Bene Filipi 1
1
1Ndime Paulo alimwi aTimoti basebenshi bakwe Klistu Jesu. Tutoolembela ndimwe noonse nobantu bakwe Lesa muli Klistu Jesu nomuli muFilipi, pantu pomwi abamatanjilili ba coonde abacafwi.#Mili 16:12 2Luse aluumuno shibe amwebo kuswa kuli Lesa Ishiwesu aMwaami Jesu Klistu.
Paulo mbwaakapailila coonde ca kuFilipi
3Ndalumba Lesa wangu lyoonse ndyeemuyeeya. 4Mumipailo yangu yoonse njeemupaililaako, ndalumba Lesa akusangalala 5mukwiinga wa lubasu ulu ndomucite mukushimikila Makani Abotu, kuswa bushiku mbomwakaatambula kushikila asunu. 6Ndishinishite kwaamba ayi Lesa wakatalika ncito ibotu muli ndimwe ulaakutolelela akwiimanishisha paBushiku ubo aakuboola Klistu Jesu. 7Ndamuyeeya lyoonse mukwiinga ndimusuni alimwi cililuleme kuli ndime kunyumfwa boobo. Ndyeembete muntolongo nabi ciindi cakwiimikanina akuyumya Makani Abotu mumyoyo ya bantu boonse, noonse mulaba andime muluse lwakwe Lesa. 8Lesa inga wambeta bukamboni kwaamba ayi ndamuyeeya abuumbi mukwiinga ndimusuni amoyo wangu woonse alusuno luli mbuli lwakwe Klistu Jesu mwiine.
9Ndapaila ayi mukomene mulusuno, lushibo lwancinencine alimwi akunyumfwishisha kwanu kwa shintu shoonse, 10kwaamba ayi mukakonshe kusala bwikaalo bwiindaawo kubota. Lyalo mulaakwaanguluka kuswa kububi boonse akutumpenda paBushiku ubo aakuboola Klistu. 11Buumi bwanu bulaakutondesha micito ya bululami, iyo iswabo kuli Jesu Klistu, kwaamba ayi boonse balemeke akulumbaisha Lesa.
Buumi kuli ndime nguKlistu
12Nobamakwesu, ntooyanda kumwishibisha ayi shakacitika kuli ndime shacafwilisha abuumbi kwaamba ayi Makani Abotu anyumfwike kubantu baanji. 13Aboobo balishi boonse beshikulindilila ŋanda ya muleli wa kuLoma abamwibo boonse bali kokuno kwaamba ayi ndyaangitwe ceebo cakwe Klistu.#Mili 28:30 14Peculu lya waawo kwaangwa kwangu kwalengesha ayi bamakwesu baanji muli Klistu babe ankusu shakushimikila maswi akwe Lesa cakutaboola pesule akubula boowa.
15Ncakwiila nkobali bamwi bashimikila pali Klistu mukwiinga wa munyono akusuna kupikishanya, sombi nkobali bamwi bashimikila amoyo woonse. 16Aba balashimikila calusuno mukwiinga balishi ayi Lesa wakampa ncito yakwiimikanina Makani Abotu. 17Ono bamwi abo tabashimikili pali Klistu calushinisho mukwiinga balilisuni beene. Aboobo balisuni kunjilikilawo mapensho ndyeencili muntolongo.
18Tacicite mulandu! Cintu cinene ncakwaamba ayi mububeshi nabi mulushinisho Jesu Klistu utooshimikilwa. Paceebo ceeco ndisangalete. Ee, ndanoosangaletebo lyoonse 19mukwiinga ndishi ayi kwiinda mumipailo yanu alucafwo lwa Mushimu wakwe Jesu Klistu, ndaakwaangululwa. 20Ntoolangila amoyo woonse kwaamba ayi kutakabi nabi comwi ceshi cikanenshe nsoni. Aboobo ntooyandishisha kwaamba ayi mbe ankusu sheelete bulya, mbuli lyoonse ayi Klistu alemekwe muli ndime, mubuumi nabi mulufu. 21Buumi kuli ndime nguKlistu alimwi alwalo lufu nimpindu. 22Na kubukila buumi kulampa ciindi cakusebensa ncito itondesha shisepo, anu nceenga ndasalaawo nshicishi. 23Ndacata mambili. Cintu nceensuni bunene nkuswaawo pacishi cino ca panshi akuya mukwikala aKlistu mukwiinga ncecintu ciindaawo kubota. 24Nakubi boobo muceebo ca ndimwe, cilyeelete kwaamba ayi noocili muumi. 25Apa nshintootonsha, ndicishi kwaamba ayi ndanoocili muumi akwikala andimwe noonse kwaamba ayi lushomo lwanu lukomene akumusangalasha. 26Aboobo ndaakuba amwebo alimwi, kusangalala kwanu muli Klistu Jesu kulaakwiindaawo ceebo ca ndime.
27Ono cinene ncakwaamba ayi bwikaalo bwanu bulyeelete kweendelana aMakani Abotu ayo aamba shakwe Klistu. Nabi ndesa mukumubona nabi ndabuula kwisa, ndyeelete kunyumfwa ayi mulimfwibo cakutatenkaana camuyeeyo womwi alimwi ayi mulacafwana kwiimikanina lushomo ndomucite muMakani Abotu. 28Mutaloondi balwani banu, sombi amuyume cakubula boowa. Aboobo cilaakutondesha kwaamba ayi balaakunyonyoolwa, sombi mwebo Lesa ulaakumupulusha. 29Mwebo mwakapekwa coolwe cakusebensela Klistu, kuteshi kushomabo muli nguwe, sombi amukumupengela. 30Aboobo amwebo mutoolwana nkondo iyo yeenka njemwakabona kaandwana alimwi njeencilwana abobulya kweelana ambomutoonyumfwa.#Mili 16:19-40
Currently Selected:
Bene Filipi 1: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.