2 Makani 1
1
Mwaami Solomoni mbwaakasenga Lesa kumupa busongo
(1 Baami 3:1-15)
1Mpeeke Solomoni mwanaakwe Defedi wakayumya bwaami bwakwe ceebo Mwaami Lesa, Lesa wakwe wakalingaakwe alimwi wakamusumpula abuumbi.
2Lyalo mwaami Solomoni wakapa mulawo kubamatanjilili ba bashilumamba bali cuulu aba bali mwaanda, boomboloshi, bamatanjilili boonse ba bamumaanda a bene Isilaeli pantu pomwi abene Isilaeli bamwi boonse. 3Wakabaambila ayi bayaakwe kumusena wakulambililaako kuGibyoni ceebo Tente ya Cipangano iyo Mose njaakapanga muluyanga nkoyakalinga kubete. 4Sombi Libokoshi lya Cipangano lyakalinga muJelusalemu, umo mwaami Defedi mwaakaliyakila tente ayi linookalaamo ndyaakalileta kuswa kuKilyati Jeyalimu.#2 Samwe 6:1-17; 1 Maka 13:5-14; 15:25—16:1 5Calo cipaililo ca bulonse ico cakayaka Besalelo mwanaakwe Uli mwishikulu wakwe Ulu, cakalinga muGibyoni kunembo lya Tente ya Cipangano. Mwaami Solomoni abantu boonse nkobakaya mukulambila Mwaami Lesa uko.#Kulo 38:1-7 6Mwaami Solomoni wakaya kucipaililo ca bulonse akulambila Mwaami Lesa kwiinda mukubenga milambu yakutenta ili cuulu pali ncico kuTente ya Cipangano.
7Mashiku ayo Lesa wakaboneka kuli Solomoni akumwiipusha ayi, “Nciinshi ncoosuni ayi nkupe?”
8Alakwe Solomoni wakakumbula ayi, “Mwebo lyoonsebo mwakalinga kutondesha lusuno kuli bata baDefedi akunengesha kupyana bwaami bwabo. 9Ono noBaami baLesa, baLesa bangu, amucite kweelana ambomwakashomesha bata. Mwanengesha kuba mwaami wa bantu aba baanji anga ngumuseese.#Mata 13:16; 28:14 10Anu amumpe busongo alushibo ayi nkonshe kulela bantu aba. Kwabula boobo inga ndakonsha buyani kulela mushobo wa bantu banu uyu unene bobulya?”
11Lesa wakakumbula Solomoni ayi, “Webo wasala cintu cibotu abuumbi. Tookwe kusenga buboni, bubile nabi bulemu alimwi tookwe kusenga kufwa kwa balwani bako nabi buumi bulaamfu. Sombi wasenga busongo alushibo ayi ukonshe kulela bantu bangu abo mbondakakulengesha kwaamba ayi ube mwaami wabo. 12Paceebo ceeco ntookupa busongo alushibo. Peculu lya sheesho ndaakukupa buboni, bubile alimwi abulemu isho shitakwe kubawo kale amwaami wakalingaako webo kootana kuba mwaami nabi umwi weshi akese.”
Nkusu abuboni bwakwe Solomoni
(1 Baami 10:26-29)
13Lyalo Solomoni wakanyamuka kuswa kumusena wakulambililaako kuGibyoni uko kwakalinga Tente ya Cipangano akuboolela kuJelusalemu. Kundabala iyo nkwaakalinga kulelela cishi ca bene Isilaeli. 14Solomoni wakalinga kucite shikoci sha nkondo shili 1,400 amaaki a nkondo ali 12,000. Shimwi pasheeshi wakalinga kushisungila mundabala inene ya Jelusalemu, shimwi wakalinga kushisungila mumandabala amwi.#1 Baami 4:26 15Paciindi ndyaakalinga kulela, silifa teyakalinga kulangoolwa mundabala inene ya Jelusalemu. Yakalingabo pali poonse mbuli mabwe. Ashalo shisamu sha sida shakalingabo mbwee bweenka mbuli mikuyu. 16Bashimakwebo bakwe Solomoni bakalinga kuula maaki kuIjipiti akuKuwe.#Duto 17:16 17Shikoci bakalinga kushuula kuIjipiti pamweelo wa maali a silifa ali 600, liaki pamweelo wa maali a silifa ali 150. Mpeeke bakalinga kuulisha shikoci amaaki kubamaami bene Iti abene Silya.
Currently Selected:
2 Makani 1: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.