Bene Lefi 1
1
Milambu yakutenta yakabumbulu
1Mwaami Lesa wakeeta Mose kuswa muTente ya Cipangano akwaamba ayi, 2“Lwiita bene Isilaeli ayi na umwi muntu wabenga mulambu, ulyeelete kuba mulambu wakaswa mulitanga lya ŋombe, mbelele nabi mpongo shakwe.
3“Na utoobenga mulambu wakutenta kuswa mulitanga lya ŋombe shakwe, ulyeelete kuleta mucende utacite kampenda kali koonse. Ulyeelete kumuleta pamulyango wa Tente ya Cipangano kwaamba ayi nebo neMwaami Lesa nkootambule. 4Ulyeelete kubika lyaansa pamutwi wakwe, lyalo ulaakutambulwa ayi ngumulambu wakukusha shibiibi shakwe. 5Lyalo ulaakucaya mucende uyo apo kunembo lyangu neMwaami Lesa. Mpeeke bana bakwe Aloni bapailishi balaakusanseela bulowa mumbasu shoonse shone sha cipaililo cili pamulyango wa Tente. 6Ndyeshi akamufuunde akumutimboola. 7Lyalo baana basankwa bakwe Aloni mupailishi balaakubika nkuni pacipaililo akunyasha mulilo. 8Mpomunyaawo balaakubika shipansha sha munyama uyo pamulilo kubikaawo amutwi alimwi amafuta. 9Muntu uyo ulyeelete kusansha shamukati shoonse alimwi amyeendo mumaanshi. Mpeeke mupailishi ulaakutenta mulambu woonse pacipaililo ayi ngumulambu wakutenta. Bweema bwa mulambu uyo bulansangalasha neMwaami Lesa.
10“Na muntu utoobenga mulambu kuswa mulitanga lya mbelele nabi mpongo shakwe, ulyeelete kubenga isankwa itacite kampenda kali koonse. 11Ulyeelete kwiicaila kumatwa lya cipaililo kunembo lya Mwaami Lesa. Mpeeke bapailishi balaakusanseela bulowa bwa njiyo kumbasu shoonse shone sha cipaililo. 12Ono muntu uyo ulyeelete kwiitimboola. Lyalo mupailishi ulaakubika shipansha shoonse pamulilo kubikaawo amutwi alimwi amafuta. 13Ulyeelete kusansha shamukati shoonse alimwi amyeendo mumaanshi. Mpeeke mupailishi ulaakutenta mulambu woonse pacipaililo ayi ngumulambu wakutenta. Bweema bwa mulambu uyo bulansangalasha neMwaami Lesa.
14“Na muntu utoobenga muyuni ayi ngumulambu wakutenta, ulyeelete kuba mpolobe nabi nkulimba. 15Mpeeke mupailishi ulaakwiileta kucipaililo, akeeshongonone nshingo akutenta mutwi wa njiyo pacipaililo. Bulowa bwa njiyo bukatililwe kulubasu lwa cipaililo. 16Muntu uyo ulyeelete kukusha cifuntwa ashamukati sha ncico, akushisowa kwicwe lya cipaililo uko kupukwitwa milota. 17Kuswawaawo, ulaakwiicata kumapapaminwa akwiikwamuna ayi ipabuke kwakutatumuna mapapaminwa. Mpeeke mupailishi ulaakwiitenta pacipaililo yoonse ayi ngumulambu wakutenta. Bweema bwa mulambu uyu bulansangalasha neMwaami Lesa.
Currently Selected:
Bene Lefi 1: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.