Zaŋ 5
5
Yezu a ndalada ndaw ana daha ma mbara vaw aha
1A dəba na na, da har ma magurlam ma Zuif hay na, Yezu me tsəley a Zeruzalem. 2Arka da Zeruzalem ana na, ka slam ma mey zleɗ ana daha, a zəlamar mambaw ma təɓaŋ hay na, mey yam ana daha ta mey Ebrew a zəlamar na Betəzata. Sek begəney hay kava zlam. 3Ndaw dzedzey ana hay ma kusaya da huɗa: ndaw wulaf ana hay, ndaw vədal ana hay, ta ndaw ma mbara vaw ana hay. [4#5.4 Ma dəvey ma lamba bəzana 3 ana na, ta lamba bəzana (4) ana na taya neney hay na ma winda-hiya da ɗeriwel gur ma na hay tikay ] 5Ndaw ana daha ka slam ana, ma təra ha ka key mevey kokurow makar kava tsakar. 6Andza Yezu ma nəkada ma na ha na, ma sərada ba ma ndza ha zla ekəɗey kakay na, ma ləvar: «Ka wuɗey kah ka ndeley ɗaw?» 7Ndaw ana ma təra na ma mbəɗar kava: «Bay’ərlam a ɗaw, ndaw ma dzənaya ma kəladaya a yam ana dakay, da har andza yam a ɓəley aha na, da har andza i ka daw a huɗa na, ndaw mekelehe ka hərɗafaya tsoy ka mey.» 8Yezu ma ləvar: «Lətsey, zəga tek me ney ɗek, na heley.» 9Arka tsana ndaw ana me ndeley, ma zəga tek me ney ŋga na, me heley. Azlakwa pas ana ŋga na tok na, pas ma mesley. 10Arka Zuif hay ma ləvamar a ndaw a hana me ndeley ana: «Teseɗey na pas ma mesley sana, ka slafa ma zəga tek me ney ɗek kakay.» 11Ama ŋga ma mbəɗatar kava: «Ndaw ana ma ndaladaya na na, ma ləvaya: ‹zəga tek me ney ɗek na, heley›, na ŋga.» 12Taya ma tsəhafama: «Ndaw ana ma ləvaka: ‹zəga tek me ney ɗek na heley ana na way?›» 13Ama ndaw ana hana na ma ndaladama na na, a sərada ndaw ana sakay. Hərway Yezu ka daw ba dəreŋ ta slam ana hana na, ndaw hay ma kusa hiya kava na. 14A dəba na, andza Yezu ma ndzafa da 'Ay me key Kuley na, ma ləvar: «Ekəɗey na vaw ɗek salaŋ salaŋ ka dəba, ka da ŋgəsey sazlay zləna, a da kaka na a fəna satsa.» 15Ndaw ana ma daw ma təkəradatara a Zuif hay waya azlakwa ma ndaladaya na Yezu. 16Zla ta pas ana ŋga na na, Zuif hay ma səpama Yezu, andza ndaw dugwan ata ha, hərway a ka tek ana na ta pas ma mesley. 17Ama Yezu ma mbəɗatar kava: «Kasl ekəɗey na, Baba ɗaw a key aha mber, yah ana tiyatsa na i key aha mber.» 18Zla da na ŋga na na Zuif hay ma səpama a fəna sa ma da zəɗadara ’ar ba, hərway ma mey na, ŋga ma ŋgəsada mesley dada tsa kakay, ama satsa na ŋga ma zəla «Bay ma Bəla na andza Baba ŋga ɗerre», kəɗey na, a kada vaw ŋga na, kal kal andza Bay ma Bəla na.
Gədaŋ ma Bəzey
19Yezu ma zlar me tsey guma, ma ləvatar: «Dərka dərka na i ləvakwar, Bəzey a slafa me key tek ma 'ar aŋga na kakay, ama a key na, na ŋga ma nəkadərawa Baba me key ana; hərway tek ma Baba me key ana na, Bəzey a ka na kal kal andza ha tiyatsa. 20Hərway Baba na a wuɗa Bəzey, a ɓadara tek aŋga me key ana hay tabiyaha. A da ɓadara tek na ɗuhwa na hay, ha a fəna neney hay sa, aza a da rəzlakwar. 21Akwa andza ma Baba ma lətsadatərawa ndaw ma mətsa na hay, ma vəlatar mesəfrey ana na, Bəzey a slafa ma vəlar mesəfrey a ndaw ŋga me wuɗey ana tiyatsa. 22Baba na, a key sariya ka ndaw tikay, ŋga ma vəladara sariya tabiyaha a har ma Bəzey ana, 23ma aza ndaw hay tabiyaha ka hasəkadəmara bəzay a Bəzey, andza na ma hasəkadəmara bəzay a Baba na. Ndaw ana ka hasəkadara bəzay a Bəzey kakay na, ka hasəkadara bəzay a Baba, ma sləradərawa na kakay tiyatsa. 24Dərka dərka na i ləvakwar, ndaw ana me pey sləmay ka guma ɗaw, me pey 'ar ka Ndaw ma sləradiyawa na na, a da ndzefey mendzey me ndəvey kakay ana; ŋga na a daw ka slam ma sariya tikay, hərway ŋga na, ka tesey ba da memətsey a mendzey ma ndəvey akay ana. 25Dərka dərka na, i ləvakwar: har ana a sawa ha, ekəɗey ana na, ŋga kəɗey, andza ndaw ma mətsa na hay, a da tsənadama vəɗe ma ɗay ma Bəzey ma Bay ma Bəla, ndaw ma tsənadama na hay na, a da səfram. 26Hərway andza ma Baba ŋga bay 'ar ma mesəfrey aha na na, kəɗey na, ma vəladara a Bəzey ka key bay 'ar ma mesəfrey aha tiyatsa. 27Ŋga ka vəladara maram ba ma kada sariya, kavəday ŋga Bəzey ma Ndaw. 28Tek a neney hay tabiyaha na, ka rəzlakwar sazlay. Har ana a sawa ha, ndaw ma na hiya da tsəvay ana hay na, a da tsənadama vəɗe ma ɗay ŋga, 29arka ndaw ma kəmaɓa tek hayna hay a da bəmawa, ma da mbəlawa, ma da daway a mendzey, ndaw ma kəmaɓa tek haya kakay ana hay a da mbələmawa, ma da daway a sariya. 30Yah na, i slafa me key tek ma gədaŋ ma vaw ɗaw ana kakay, i key sariya na, andza na i ma tsənada na, sariya ɗaw ana na, dzerey aha, ka vəday i səpey na, tek a ɗaw ana i me wuɗey ana kakay, amana, andza na ma Ndaw ma sləradiyawa na.
Sedewe hay
31Haɗaw i ka key seydewe ma vaw ɗaw ana na, seydewe na a da vəɗey aha kakay. 32Me key seydewe ɗaw na, ndaw mekelehe, i sərada seydewe ŋga na ma kaya na a dam ka vaw ta dərka. 33Kuray ma sləram ndaw hay ka slam ma Zaŋ, ŋga ka kawa seydewe ma dərka na ba. 34Yah na, i ka wuɗey ndaw ka kaya seydewe ɗaw tikay, ama i tsey andza ha na, ma ka da buwumakwar. 35Zaŋ na, andza lalam ma kam waw kava me wuɗey ana, ka dakwar 'ar ba ma kada wuiya ta waw aŋga na da mendzey nekəɗey. 36Ama yah na, seydewe ɗaw na ɗuhwa ha, a fəna ma Zaŋ: mber na Baba ma vəladatiywa, ma ndasladata na hay, i kata na, ma ka təram seydewe ɗaw, ma ɓada Baba ma sləradiyawa na. 37Baba na ta 'ar aŋga na ma sləradiyawa na na, ka key seydewe ɗaw ba. Amana kwa kuray ka wuɗam ma pafama sləmay ka vəɗe ma ɗay ŋga kakay, kwa ha səpam ma nəkada tek aŋga ma ɓada na kakay. 38Arka guma ŋga ma ndza ha da vaw kwar dakay, zləna kavəday, ka pam aha 'ar ka ndaw ŋga ma sləradərawa na kakay. 39Ka ndərəkam 'ar ma zezərey Mewindey Kokwoɗ ana hay ka kuray na ka lam, la da ndzafadama mendzey me ndəvey kakay ana, me key seydewe ɗaw na taya. 40Ka wuɗam ma səmawa ka tsakay ɗaw, ma da ndzefey mendzey me ndəvey kakay ana, kakay. 41Maram a ɗaw na, i ndzafa na da ndaw hay kakay. 42Ama na i səradakwar aha, ma wuɗa vaw ma Bay ma Bəla da kuray dakay. 43I sawa na da mezəley ma Baba ɗaw, amana ka wuɗam ma ŋgələmaya kakay. Arka, haɗaw ndaw ka sawa da mezəley ŋga na na, ndaw aŋga na na ka da ŋgəlama! 44Ɗagay ka da pam ’ar na teŋgey, kuray a neney ma vəlam maram ka 'ar vaw kwar ana hay na, ka səpam aha maram na ma sawa da 'ay Bay ma Bəla asləta na kakay.» 45Ka da dzalam ma da həladakwar ka vaw ta Baba na yah zlay. Ndaw ma da həladakwar ka vaw na Moyiz, na kuray ma pa hiya dey ka ŋga na. 46Akwa haɗaw hana ha pam 'ar ba ka Moyiz na, akwatay ha pam 'ar ba ka yah tiyatsa, hərway a windərawa andza neney na mavəday ɗaw ana. 47Haɗaw kuray ka pam 'ar ka na ma windərawa na kakay na, ka da pam 'ar ka guma ɗaw i ma tsey ana na teŋgey?»
Currently Selected:
Zaŋ 5: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun