɛnʋ pacalɩ fezuu nɛ sɩɖaa taa, ɛkɛ kedeŋa yɔɔ awiya taa Wiyaʋ.
Ɛsɔɔlɩ-ɖʋ nɛ ɛtɩŋnɩ ɛ-calɩm mbʋ́ ɛkpɛdɩ ɖɔ-yɔɔ yɔ pʋ-yɔɔ nɛ ɛlɩzɩ-ɖʋ ɖa-kɩwɛɛkɩm taa 6nɛ eyele ɖɩkɛ kewiyaɣ taa ñɩma nɛ cɔjɔnaa ɛ-Caa Ɛsɔ tʋmɩyɛ taa. Ɛnʋ lɛ, ɛwɛɛ koboyaɣ taa nɛ ɛwɛɛ ɖoŋ pɩnzɩ ɛgbaŋ ɛgbaŋ! Pɩla ḿbʋ́!
7Ɩcɔnɩ ɩna, ɛkɔŋ naɣ yɔ ɛsɔmɩndʋ yɔɔ!
Ɛyáa tɩŋa kɔŋ-ɩ naʋ,
halɩ pɩkpɛndɩnɩ mbá paasɔbɩ ɛ-hʋyʋʋ taa kɩkpɛzɩŋ yɔ.
Ajɛya kpeekpe taa ɛyáa kɔŋ wiu
ɛ-yɔɔ.
Toovenim, pʋkɔŋ labʋ ḿbʋ́! Pɩla ḿbʋ́!
8Kɩpaɣlʋ Ɛsɔ Đoŋ Tɩŋa Tʋ tɔŋna se: «Ma lɛ Nʋmɔɖɛyʋ nɛ Ɛɖɩɣyɛ.» Ɛnʋ wɛna, ɛnʋ kɛwɛna, ɛnʋ kaɣnɩ kɔm.
Yohanɛɛsɩ naɣ Krɩstʋ e-koboyaɣ taa
9Ma mɩ-taabalʋ Yohanɛɛsɩ lɛ, ma nɛ mɩ ɖɩtɔkɩnɩ kʋñɔŋ nɛ kewiyaɣ nɛ ɖɩñakɩ pana ɖa nɛ Yesu ɖɛ-kpɛndʋʋ taa. Monsusi Ɛsɔtɔm nɛ malɩzɩ Yesu aseɣɖe yɔɔ pɛkɛzɩ-m tɛtʋ ɛjaɖɛ nɖɩ́ lɩm cɔ-ɖɩ pɩta nɛ payaɣ-ɖɩ se Patmoosi yɔ ɖɩ-taa. 10Peeɖe Fezuu Kiɖeɖeu tibi mɔ-yɔɔ Kɩpaɣlʋ kɩyakʋ nakʋyʋ wiye nɛ manɩɣ puholuu nɛ ma-wayɩ ɖoŋ ɛzɩ pahʋlʋʋ ɛgandɩyɛ yɔ se: 11«Ma mbʋ́ ŋnaɣ yɔ pʋ-tɔm takayaɣ nakɛyɛ taa nɛ ŋtiyini Krɩstʋ aŋgba lʋbɛ anɛ a-taa ñɩma. Ana yɔ: Efɛɛzɩ ñɩnɖɛ nɛ Smiirnɩ ñɩnɖɛ nɛ Pɛɛrgam ñɩnɖɛ nɛ Tiyaatiiri ñɩnɖɛ nɛ Saardɩ ñɩnɖɛ nɛ Filaadɛlfii ñɩnɖɛ nɛ Laodisee ñɩnɖɛ.»
12Menkisaa se mana weyi ɛyɔɔdʋʋnɩ-m yɔ lɛ, manaɣ kanɖʋnaa nabɛyɛ lʋbɛ, palabɩ-wɛ nɛ sika. 13Peeɖe mana nɔɔyʋ sɩŋ pɛ-hɛkʋ taa. Esu toko nɛ kitii ɛ-naŋgbanzɩ yɔɔ waaa nɛ ɛta ɛ-laŋɩyɛ taa sika tambaɖɛ. 14Ɛ-ñʋʋ nɛ ɛ-ñɔsɩ pahʋlʋmɩ poyi poyi ɛzɩ kpootu yɔ nɛ ɛ-ɛsɛ ɖeɣ miŋ pelu pelu ɛzɩ miŋ nzʋlʋmɩyɛ yɔ. 15Ɛ-naŋgbanzɩ wɛ ɛzɩ ñɩ́ɣ́yʋ́ʋ kazɩnzɩŋa ñɩŋgʋ ŋgʋ́ paɖʋ miŋ taa nɛ kɩsɛɛ yɔ nɛ panɩɣ ɛ-nɔɔ ɛzɩ lɩm sɔsɔm falʋʋ yɔ. 16Ɛɖɔkɩ tɩɩnzɩ lʋbɛ e-nesi kɩbanzɩ taa nɛ ɛ-nɔɔ taa lɩɣ sɩɣa ŋgá kɔ-nɔɔ taa cʋlʋtaa nɛ kapɩɣ cenje yɔ. Ɛ-ɛsɩndaa ñɩlɩsaɣ ɛzɩ wɩsɩ ñakʋʋ ɖoŋ alɩwaatʋ ndʋ́ sisiɣa yɔ. 17Mana-ɩ lɛ, mɔntɔlɩ ɛ-tɛɛ ɛzɩ mansɩba yɔ. Peeɖe ɛtɩnɩ e-nesi kɩbanzɩ mɔ-yɔɔ nɛ ɛtɔ se: «Sɔɔndʋ ɛtaakpa-ŋ! Ma lɛ Nʋmɔɖɛyʋ nɛ Ɛɖɩɣyɛ. 18Ma lɛ weyi ɛwɛ wezuu yɔ. Maasɩba, ɛlɛ́, ma yɔ, mɛwɛɣnɩ mɛ-ɛsɛ tam. Mɔnɖɔkɩ sɩm nɛ ɖenɖe sɩɖaa wɛɛ yɔ pɔ-nɔnɔɔ ñɩma. 19Yee ḿbʋ́ ma mbʋ́ ŋnawa yɔ pʋ-tɔm. Ḿbʋ́ lɛ mbʋ́ pʋwɛ lɛɛlɛɛyɔ yɔ nɛ mbʋ́ pʋkɔŋ labʋ pʋwayɩ yɔ. 20Ŋnaɣ tɩɩnzɩ lʋbɛ nzɩ́ ŋna me-nesi kɩbanzɩ taa yɔ nɛ kanɖʋnaa lʋbɛ mbá palabɩ-wɛ nɛ sika yɔ, pɔ-tɔm ndʋ́ tɩwɛ mɛsaɣ tɛɛ yɔ tɩ-tɔbʋʋ: tɩɩnzɩ lʋbɛ ńzɩ́ lɛ Ɛsɔ tiyiyaa mbá ɛsɩwa se pɔcɔnɩ Krɩstʋ aŋgba lʋbɛ ana a-yɔɔ yɔ. Piyele kanɖʋnaa lʋbɛ lɛ aŋgba ana a-lʋbɛ.»
Currently Selected:
Wɩlʋʋ 1: KABI
Highlight
Share
Copy
Want to have your highlights saved across all your devices? Sign up or sign in