Tobiti 1
1
1Ndime Tobiti ntoosansulula shabuumi bwangu. Ndimwanaakwe Tobiyelo, mwanaakwe Aniwelo, mwanaakwe Aduwelo, mwanaakwe Gabayelo, mwanaakwe Lafayelo mwanaakwe Laguwelo wamucipani cabene Asiyelo mumushobo wakwe Nafutali. 2Ciindi ico Shalimanesa kaali muleli munene wacishi ca Asilya. Bakambwesa busha mundabala ine misheesu ya Tisibe iyo yakalinga kumatwa ya Galili, kumalenge lya Kadesi mu Nafutali kumbo lya kumatwa ya Aso kumatwa ya Pogo.
Tobiti mbwaakakala mubusha
3Mubuumi bwangu boonse ndakalinga kushomeka akweelesha kucita shintu shiluleme. Ndakalinga kupa maali lyoonse mukucafwa bamakwesu batakalinga kucite shimwi mubusha. Ndakalinga kucafwa abamaJuda abo bakatolwa kuNinife pantu pomwi anebo.
Ninife nindabala inene yacishi ca Asilya
4Nkacili mwanike ndakalinga kwikala kumatwa aIsilaeli. Mishobo yoonse ya muIsilaeli yakalinga kweelete kubenga milambu kuJelusalemu. Jelusalemu njendabala yakalinga inene njeyeeyo Lesa njakasala muIsilaeli kwaamba ayi kukayakilwe Ŋanda yakwe Lesa ayi ukabe ngomusena usalalite mwakukala Lesa lyoonse. Sombi mushobo wangu woonse wabene Nafutali wakaka bulelo bwaŋanda yakwe Defedi andabala ya Jelusalemu. 5Sombi bamuŋanda yangu mbuli bene Nafutali bamukowa wesu bakalinga kubenga milambu moombe wakapangwa a Golodi uyo Jeloboamu mwaami wabene Isilaleli ngwakapanga mucishi ca Dani. Bakalinga kubenga milambu kumalundu a Galili.
Lushomo lwakwe Tobiti a kulambila kwakwe
6Nebo neenka ndakalinga kuya kuJelusalemu paciindi cakusekelela pakunkokela mulawo wa beneIsilaeli boonse. Ndakalinga kucica kuya kuJelusalemu ashakutebula shintaanshi, twaana twampongo tutaanshi, shalikumi pashifubwa shangu abooya butaanshi bwambelele shangu. 7Ndakalinga kubenga calikumi pashilimwa shangu shoonse, waini, mafuta aolifi, mapomegilaneti, nkuyu ashimwi shisepo kupa bene Lefi abo bakalinga kusebensela Lesa mu Jelusalemu. Pacaaka acaaka kukushakobo cashosanwe myuunda ndiyatakalinga kulimwa, ndakalinga kuulisha calikumi cabili cashintu shangu. Maali ngondakacanaamo ndakabenga kuJelusalemu pacakulya cakusekelela.
8Ndakaya mukupa shilambu sha likumi lya otatwe kubanabanshiwa akubanakashi bamukalubinje akubeensu abo bakalinga kwikala muIsilaeli. Ndakaabanya milambu yangu pacaaka catatu cili coonse. Pakushilya shoonse isho twakalinga kukonkela mulawo wakwe Mose akwaambilisha uko Debola banyina Ananiyele mushali wesu mukulukulu ngakatushiila. Mukwiinga ciindi ico nebo bata kabali kale bafwa bakashiyabo kandi mwanaanshiwa.
Lushomo lwakwe Tobiti mubusha
9Ndindakakula ndakeeba mwanakashi liina lyakwe nguAna uyo wakalinga wamumushobo wine misheesu. Twakaba amwaana musankwa ngotwakapa liina lya Tobyasi. 10Pesule bakantola busha kucishi ca Asilya. Mboboobo mbondakesa mukwikala mundabala ya Ninife.
Kuswa nditwakekala mundabala yaNinife bamakwesu boonse abamaJudama bakalinga kulya shakulya shamushobo womwibo ashakalinga kulya bantu bakalinga kwiikala kweenka uko. 11Sombi nebo ndakakaka kucita bweenka ubo. 12Ndakacita boobo mukwiinga mukukonkela mulawo wa Mwaami Lesa Windaawo Wakwiculu. 13Lakwe Lesa wakalengesha kwaamba ayi muleli munene Shalamanesa kunoondemekesha, alimwi wakanengesha kubikwa pancito yakuula shintu shoonse shamuleli.
14Muleli munene uyo kaatana kufwa, ndakalinga kuya lyoonse kucishi ca Mediya kuya mukuula shintu nshaakalinga kusuni. Cimwi ciindi ndindakalinga mundabala ya Lagesi mucishi ca Mediya, ndakashiya masaka amaali uko amusankwa Gabayelo mukwabo Gabiliyasi, akumulwiita ayi ambikileeko. Akalinga kucite makilogilamu ainda myaanda yotatwe ya silifa. 15Ciindi Shalamanesa ndyaakafwa, mwanaakwe Senakelibu ngowakaba muleli munene. Ici ciindi nshila shoonse shakalinga kuya kuMediya bakashicala mulandu washakalinga kucitika mucishi ico. Nkokwaamba ayi nshiindakalinga kuyaako.
Tobiti mbwaakalinga kubika bafwite
16Shalamanesa ndyaakalinga muleli munene ndakalinga kulela bamaJudama kabotu ciindi coonse ndibakalinga kweelete kucafwikwa. 17Naakabafwite nsala ndakalinga kwaabanaabo shakulya. Nakabatacite shakufwala ndakalinga kubapa shaangu. Alimwi na basowela mutuntu wa mwine misheesu kusengwe ya lubumbu lwa ndabala ndakalinga kuya mukwiibika mboyeelete kubikwa.
18Bumwi bushiku Senakelibu wakashingana Lesa, Mwaami wa Kwiculu. Lesa wakamupa mulandu. Aboobo Senakelibu wakacica kuswa kuJuda. Pakuboola kuMediya wakakalala abuumbi cakwaamba ayi wakacaya bene Isilaeli baanji. Sombi nebo ndakaya cabushishi mukubwesa mituntu akwifukila. Lyalo lakwe Senakelibu ndyaakesa mukuyandoola mituntu iyo taakwe kwibona.
19Kwakalinga muntu wakaswa kuNinife wakaya mukulwiita muleli munene ayi ndime ndakafukila abo bakacaikwa. Ndindakabonabo ayi muleli munene wanshiba kwaamba ayi ndime nendakacita cintu camushobo uyu akuyeeya ayi buumi bwangu bwaba paceela cilungula, ndakaba aboowa. Lyalo ndakacica kuya mukuyuba. 20Shintu shoonse nshendakalinga kucite shakatolwa akuya mukubikwa muŋanda yakubwalo yakusungilaamo buboni. Ndakacaala abakaangu ba Ana amwanaangu Tobyasi.
Mwicwa wakwe Tobiti mbwaakamufuna
21Ndipakeenda nsondo shosanwe ayomwi banabakwe Senakelibu bobilo bakamucaya. Bamane kumucaya bakaloboka kuya mukuyuba ku tulundu twa Alalati. Esaadoni mwanaakwe umwi ngowakesa mukuba muleli munene. Esaadoni wakabika mwanaamukwesu Aika kuba munene wakulama maali mu cishi ico. Alimwi bakamubika kuba mweendeleshi washintu shoonse. 22Ici cakalinga ciindi cabili Aika kubikwa musena uyu weenka, paciindi citaanshi Senakelibu kaali muleli munene mucishi ca Asilya. Ono Aika wakaŋambililaako ku mwaami lyalo ndakaboolela kuNinife. Muciindi cakwe Senakelibu, Aika wakalinga munene wakulama waini. Alimwi wakalinga kulama kalamatila wa Keshibilo kamwaami. Wakalinga kulama shintu shoonse shacishi akubamba maali amwaami waku Asilya. Ono muciindi cakwe Asaadoni wakamupa milimo yeenka iyo. Aika wakalinga mwaana wakashalwa kumukwesu.
Currently Selected:
Tobiti 1: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.