Baluku 1
1
Milandu yabaJuda akwaana kwabo
1Libuku ili wakalilemba nguBaluku mwanaakwe Neliya, mwanaakwe Maseya, mwanaakwe Sedekiya, mwanaakwe Asadiya, mwanaakwe Ilikiya ili libuku wakalilembela mundabala ya Babiloni, 2mucaaka ca sanu bushiku bwasanu ashobilo bwa mweenshi, ciindi bene Babiloni bakeekoma ndabala yaJelusalemu akwitenta.
3Baluku wakabelenga maswi amulibuku ili pameenso akwe Jekoniya mwanaakwe Jeoiyakimu mwaami wabaJuda apameenso abantu boonse abo bakalinga besa mukunyumfwa shamuli buku ili. 4Wakababelenga pameenso pamuleli bamukowa wamwaami, bacinenenene abantu bashibikitwe alimwi abantubo kubikaawo ababo bekala mundabala ya Babiloni, pafwaafwi amulonga waSudi. 5Ndibakanyumfwa maswi ayo, bantu abo bakalila, akulikasha kulya, alimwi bakapaila kuMwaami Lesa. 6Bakaleta maali akwabika pantu pomwi, womwi bweenka mbwaakonsha, 7akwa tumisha kuJelusalemu kuli Jowakimu mupailishi munene, mwanaakwe Ilikiya, mwanaakwe Salumu, akubapailishi alimwi akubantu boonse mbobakalingaabo kuJelusalemu. 8Ciindi ceenka ico pabushiku bwalikumi lya mweenshi wa Sifani, Baluku wakanyamuna shisebensesho shaku Ŋanda ya Mwaami Lesa, isho shakakushikwa ku Ŋanda yakwe Lesa, kwaamba ayi shiboolele kucishi cabaJuda. Isho shakalinga sha silifa isho shakapangwa aSedekiya, mwanaakwe Josiya, mwaami wabene Juda. 9Ciindi ico Nebukadinesa mwaami wa Babiloni, ndyaakaleta Jokiniya kuswa kuJelusalemu, pantu pomwi abacinenenene bamuŋanda yakwe, abantu bakacatwa kuswa munkondo, baleli abantubo. Boonse abo bakabatola kuya ku Babiloni.
Basha mbobakalemba nkalata kuJelusalemu
10Bantu aba bakalinga basha bakaamba ayi, “Tutoomutumina maali akwaamba ayi muule nyama shakutula milambu yakutenta ashakulekelelwa milandu. Amwi muule tununkila kabotu twiitwa ayi lubani. Mubambe pacipaililo witi akushitola apo peenka pacipaililo caMwaami Lesa wesu. 11Mupailile Nebukadinesa, mwaami waku Babiloni alimwi aBelisasala mwanaakwe, kwaamba ayi nshiku shabo paanshi pano shifule mbuli shabantu bakwiculu. 12Aboobo Mwaami Lesa ulatupa nkusu akutumunikila nshila. Alimwi Nebukadinesa mwaami waku Babiloni aBelisasala mwanaakwe, bakatucinjilishe. Tulabasebensela paciindi cilaamfu alimwi balaakutubeta nkumbu. 13Aswebo mutupailileko kuMwaami Lesa wesu, ceeco twakamubishisha. Alimwi kushikila sunu bulya, Mwaami Lesa taana kucileka kutukalalila akubikila bukali.
14“Twamusenga amulibelenge libuku ulyo ndyeetwamutumina, alimwi amwaane milandu yanu muNanda ya Mwaami Lesa panshiku shakukondwa sha matente anshiku shimwi shakulambila.”
Bene Isilaeli mbobakaana milandu yabo
15Nshemweelete kuya mukwaamba nsheeshi, “OMwaami Lesa, wesu, nomululeme. Swebo sunu nsoni shatucata. Shatucata soonse sobantu bamuJuda, sotwakashalilwa kuJelusalemu. 16Shacata bamaamibesu baleli, bapailishi, balaluki, abashalibesu. 17Shoonse ishi shacitika bobulya ceebo soonse twabishisha Mwaami Lesa, 18alimwi tatuna kumunyumfwila. Tatuna kunyumfwila Mwaami Lesa wesu, tatukwe kukonkela milawo iyo Lakwe njakatupa. 19Kuswa pabushiku Mwaami Lesa ndyaakakusha bashalibesu mucishi caIjipiti kushikila asunu lyeenka, tatuna kunyumfwila Mwaami Lesa wesu alimwi tatukwe kulama maswi akwe. 20Paceebo ceeco kushikila sunu mapesho akushinganwa kulicitekobo kutupolela, bweenka mbuli mbwakaamba. Mwaami Lesa kwiinda muli Mose musebenshi wakwe, pabushiku ubo bweenka ndibakakusha bamashalibesu kuIjipiti, kwaamba ayi batupe cishi cabuci. 21Ncakwiila, twakakaka kukonkela maswi aMwaami Lesa wesu, uyo wakaamba kwiinda mubalaluki abo mbwaakatuma kuli ndiswe. 22Sombi uli woonse ulaakonkela shiyanda moyo wakwe shiibi, pakusebensela tulesa tumwi, akucita shibiibi pameenso aMwaami Lesa wesu.
Currently Selected:
Baluku 1: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.