Tushimpi 1
1
Mpindu icanwa mutushimpi
1Utu ntushimpi twakwe Solomoni mwanaakwe Defedi, mwaami wa bene Isilaeli.#1 Baami 4:32
2Twakalembelwa kwaamba ayi bantu babe basongo balilemeka
akwaamba ayi banookonsha kunyumfwisha makani abusongo.
3Tushimpi tuleeisha kwikala cabusongo,
kucita shintu shiluleme, koombolosha cakululama alimwi cakubula kasalulushi.
4Tulapa maano bantu bataaku mbobabete,
akupa bacikula bwangu lushibo lwakucita shintu sheelete.
5Tushimpi tulalengesha muntu musongo kunungawo maano
alimwi akutanjilila baabo beeite
6kwaamba ayi banyumfwishe tushimpi ashikoshanyo
alimwi akunyumfwisha myaambo atulabi twa basongo.
Kucenjesha kubacikula bwangu basankwa
7Kuloonda Mwaami Lesa ngomatalikilo a lushibo,
sombi balo baluya balanyansha busongo akukaka kulilemeka.#Jobo 28:28; Kulu 111:10; Tushimpi 9:10
8Omwanaangu, kokutika shitookufunda baiso,
akutanyansha shitokwiisha banyoko.
9Ceebo kwiisha kwabo kulaakubotesha mibo yako
bweenka cisoti mbocikubotesha kumutwi akancetani munshingo.
10Omwanaangu, na bamucita shibi bakuyungoola,
webo utabakonkeleshi napaceyi.
11Cimwi ciindi inga bakwaambila ayi, “Kosa kuno atubelaminewo muntu tumucaaye,
atuyubilile akuuma bantu nabi tabacite milandu!
12Atubamiine bweenka mbuli cuumbwe,
ee, kubamina bakabumbulu mbuli bantu baya mukufukilwa.
13Lyalo tulaakuba abuboni buunji
akususha maandeesu ashintu nsheshi tukasaale.
14Ono katiyabo soonse,
tutokwaabana nsheshi twiipe.”
15Omwanaangu, kutasumina kweenda abantu ba mushobo uyo.
Kuteelesha nabi paniini kukonkela nshila shabo
16ceebo balo tabacelwi kucita shintu shibiibi.
Ncakwiila mbantu bafwambaana kutila bulowa.
17Mbukaluyaluya kuteya koose
bayuni mbootooyanda kucaya kabakubwene.
18Bantu aba balayubilila bulowa bwabo beene,
ndushinisho balaliteyabo toose beene.
19Aya ngomeelelesho a bantu boonse bakakatila kubilila mubwiipi.
Ee, buboni bwa mushobo uyo bulakwempula buumi bwa babulangoola.
Kucenjesha kwa busongo
20Busongo butokwiita mumikwakwa.
Butokoolobesha mumisena icanika bantu baanji.
21Butokoolobesha pamampambaanwa a mikwakwa
alimwi apaminjililo ya ndabala.#Tushimpi 8:1-3
22Butokwaamba ayi, “Ino mwebo nobaluya, anu mulaakucileka lili kwikala mubuluya bwanu?
Anu mwebo nobeshikucelebula mulaakucileka lili kusangalalila mukucelebula kwanu?
Anu nobaluya mulaakucileka lili kusuula lushibo?
23Nimwakanyumfwila kukalooka kwangu,
naakwiinga ndamwaambila shili mumoyo wangu
alimwi akumulwiita nsheentooyeeya.
24Ndindakamwiita mwakankakila.
Taaku muntu nabi womwi wakanyumfwila ndindakamulabula.
25Mwakasuula shoonse nshendakamufunda
akukaka kunyumfwa kukalooka kwangu.
26Paceebo ceeco anebo ndaakumuseka mwaakuba mumapensho
akumuwela mwakupolelwa shilensha boowa.
27Nkokwaamba ayi shilensha boowa shaakumupolela anga ncipuupu,
ee, mapensho aakumupyanga anga nkapupuulwa,
ncakwiila mwaakulimbwa mapensho amakatasho.
28“Mwaakunjita ciindi ico teshi nkamukumbulewo.
Mulaakunyandoola, sombi teshi mukambonewo.
29Mwakalinga kusuula lushibo lyoonse
alimwi akukaka kuloonda Mwaami Lesa.
30Mwakasuula shoonse nshendakamufunda
akukaka kunyumfwila kukalooka kwangu.
31Paceebo ceeco mulaakulya shisepo sha milimo yanu
akukuta shisepo sha micito yanu.
32Bantu batacite maano balafwa ceebo cakusuula busongo.
Baluya balanyonyoolwa ceebo cakulishoma beene.
33Sombi abo boonse banyumfwila ndime, balekala kwakubula cakulisukama.
Balekala muluumuno kwakubula cakuloonda nabi comwi.”
Currently Selected:
Tushimpi 1: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.