Zaŋ 18
18
Me zəgey ma Yezu
(Mt 26.47-56; Mk 14.43-50; Lk 22.47-53)
1A dəba ma guma ŋga neney na, Yezu ma dawam andza gawla ŋga hay, a diya ma wayaŋ ma Sedroŋ. Dzerne ka slam ana daha, taya ma fukwam a huɗa andza gawla ŋga hay. 2Azlakwa Zudas ndaw ma haɗəkada na na, a sərada ha slam ana, zləna, hərway Yezu a tsəham aha 'ar zarra da huɗa andza gawla ŋga hay. 3Ŋga ma kəlatar ka mey a sidzew ma ŋgoumna hay, ta na ma baba ɗuhwa na me key kuley ana hay, ta Fariziyeŋ hay ma sləradəmatəraɓa na, ma husam a dzerne na ta tostilam ahiya, ta lalam ahiya ta tek ma har ahiya. 4Andza Yezu na ɓa a sərada tek ana ma da safərawa na hay tabiyaha na, arka ŋga ma gurafata ma ləvatar: «Ka səpam na way?» 5Taya ma mbəɗamar kava: «Yezu Nazoreeŋ ana.» ŋga ma ləvatar: «Yah ekəɗey.» Azlakwa da walaŋ ata na, Zudas ndaw ma haɗəkada na ma lətsa ha. 6Andza Yezu ma ləvatar ba: «Yah ekəɗey» tsana, taya ma mam ta dəba na, ma təɗam. 7Yezu ma tsəhafata dey mekelehe sa: «Ka səpam na way?» Taya ma mbəɗam kava: «Yezu Nazoreeŋ ana.» 8Yezu ma mbəɗatar kava: «I ka ləvakwar ba yah ekəɗey seŋgey. Haɗaw ka səpam na yah na, mbəkadəmata ndaw eɗey hay ka dawam tek ata.» 9Kəɗey na a da ndesley andza ma guma ma Yezu ana ŋga ma ləvawa na: «Kwa ndaw asləta ka zəɗafaya da walaŋ ma ndaw kah ma vəladatiyawa na hay na dakay.» 10Arka Simoŋ Piyer ta maslalaɓ aha, ma kuɗərawa, ma tsuwa gawla ma 'ay Baba ɗuhwa na me key kuley ana, ha ma rətsadara sləmay ma har zəmay ba, mezəley ma gawla na na, Malkus. 11Ama Yezu ma ləvar a Piyer: «Mada maslalaɓ eɗek a 'ay ŋga, tsukuɗu, vəliyem ma tsetseh ana, Baba ma vəladiyawa na na, i ka sa sazlay ɗaw.» 12Sidzew ma goumna ta na ma bay ma Zuif hay ma zəgama Yezu tok, ma dzuwama.
Yezu da ’ay baba ɗuhwa na Hanna
(Mt 26.57-58; Mk 14.53-54; Lk 22.54)
13Ma dadama ka mey na, a 'ay ma Hanna, ŋga na mesey ma Kayif, baba ɗuhwa na me key kuley ka lam ana ŋga na. 14Ma ləvatar aŋga na a Zuif hay: «Ŋgama ndaw asləta ka mətsey, hərway ma səkway tabiyaha» na, Kayif ana ŋga na tsa.
15Simoŋ Piyer ta gawla ma Yezu ana daha na, ma səpama Yezu da dəba da dəba. Andza gawla na hana na, a səram vaw ta Baba ɗuhwa na me key kuley ana na, ŋga na me fuləkwey a 'ay ma Baba ɗuhwa na me key kuley ana ta Yezu. 16Piyer na ma ndza ha da bəla, ka slam ma mambaw. Gawla a hana Baba ɗuhwa na me key kuley ana ma sərada na na, ma bawa, ma tsar guma a dem me hutey mambaw ana, arka ma fuləkwada Piyer a 'ay tey. 17Dem me key mber da 'ay ana, me hutey mambaw ana me ləvey: «Kah na, da walaŋ ma gawla ma ndaw a neney hay tikay ɗaw? Piyer me mbəɗey kava: «Yah kakay.» 18Gawla ma 'ay hay ta sidzew hay ma laɓam waw me ndzey, hərway memeɗ a key aha. Piyer na ma ndza ha ka tsakay ta, a ndzey aha waw ana tiyatsa.
19Baba ɗuhwa na me key kuley ana ma zlar ma tsəhafa guma ka Yezu, hərway ma gawla ŋga hay, ta tek aŋga me tetəkey ana. 20Yezu ma mbəɗar kava: «I tsa guma na na, ndar ndar, ka pas ka pas, i tatəkadata ha ndaw hay da 'ay me ɗuley mey hay, da 'Ay me key Kuley, ka slam ma zuif hay ma kusam, ɗaɗa i ka tsey guma ta mahal aha kakay. 21Ɗagay ka tsəhafaya ka yah na ka mey? Tsəhafata ka ndaw ma dzəkafəmaya sləmay ana hay kwa, a səradama guma na i ma tsatar ana hay.» 22Ka guma neney na, sidzew asləta da walaŋ ata, ma kəlar marawa a Yezu ta me ləvey aha kava: «Ka mbəɗar kava andza neney na, a Baba ɗuhwa na me key kuley ana ɗaw?» 23Yezu ma mbəɗar kava: «Kendzey i ka tsaɓa guma ba haya kakay na, ɓadiyawa da na waray? Haɗaw i ka tsəraɓa ba hayaha na, ɗagay ka kəɗafaya mey?» 24Arka na Hanna ma sləradara Yezu ma dzuwa ha a baba me key kuley ɗuhwa na Kayif.
Piyer a ləvey dey mekelehe i sərada Yezu kakay
(Mt 26.71-75; Mk 14.69-72; Lk 22.58-62)
25Da har ana na, Piyer ma ndza ha, re a ndzey aha waw, ma ləvamar: «Kah na ndaw asləta da walaŋ ma gawla ŋga hay kakay ɗaw?» Piyer na me mbəɗey mey me ləvey: «Yah kakay.» 26Ndaw asləta da walaŋ ma gawla ma 'ay ma Baba ɗuhwa na me key kuley ana, ndaw ma gawla na ŋga na, Piyer ma rətsadara sləmay ana ma ləvar: «I ka nəkadəkawa ba da 'ay dzerne, kuray dzaya kakay ɗaw?» 27Arka satsa na, Piyer me mbəɗey mey sa. Arka deŋe da har ana na, dzagulok me zlehey.
Yezu ka mey dey ma Pilate
(Mt 27.1-2, 11-14; Mk 15.1-5; Lk 23.1-5)
28Arka azlakwa ma dadama Yezu da 'ay Kayif na, a 'ay ma Guverner, dey a tseɗey aha. Ndaw ma dadama na hay ka fuləkwam a hwoɗ ma 'ay kakay, zləna, tsefe a da zləɓam ba, a da zəmam aha tek ma kuley ma Pak sakay. 29Pilat ma sawa ma da ndzafata da bəla, me ləvey: «Ɗagay ka wudafama ka ndaw a neney na mey?» 30Taya ma mbəɗam kava: «Haɗaw ndaw a neney ana ka kawa tek haya kakay aha kakay na, akwatay i vəladəmaka ɗaw?» 31Pilat ma ləvatar tok: «Kuray ana zəgama, kadəmara sariya ŋga na, andza ma mewey kwar ana.» Zuif hay ma ləvamar: «Slam har ala me kəɗey ndaw vagay aha na, dakay!» 32Kəɗey na a dafa ka ndesley andza ma guma ma Yezu ma ɓada, a da mətsey na, teŋgey teŋgey ana. 33Pilat na me fuləkwey a hwoɗ ma 'ay, ma zəla Yezu, ma ləvar: «Kah na, bay ɗuhwa na ma zuif hay ɗaw?» 34Yezu ma mbəɗar kava: «Ka tsərawa na, ma 'ar eɗek ana tsukuɗu, mala ndaw hay ma tsəmaka ka yah ɗaw?» 35Pilat ma mbəɗafara kava: «Yah na, ndaw zuif tey ɗaw? Ndaw ma dala ɗek ana hay, baba ɗuhwa na me key kuley ana hay, ma vəladəməkawa a har a ɗaw, ɗagay ka kawa na mey?» 36Yezu me mbəɗey kava: «Bay ɗaw me key ana na, ka bəla neney tikay, haɗaw ka key ka bəla neney na, akwatay sidzew a ɗaw hay ka dzaŋgərafəmaya ba, ka mbəkadəmaya a har ma zuif hay kakay; ama kəɗey tok na, bay ɗaw ana me key ana na, ka sləna kakay.» 37Pilat ma ləvar tok: «Azlakwa kah bay aha tok zlənemey?» Yezu ma ləvar: «Me ləvey, yah bay aha na, kah ana. A yəmiyawa, i sawa ka bəla na, ma da key seydewe ma dərka. Kwa way way ma ndza ha da dərka na, a pey sləmay ka vəɗe ma ɗay ɗaw.» 38Pilat ma ləvar: «Ɗagay dərka ana na, tek a mey?» Ka guma ŋga neney na, ŋga me bey, ma ndzafata zuif hay da bəla, arka ma ləvatar: «Na ŋga ɗaw na, i ka ndzefey bəzay ma guma ma dzuwada ndaw a neney tikay.
39Ama ekəɗey na, kuray ma səɗəkaya tsoy, ka magurlam ma Pak na, i kəlakwar ndaw asləta da daŋgay sana, i ka kəladukurawa bay ɗuhwa na ma zuif hay ɗaw?» 40Arka taya ma zlamar ma wudam, ma ləvam: «Ka mbəkawa ŋga zlay, mbəkawa na, Barabas.» Barabas ana azlakwa tok na, katsala ha.
Currently Selected:
Zaŋ 18: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun