Zaŋ 21
21
Yezu a ɓatar vaw a gawla ŋga hay ka mey ma bəlay
1A dəba ma guma neney na, Yezu ma ɓatar vaw a gawla ŋga hay dey mekelehe sa, ka mey ma bəlay ma Tiberiyad. Nəkafama a da ɓey vaw na teŋgey. 2Simoŋ Piyer, Tomas na ma zəlamar Didim ana, Natanayiel ma Kana ma Galiley ana, bəzey ma Zebedey hay, ka zəgawa gawla ma Yezu ana hay daha tsew sa, taya ka masləta ha. 3simoŋ Piyer ma ləvatar: «I da həlawa kəlef.» Taya ma ləvamar: «Nakwama dzaya andza kah.» Taya ma bəmawa, ma tsəlam a kombiwal, ama ta dəvaɗ ana ŋga na na, taya ka ndzafam tek kakay. 4Ma dey me tseɗey na, Yezu ma lətsa ha ka ɗakal, ama gawla ŋga hay na ka səradama na, ŋga tikay. 5Ŋga ma ləvatar: «Hey! Gawla hay, kəlef a rafakwar nekəɗey daha ɗaw?» Taya ma ləvamar: «Dakay.» 6Ŋga ma ləvatar: «Kəladama zəva na ta tsakay ma har zəmay ma kombiwal na, aza ka ndzafam.» Taya ma kəladama na, kəlef me rəhey a huɗa na, ha a slafama ma vahərawa sakay. 7Gawla na Yezu ma wuɗa na ma ləvar a Piyer: «Na taɗay na, Bay’ərlam Yezu!» Andza ma tsənada ba na taɗay na, Bay’ərlam Yezu na, Simoŋ Piyer ma gedəweley zana a bəzay, hərway ŋga kəna ha, arka ŋga me kəley ka 'ar ma bəlay. 8Sa ma gawla hay ma sadəmərawa kombiwal, ma vahəmərawa zəva ma rəhaha ta kəlef. Akwa na taya dəreŋ ta ɗakal kakay, a key na miter temere dada. 9Andza taya ka hərɗəmawa tsoy ka dala na, taya ma nəkadama zay ma waw kəlef ma pa ha ka ’arra ta peŋ aha. 10Yezu ma ləvatar: «Aŋga hadəmərawa kəlef ana kuray ma hələmawa na ɗagay.» 11simoŋ Piyer ma mey me tsəley a kombiwal, ma vahərawa zəva na ka dala ma rəha ha ta kəlef dagwalam ahiya temere ta kokurow zlam kava makar. Kwa andza kəlef ana haɗadzidzay tekeɗe na, kwa zəva na ka ŋgerɗey kakay. 12Yezu ma ləvatar: «Səmawa da ma zəmey tek me pərek.» Kwa ndaw asləta da walaŋ ma gawla ŋga hay me wurey mey ma tsəhafa kah ana way na, dakay. Kavəday a səradama haya haya ŋga na Bay’ərlam Yezu. 13Arka tok na, Yezu ma sawa me zəgey peŋ, ma vəladatara, me zəgey kəlef, ma kada andza ha satsa. 14Neney na, Yezu ma ɓatar vaw dey mamakar ana a gawla ŋga hay, zla ma ma lətsawa ŋga da walaŋ ma ndaw ma mətsa na hay.
Yezu ta Piyer
15A dəba ma tek me zəmey na, Yezu ma ləvar a Simoŋ Piyer: «Simoŋ bəzey ma Zaŋ, ka wuɗaya a fəna ndaw a neney hay ɗaw?» Ŋga me mbəɗey kava: «Ayaw Bay’ərlam a ɗaw, ka sərada ha i wuɗaka seŋgey.» Arka Yezu ma ləvar tok: «Tərey ndaw me tsukurey bəzey təɓaŋ a ɗaw hay.» 16Yezu ma ləvar dey metsetsew ana: «Simoŋ bəzey ma Zaŋ, ka wuɗaya ɗaw?» Ŋga me mbəɗey kava: «Ayaw Bay’ərlam a ɗaw, ka sərada ha i wuɗaka seŋgey.» Yezu ma ləvar: «Tərey ndaw me tsukurey təɓaŋ a ɗaw hay.» 17Yezu ma ləvar dey ma makar ana: «Simoŋ bəzey ma Zaŋ, ka wuɗaya ɗaw?» A ndalar a Piyer hərway Yezu ma tsəhafa dey ma makar ana ka wuɗaya ɗaw ana. Arka ma mbəɗar kava: «Bay’ərlama ɗaw, kah na, ka səradata tek hay tabiyaha, ka sərada haya haya i wuɗaka seŋgey.» Arka Yezu ma ləvar: «Tərey ndaw me tsukurey təɓaŋ a ɗaw hay. 18Dərka dərka na i ləvaka, da har kah gawla ha mba na, ka ra kanda ɗek, ka daway a slam eɗek me wuɗey ana, andza kah ka da key maraw ba na, ka da tsakafada har, ma da radaka kanda ɗek na ndaw mekelehe, a da vahaka a slam na kah me wuɗey ma daway a huɗa kakay ana.» 19Yezu a tsey andza neney na, a ɓada ma da mətsey ma Piyer, ma da hasəkadara bəzay a Bay ma Bəla teŋgey. Arka a dəba ma guma neney na, ŋga me ləvar: «Səpaya.»
Yezu ta gawla na ŋga ma wuɗa na
20Andza Piyer me mbəɗey dey na, ŋga ma nəkada da dəba ŋga gawla na, Yezu ma wuɗa na, gawla aŋga na, da slam me zəmey tek, me gweɗəkwey ka 'ərev ma Yezu, ma tsəhafa ‹Bay’ərlam a ɗaw, ɗagay ma da haɗəkadaka na way?› ana. 21Andza ŋga ma nəkada ba na, Piyer ma ləvar a Yezu: «Bay’ərlam a ɗaw, ŋga na, ma da kar na mey?» 22Yezu ma mbəɗar kava: «Kendzey i wuɗey ka ndzey kasl a ma mawa ɗaw na, mey ɗek mey kava mey? Kah na, səpaya bəzay. 23Dəga zla da me tsey ma guma neney na, ndaw me pey 'ar hay ma ləvam: «Gawla neney na a da mətsey aha tikay.» Ka me tsey ma guma hay na, Yezu ka ləvar a da mətsey aha kakay tikay, ama a ləvey na: «Kendzey i wuɗey ka ndzey kasl a ma mawa ɗaw na, mey ɗek mey kava mey?» 24Ma ka sedewe ma guma na na, gawla na ta 'ar aŋga na, ma windərawa na, lakwa ka səradakwa seydewe ŋga na na a dam ka vaw ta dərka na. 25Yezu na ka key tek hay ba mekele ahiya haɗadzidzay daha sa, kendzey ka windəmərawa asləta ta asləta na, andza a kafaya na, bəla tabiyaha a slafa ma zəgadata ɗeriwel ana hay ma windəmatərawa na kakay.
Currently Selected:
Zaŋ 21: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun