Zaŋ 19
19
1Arka Pilat ma sadərawa Yezu, ma kəɗama ta lagwada. 2Sidzew hay na, ɓa ka ham dzekwe ma ndak ba, ma padəmara a 'ar, ma kəlamar kelmedzey gagaza ha ka vaw. 3A guram ka tsakay ŋga a ləvamar: «ka tsadəmaka guma, bay ɗuhwa na ma zuif hay!» Arka ma təɗafama me kəɗey. 4Pilat ma bawa ma ləvatar a zuif hay: «Nəkafama i da badukurawa a bəla, hayna, səradama, yah na, i ka ndzefey bəzey ma guma ma wudafa ka ndaw a neney tikay.» 5Arka Yezu ma bawa a bəla ta dzekwe ma ndak aha da 'ar, kaw kelmedzey gagaza ha ka vaw. Pilat ma ləvatar: «Ndaw ana ŋga kəɗey.» 6Ama andza baba ɗuhwa na me key kuley ana hay ta sidzew ata hay, ma nəkadama na, ma zlamar me wudey: «Daradama ka 'ar ma tuwaw ma gazləlaha na, daradama ka 'ar ma tuwaw ma gazləlaha na.» Pilat ma ləvatar: «Kuray ta ’ar a kwar ana zəgama, daradama, hərway yah na i ka ndzefey bəzay ma guma ma wudafa ka ndaw a neney tikay.» 7Zuif hay ma mbəɗafəmara kava: «Mewey la na daha, mewey ana a ləvey na, sey ka mətsey zləna, kavəday ka tərada vaw ŋga ba Bəzey ma Bay ma Bəla aha. 8Andza Pilat ma tsənada guma neney na, a kar zluwer a fəna sa. 9Ŋga me mey a hwaɗ ma 'ay ma tsəhafa ka Yezu: «Kah na ndaw mey?» Yezu a wuɗey me mbəɗey kava kakay. 10Pilat ma ləvar tok: «Ka wuɗey me tsey guma kakay na a yah ana ɗaw, ka sərada ha, yah na, slam har a ɗaw daha ma mbəkadaka, dakay na slam har a ɗaw daha ma daraka ka 'ar ma tuwaw tikay ɗaw?» 11Ama Yezu ma mbəɗar kava: «Hana ka vəladəməkawa da 'ərlam zlay na, slam har eɗek ma slafa ma kaya tek na dakay. Kavəday ma mey na ndaw andza ma vəladiyawa a har eɗek ana na, a zəgey meŋgəsey ɗuhwa ha dzay. 12Zla da har ana na, Pilat na a səpey ma mbəkada. Ama zuif hay na, ma zlamar me wudey ma ləvam: «Kah ka mbəkada ndaw a neney ba na, mber eɗek me key ana na, andza dzam ma Sezar aha sakay. Hərway kwa way way, ma kada vaw ŋga bay aha na, a ɓada na ŋga dugwan ma Sezar aha.» 13Andza ŋga ma tsənada guma neney na, Pilat ma badərawa Yezu a bəla, ma ndzada ka slam ana daha megədəber aha, a zəlamar «Litostrotos» ta mey Ebrew na «Gabata.» 14Pas me ləmey tek ma magurlam ma Pak ta wuzla rəpas. Pilat ma ləvatar a Zuif hay: «Bay kwar, ŋga kəɗey.» 15Ama taya ma zlamar me wudey: «Sey ka mətsey, sey ka mətsey, sey daradama ka 'ar ma tuwaw.» Pilat me mbəɗey kava: «Hayna, i ka darada na, Bay kwar ana ɗaw?» Baba ɗuhwa na me key kuley ana hay ma mbəɗamar kava: «Bay ɗuhwa ha la mekelehe ma fəna Sezar na, dasakay.» 16Arka na, ŋga ma vəladatara, ma ka daradama tok.
A daradama Yezu ka 'ar ma tuwaw ma gazləlaha na
(Mt 27.32-44; Mk 15.21-32; Lk 23.26-43)
Taya ma zəgama Yezu. 17Ŋga na ta ’ar aŋga ma zəga tuwaw aŋga ma gazləlaha na na, Yezu ma bawa, ma dawam a slam ana ma zəlamar ndasl ma bəlam 'ar ana, ta mey Ebrew na, a zəlamar Golgota. 18A darama na, ka slam ana ŋga na, ta ndaw hay daha tsew, pal ta tsakay eɗey, pal ta tsakay eɗey, Yezu na ŋga da wuzlah. 19Pilat me windey ka tek ana daha, ma tapada ka 'ar ma tuwaw ana ma gazləla na, ma winda ha na, andza neney: «Yezu ndaw Nazoreeŋ, bay ɗuhwa na ma zuif hay.» 20Tek ana ma winda ha na na, Zuif hay haɗadzidzay a dzaŋgama, hərway slam ma daradama Yezu ana na, bəse ta wuraw, tek ana ma winda ha na na, ta mey Ebrew, ta mey Lateŋ, ta mey Grek. 21Baba ɗuhwa na ma zuif hay ma kam kuley ana, ma ləvamar a Pilat: «Hana kah ka winda ‹bay ɗuhwa na ma Zuif hay› zlay. Ama winda na: ‹Ndaw a neney a ləvey na waya yah bay ma zuif hay.›» 22Pilat me mbəɗey kava: «Tek na i ma winda na na, i ka winda tsoy.» 23Andza sidzew hay ma ndəvadama ba ma dara Yezu ana na, taya ma zəgəmata zana ŋga na hay, ma wanəkadama dey faɗ, ka ndaw ka ndaw. A da zarawa na, kelmedzey: ma haha ta hey, kwa me təfey kava dakay, zla da 'ərlam kasl a gwadaw. 24Sidzew a hay ma ləvam ka 'ar vaw ta na: «Ka ŋgarɗadakwa zlay, kəɗafakwa tsatsa na, aza i da səradakwa ma da zəga na way?» A da key a da ndesley na, andza ma Mewindey Kokwoɗ ana: «Taya ma wanəkadama zana ɗaw hay, kelmedzey ɗaw na, taya ma kəɗafama tsatsa kava.» Nəkafama sidzew a hay a kama na andza ha tok. 25Kəreh ka slam ma tuwaw ma Yezu ma gazləlaha na na, may ŋga, malam ma may ŋga diŋgwas ana, Mariya ŋgwas ma Kleopas, ta Mariya ma Magədala ma lətsa hiya. 26Andza ŋga ma nəkada may ŋga, gawla ŋga na ŋga ma wuɗa haɗa na, ma lətsa ha ka tsakay ŋga na, ŋga ma ləvar: «Ŋgwas eɗey, bəzey ɗek ekəɗey.» 27Ŋga ma ləvar a gawla na tey: «May ɗek ekəɗey.» Zla da har ana ŋga na na, gawla na ma zəga a 'ay ŋga.
28Arka a dəba na, andza ŋga ma sərada ka ndaslada tsoy na, andza ma Mewindey Kokwoɗ ana hay ka ndaslam tsoy ka me ndekey ŋga na na, Yezu me ləvey: «Yam a hartaya.» 29Masəɗak ka slam ana daha ma rəha ha ta zom mawardzaŋ aha, ma paɗam zana ka 'ar ma madzanay, ma dzuhəɓadama a zom ana hana, ma guradəmara ka mey ma Yezu. 30Andza ma ndzəka zom mawardzaŋ ana ba tsa na, Yezu me ləvey: «Tek hay tabiyaha ma ndaka tsoy.» Andza ŋga ma toŋgada 'ar na, ŋga ma mada mesəfrey.
A slakama Yezu ka dzəham ana
31Arka andza azlakwa ta pas ana ŋga na na, pas me ləmey tek ma mesley ɗuhwa na, Zuif hay a wasam; a wuɗam vagay ana hay ka da ndzam ka 'ar ma tuwaw ta pas ma mesley ana ŋga na zlay, hərway pas ma mesley ana ŋga na na, pas ana gəle ta sa na hay gədaŋ aha. Taya ma tsəhafama ka Pilat ma ka həɓadəmatara sek ba, ka tsukumatərawa ba. 32Sidzew hay ma səmawa tok, taya ma pəsladəmara sek ma ndaw tsəfəmey ana, arka ma ndaw ma tsetsew ana, ma ndaw ana hay ma dara hiya andza ŋga na. 33Andza a da husam ka Yezu na, ba nəkafama na, ma mətsa ha tsoy, ka həɓadəmara sek hay tikay. 34Ama ndaw asləta da walaŋ ma sidzew ana hay, ma slaka ka dzəham ta zeot, arka na mambaz ta yam aha ma vawa. 35Ndaw ma nəkadərawa na na, ma ka seydewe na na ŋga, seydewe ŋga na na, a dam ka vaw ta dərka. Ma fəna satsa na, ndaw aŋga na na, a sərada a tsey na, na dərka na, ma aza kuray tiyatsa na, ha pam 'ar. 36Akwa na, tek ana tabiya ha a da key na, ma Mewindey Kokwoɗ ana ka ndesley: Kwa ndasl aŋga asləta ma da həɓey na, dakay. 37Guma ma Mewindey Kokwoɗ ana daha mekelehe sa, a ləvey: A da nəkadama ndaw ana taya ma slakama na.
A padama Yezu a tsəvay
(Mt 27.57-61; Mk 15.42-47; Lk 23.50-56)
38A dəba ma tek ana ŋga na hay ma kam ana na, Zozef ma Arimatey, gawla ma Yezu aha, amana ka ɓada vaw ma dey ma dey kakay zləna, hərway a wesey ta zuif hay. Ma tsəhafa ka Pilat ka vəlar slam har, ma tsəkwa vagay ma Yezu ba ka 'ar ma tuwaw. Pilat ma ləvar: ayakaw. Arka Zozef ma sawa, ma tsəkwa vagay ana tok. 39Nikodem ma sawa tiyatsa, ŋga a ŋga na, ma daway ma ndzafa Yezu ta dəvaɗ ana, ŋga me zəgey mal ma laluway me zey hayna, a zəlamar mire, ta wurdey aha a key kilo kokurow makar 40Taya ma zəgama vagay ma Yezu, ma tuɗama ta petekeɗ yam aha, ta tek a hana na me zey hayna, andza ma me ləmey vagay ma Zuif ana hay. 41Ka slam ma daradama Yezu ana na, dzerne ka slam ana daha, da ’ay dzerne na na, tsəvay daha da huɗa ma zləla ha waya ha, ɗaɗa ka pam vagay a huɗa tsaray kakay. 42Hərway ma pas ma me ləmey mesley ma Zuif hay, arka satsana, tsəvay ana bəse na, a da padama Yezu ana na a huɗa.
Currently Selected:
Zaŋ 19: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun