Isaya 1
1
1Mulibuku ili mulilembetwe makani aamba pacishi ca Juda alimwi andabala ya Jelusalemu kweelana aLesa mbwaakayubulwita Isaya mwanaakwe Amosi. Wakayubulwitwa mubulelo bwakwe Usiya, Jotamu, Aasi alimwi abwakwe Esekiya, bamaami ba cishi ca Juda.#2 Baami 15:1-7; 2 Maka 26:1-23; 2 Baami 15:32-38; 2 Maka 27:1-9; 2 Baami 16:1-20; 2 Maka 28:1-27; 2 Baami 18:1—20:21; 2 Maka 29:1—32:33
Lesa mbwaakakalalila bantu bakwe
2Mwaami Lesa wakaamba ayi,
“Webo oliculu awebo ocishi ca panshi, amukutike munyumfwe nceentokwaamba.
Bana bangu abo mbondakalela akukusha bangalookila.
3Amubone ŋombe ilishi mwineyo
ayalo mbongolo ilishi wiisanina.
Sombi bantu bangu bene Isilaeli tabenshiiwo,
ncakwiila bantu bangu tabanyumfwi.”
4Ono mapensho kuli ndiwe omushobo ushipite,
ee, kuli ndiwe omushobo olemenetwe milandu,
webo omushobo wa bamucita shibi.
Wakakaka Mwaami Lesa,
ncakwiila wakafutatila Usalalite wa bene Isilaeli.
5Ceebonshi ucisunibo kunokuumwa?
Ino nceebonshi ncoocitolelelabo bwaashu?
Bona kumutwi wako kuliswite kale shiloonda
awalo moyo wako ulicisitwe kale.
6Ncakwiila kuswabo kumutwi kushikila akushimpanta,
taaku nabi pomwi pali kabotu.
Mubili woonse uliswitebo shuumo ashiloonda shiceneme.
Tashisanshitweewo, tashipombeletwewo shisani
nabi kunanikwabo mafuta ayi shibombele.
7Ono cishi cako cacaalabo matongo
aalo mandabala ako anene atentekwa tibili apanshi peene.
Baswamashi basaala myuunda yako
akunyonyoola shintu shoonse kooebela.
8Ndabala ya Siyoni yacaalabo yeenka
anga nkatungu pakati ka muunda wa minyansa,
nabi anga nkaanda kali mumuunda wabanamunwa.
Ncakwiila yacaalabo anga nindabala ishingulukitwe abashilumamba.
9Mwaami Lesa naatakwe kuleka bantu bamwi ayi bapuluke,
naakwiinga Jelusalemu cino ciindi ulinyonyookete cakumaninina
bweenka mbuli Sodoma aGomola.#Mata 19:24; Loma 9:29
10Nobene Jelusalemu, amukutike shitokwaamba Mwaami Lesa.
Amukutike mwebo nobaleli nomuli anga mbaleli bene Sodoma aGomola,
ee, nobantu nomuli anga mbene Sodoma aGomola.
11Mwaami Lesa waamba ayi,
“Anu mutooyeeya ayi milwi milwi ya milambu njemupa nciinshi kuli ndime?
Milambu yakutenta yancima,
ee, milambu ya mbelele shisankwa aya mafuta a shifubwa shakeenishikwa yancima.
Bulowa bwa bacende, mbelele alimwi abwa mpongo bwacileka kunsangalasha.
12Anu ngani wakamulwiita ayi pakwisa mukunambila mulyeelete kuleta shintu shoonse ishi?
Ngani umwaambila ayi kamulyatoola bobulya lubansa lwa Ŋanda yangu?
13Amucileeke kuleta milambu yanu itacite ncito!
Atwalo tununkila kabotu twanu tulamfundoosha kumoyo.
Kusekelela kwanu kwa bushiku butaanshi bwa mweenshi, inshiku shanu shakookesha sha Cibelu
alimwi akubungana kumwi koonse, nshishisuni.
Shoonse shabica ceebo ca shibiibi shanu.
14Ncakwiila kusekelela kwanu kwa bushiku butaanshi bwa mweenshi
anshiiku shanu shimwi shisalalite ndishipatite.
Shoonse shababo anga cintu cilemu ncindalemenwa kunyamuna.#Amo 5:21-22
15“Mwaakunyamuna maansaanu pakupaila,
teshi nkamulangilisheewo, sobwe.
Teshi nkanyumfwe nabi mukapaile mankanda aanji buyani
mukwiinga maansaanu aliswitebo milandu yakutila bulowa.
16Amulisaanshe mutube.
Amucileeke kucita bubi boonse ubu mboomubona kamucita.
Ee, amucileeke kucita shitaluleme.
17Amutalike kucita shibotu.
Amusune kucita shiluleme.
Ee, amuyumye balyatililwa.
Kamufuninina batacite bamashali
akwiimikanina bamukalubinje.”
18Mwaami Lesa waamba ayi,
“Kamwisa ono twikale panshi.
Nabi shibiibi shanu shilasalala anga mbulowa,
shilaakuboolabo tuu anga ninkobokobo.
Ncakwiila nabi shilibo pyupyupyu anga ngumuswa malowa,
shilaakuboolabo tuu anga mbutonje.
19Na kamulibambite kunyumfwila,
mulaakulya shintu shibotu sha mucishi cino.
20Sombi na kamukaka akungalookila,
inkondo ilaakumulobya.
Nebo neMwaami Lesa ndaamba.”
Ndabala ya shibiibi
21Amubone bamundabala inene abo bakalinga kushomeka
ono batalika bufuule bwakulambila balesa bamwi.
Muciindi cimwi ndabala iyi yakalinga kuswitebo bantu bakalinga kucita shiluleme,
ee, bantu batacite tumpenda.
Ono mwacaalabo bacayi.
22OJelusalemu, kataanshi wakalingabo anga ngusilifa,
sombi bulya taaku mboobete.
Wakalinga anga nguwaini ubotu,
sombi bulya wasamuka.
23Batanjilili bako mbaashu alimwi baleendelana abeepi.
Ncakwiila mbantu basunishi makulo akutambula shipo.
Tabeemikaniniwo banabanshiwa munkuta
nabi kukutika na bamukalubinje banakashi baleta makani kuli mbabo.
24Ono kutika bwaamba Mwaami Lesa Shinkusu shoonse,
Lesa wa bene Isilaeli ucite nkusu.
Waamba ayi, “Ndaakuboosha cishole pali ndiwe omulwani wangu,
lyalo teshi ukampensheewo tubili.
25Ndaakukulwana alyaansa lyangu
alimwi ndaakukusha bubi boonse buli pakati kako
bweenka busalashikwa golodi mumulilo.
Lyalo ulaakucaalabo kwakubula kabala.
26Ndaakukupa boomboloshi alimwi bweenka mbuli kukataanshi,
alimwi ndaakukupa beshikupanda maano bweenka mbuli kukale kale.
Kuswawaawo ulaakwiitwa ayi Ndabala ya Bululami,
ee, Ndabala Ishomeka.”
27Mwaami Lesa ulaakulubula Siyoni ceebo ca bululami bwakwe.
Ulaakulekelela baabo basanduka kuswa kushibiibi shabo.
28Sombi ulaakulyatoola boonse bamucita shibi bamwaalookila.
Ncakwiila ulaakucaya boonse bamufutatila.
29Cilaakukulensha nsoni kwaamba ayi wakalinga kulambila shisamu
alimwi aceebo cakusala myuunda yakulambililamo balesa bamwi.
30Ulaakuyuma anga ngumubanga utooya cifwa
nabi anga ngumuunda utatililwa.
31Ono bweenka kalilo kaniini mbokatenta bwiisu buyumu,
mbweeke ubo beshinkusu mbweshi bakanyonyoolwe kububi bwabo.
Ndushinisho taaku weshi akakonshe kumanisha kunyonyooka kwabo.
Currently Selected:
Isaya 1: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.