Koloosi 1
1
Sɛtʋ
1Ma Pɔɔlɩ weyi pɩkɛdɩnɩ Ɛsɔ nɛ eyele se mɛnkɛ Krɩstʋ Yesu tiyiyu yɔ, ma nɛ taabalʋ Timootee 2ɖɩmaɣnɩ takayaɣ kanɛ taabalaa Ɛsɔ ñɩma mbá mɩ ɩwɛ Koloosi nɛ ɩtɩŋɩɣ Krɩstʋ nʋmɔʋ ɛzɩ pʋpɔzʋʋ mɩ nɛ ɩ mɩ-kpɛndʋʋ yɔɔ yɔ. Đɩsɛ-mɩ: ɖa-Caa Ɛsɔ ɛlabɩ-mɩ lootiye nɛ ɛhɛzɩ mɩ-laŋa!
Pɔɔlɩ saŋ Ɛsɔ
3Alɩwaatʋ ndʋ́ ɖɩsɛɣ Ɛsɔ yɔ, ɖiiyeki-i sam mɩ-yɔɔ. Ɛnʋ lɛ ɖa-Kɩpaɣlʋ Yesu Krɩstʋ Caa. 4Toovenim lɛ, pɔyɔɔdɩ ɛzɩma mbʋ́ ɩwɛnɩ lidaʋ Krɩstʋ Yesu yɔɔ yɔ nɛ ɛzɩma mbʋ́ ɩsɔɔlɩ Ɛsɔ ñɩma tɩŋa payɩ yɔ pʋ-tɔm nɛ ɖɩnɩɩ. 5Đaŋʋʋ mbʋ́ ɩɖaŋ mbʋ́ Ɛsɔ kɔñɔɔzaa nɛ ɛsɩɩ-mɩ ɛsɔdaa yɔ, pʋ-yɔɔ ɩwɛnɩ lidaʋ nɛ sɔɔlɩm ḿbʋ́. Đaŋʋʋ ḿbʋ́, pʋ-tɔm paacalɩ-mɩ heyuu alɩwaatʋ ndʋ́ posusaɣ-mɩ toovenim tɔm yɔ. Ńdʋ́ lɛ Laŋhɛzɩyɛ Tɔm. 6Laŋhɛzɩyɛ Tɔm ńdʋ́, tɩtalɩ mɩ-tɛ ɛzɩ tɩcɔʋ kedeŋa kpeekpe yɔɔ ɛyáa cɔlɔ nɛ tɩlabɩ-wɛ tʋmɩyɛ siŋŋ yɔ. Ḿbʋ́ ɖɔɖɔ tɩlabɩ-mɩ tʋmɩyɛ kpaɣ ɖooo kɩyakʋ ŋgʋ́ ɩnɩ Ɛsɔ lootiye tɔm nɛ ɩtɩlɩ-ɖɩ kpem yɔ. 7Ńdʋ́ ɖɛ-ɛgbaɣdʋ Epafraasɩ weyi ɖa nɛ ɩ ɖɩlakɩ tʋmɩyɛ yɔ, ɛwɩlɩ-mɩ. Ɛkɛ Krɩstʋ tʋmlaɖʋ mɩ-cɔlɔ, ɛlakɩ mbʋ́ pʋpɔzʋʋ yɔ. 8Ɛnʋ heyini-ɖʋ sɔɔlɩm mbʋ́ Fezuu Kiɖeɖeu yeba nɛ pʋwɛɛ mɩ-hɛkʋ taa yɔ pʋ-tɔm.
9Ḿbʋ́ yebina nɛ kpaɣ ɖooo kɩyakʋ ŋgʋ́ ɖɩnɩ tɔm ńdʋ́ yɔ, ɖɩwɛɛ ɖitendiɣ Ɛsɔ mɩ-yɔɔ se ɛha-mɩ e-Fezuu Kiɖeɖeu lɔŋsɩnɖɛ nɛ kɩ-lɛɣtʋ nɛ ɩtɩlɩ mbʋ́ e-liu wɛɛ yɔ camɩyɛ. 10Pʋbʋ, ɩɖɔŋ Kɩpaɣlʋ ɛsɩndaa ɛzɩ pʋmʋnaʋ yɔ nɛ pɩkɛdɩnɩ-ɩ pɩtɩŋa pɩ-taa. Peeɖe ɩlakɩ tʋma kɩbana ndɩ ndɩ nɛ ɩtɛzɩ Ɛsɔ tɩlʋʋ kpem. 11Ḿbʋ́ yekina nɛ pɩtɩŋnɩ e-ɖoŋ koboyaɣ ñɩŋ yɔɔ nɛ ɩkpa ɖoŋ siŋŋ nɛ ɩpɩzɩ ɩñaɣ pana nɛ ɩɖɔkɩ mɩ-hɔ pɩtɩŋa pɩ-taa nɛ 12ɩsa Caa nɛ laŋhʋlʋmɩyɛ. Ɛnʋ yebina se mɩ nɛ ɛ-ñɩma ɩtayɩ ñɩm mbʋ́ ɛñɔɔzaa nɛ ɛsɩɩ-wɛ ñalɩmɩyɛ taa yɔ. 13Ɛlɩzɩ-ɖʋ cɩkpɛndʋʋ ɖoŋ taa nɛ ewoni-ɖʋ ɛ-Pɩyalʋ kʋsɔɔlʋ kewiyaɣ taa. 14Ɛ́lɛ́ holini-ɖʋ nɛ ɖa-kɩwɛɛkɩm taa nɛ ekpeɣ-ɖʋ-pʋ.
Krɩstʋ weyi ɛkɛ kedeŋa kpeekpe Kɩpaɣlʋ yɔ, ɛ-samtʋ hendu
15Ɛsɔ wɛʋ yɔ, paanaɣ-ɩ, ɛlɛ́, Krɩstʋ lɛ ɛ-lɛzʋʋ.
Ɛnʋ lɛ kajalaɣ tʋ mbʋ́ pɩtɩŋa payɩ Ɛsɔ laba yɔ pɩ-taa.
16Ɛ-yɔɔ ɛ́lɛ́ tɩŋnaa nɛ ɛla pɩtɩŋa payɩ.
Ɛlabɩ mbʋ́ pʋwɛ ɛsɔdaa nɛ tataa yɔ,
mbʋ́ panaɣ yɔ nɛ mbʋ́ paanaɣ yɔ.
Ɛnʋ labɩnɩ awiya sɔsɔna nɛ cikpena nɛ ɖoŋ ndɩ ndɩ.
Ɛ-yɔɔ Ɛsɔ tɩŋnaa nɛ ɛla pɩtɩŋa payɩ nɛ ɛtɩɣyɩ-pʋ.
17Ɛɛwɛɛ nɛ pʋcɔ pɩtɩŋa payɩ pʋwɛɛ nɛ
pɩtɩŋa payɩ pʋwɛɛ pu-lona taa ɛ-yɔɔ.
18Ɛnʋ lɛ ñʋʋ nɛ e-tomnaɣ lɛ ɛ-ŋgbɛyɛ taa ñɩma.
Ɛnʋ lɛ kiɖe, ɛnʋ calɩnɩ fem nɛ sɩɖaa taa se
ɛkɛ kajalaɣ tʋ pɩtɩŋa pɩ-taa.
19Mbʋ́ pʋyɔɔ yɔ, pɩkɛdɩnɩ Ɛsɔ nɛ eyele ɛ-maɣmaɣ ɛwɛɛ ɛ-Pɩyalʋ ɛnʋ ɛ-taa pilim.
20Ɛ-yɔɔ ɖɔɖɔ Ɛsɔ tɩŋnaa nɛ eyele se
ɛ nɛ mbʋ́ pɩtɩŋa pʋwɛ tataa nɛ ɛsɔdaa yɔ, peceɣ.
Calɩm mbʋ́ ɛ-Pɩyalʋ ɛnʋ ɛkpɛdɩ kaamaŋkaɣ yɔɔ yɔ,
pʋ-yɔɔ ɛtɩŋnaa nɛ ɛla ḿbʋ́ nɛ ɛkɔnɩ laŋhɛzɩyɛ.
21Đooo lɛ, mɩ ɖɔɖɔ mɩ nɛ Ɛsɔ mɩ-hɛkʋ taa katayaa nɛ ɩkɛ e-koyindinaa mɩ-lɩmaɣza kɩdɛkɛdɛɛ nɛ mɩ-ɛzaɣ́tʋ lakasɩ pɔ-yɔɔ. 22Ɛlɛ́, lɛɛlɛɛyɔ Ɛsɔ tɩŋnɩ ɛ-Pɩyalʋ sɩm yɔɔ nɛ mɩ nɛ ɩ iceɣ se ɛpɩzɩ ewoni-mɩ ɛ-ɛsɩndaa nɛ ɩkɛ ɛ-ñɩma nɛ ɩwɛɛ cɩɖɩcɩɖɩ nɛ pataana kawanaɣ nakɛyɛ mɩ-yɔɔ. 23Yee toovenim taa ɩwɛnɩ lidaʋ ḿbʋ́ nɛ ɩkpa ɖoŋ siŋŋ nɛ itelesi mɩ-ɖaŋʋʋ yɔ, pɩlakɩ ḿbʋ́. Đaŋʋʋ ḿbʋ́, Laŋhɛzɩyɛ Tɔm ndʋ́ ɩnɩwa yɔ, tɩ-yɔɔ pɩtɩŋnaa nɛ ɩɖaŋ. Ńdʋ́ posusi kedeŋa kpeekpe yɔɔ nɛ ma Pɔɔlɩ manpɩsɩ tɩ-tʋmlaɖʋ.
Pɔɔlɩ lakɩ kʋñɔŋ nɛ ɛlʋkɩ Krɩstʋ ŋgbɛyɛ yɔɔ
24Lɛɛlɛɛyɔ, man-taa hʋlʋmɩnɩ kʋñɔŋ ŋgʋ́ mɔntɔkɩ mɩ-yɔɔ yɔ. Mbʋ́ pʋyɔɔ yɔ, mɛntɛzɩɣ tɔɔʋ kʋñɔŋ ŋgʋ́ pɩɩkazaa se Krɩstʋ ɛtɔɔ e-tomnaɣ pilinzi yɔɔ yɔ. E-tomnaɣ ŋ́gá lɛ ɛ-ŋgbɛyɛ taa ñɩma. 25Manpɩsɩ pa-tʋmlaɖʋ: Ɛsɔ ɖʋnɩ-m se malɩzɩ-mɩ ɛ-tɔm tɔbʋʋ siŋŋ. 26Đooo lɛ, tɩɩwɛ kpaɖɩŋ tɩŋa taa ɛyáa mɛsaɣ tɛɛ, ɛlɛ́ lɛɛlɛɛyɔ, ekuli tɩ-yɔɔ nɛ ɛwɩlɩ ɛ-ñɩma. 27E-liu wɛɛ se patɩlɩ ñɩm sɔsɔm mbʋ́ pʋwɛ mɛsaɣ tɛɛ nɛ posusuu pʋ-tɔm ajɛya kpeekpe taa yɔ. Ḿbʋ́ lɛ se: Krɩstʋ wɛ mɩ-cɔlɔ. Ɛnʋ yekina nɛ ɩɖaŋ se ɩkɔŋ sʋʋ Ɛsɔ koboyaɣ taa. 28Ɛ-tɔm ɖisusuu nɛ ɖɩkaŋ paa weyi ɛ-ñʋʋ taa nɛ ɖɩwɩlɩɣ-ɩ nɛ ɖɔ-lɔŋsɩnɖɛ tɩŋa. Đɩlakɩ ḿbʋ́ se pɩtɩŋnɩ ɛ nɛ Krɩstʋ pɛ-kpɛndʋʋ yɔɔ nɛ ɛpɩɩ. 29Pʋ-yɔɔ mankʋʋ man-tɩ nɛ tʋmɩyɛ nɛ e-ɖoŋ seɣtiɣ-m siŋŋ nɛ malʋkɩ.
Currently Selected:
Koloosi 1: KABI
Highlight
Share
Copy
Want to have your highlights saved across all your devices? Sign up or sign in