Zaŋ 15
15
Yezu na vəɗe ma viŋe hayna
1Yah na vəɗe ma viŋge hayna, Baba ɗaw na, ndaw ma nəkafa dey ana. 2Mendzey ma hawal na ma tapa ha ka yah, me yey bəzey kakay ana na, a rətsama ba. Mendzey ma hawal na me yey ana na, a kalama, ma aza ka yey a fəna satsa. 3Kuray ekəɗey na, ma kala hiya ba tsoy ta guma ɗaw i ma tsakwar ana. 4Ndzam da yah andza i me ndzey da kuray ana. Kal kal andza ma hawal, haɗaw ma tapa ha ka vəɗe ma viŋe ana kakay na, a slafa ka ’ar vaw ŋga na me yey bəzey kakay. Kuray ekəɗey, haɗaw kuray ma tapa hiya ka yah kakay na, andza ha atsa. 5Yah na vəɗe ma viŋe ana, kuray na hawal ana hay, ndaw ana ma ndza ha da yah, yah ma ndza ha da ŋga tey na, a da yey kava haɗadzidzay, hərway mandzar yah na, tek a kwar ma slafa me key na dakay. 6Haɗaw ndaw ana ma ndza ha da yah kakay na, a kəladama ba a bəla andza ma hawal, a ŋgweley, arka a kwakusama, a kuyadama a waw, arka a təɓam. 7Haɗaw kuray ma ndza hiya da yah, guma ɗaw hay ma ndza hiya da vaw kwar na, ka slafama me tsəhey tek ma sakwar ana hay na, a da husafəkurawa. 8Tek ma vəlar maram a Baba ɗaw na, me yey kwar kava haɗadzidzay ana, arka na, ka təram gawla ɗaw ahiya. 9Andza ma Baba ma wuɗaya na na, yah tey na, i ka wuɗəkurawa ba, ndzam da ma wuɗa vaw ɗaw. 10Kendzey ka tsənəmatar aha sləmay a mey ma mewey ɗaw hay na, ka da ndzam na da ma wuɗa vaw ɗaw. Andza na ŋga ɗaw i ma tsənatar sləmay a mey ma mewey ma Baba ɗaw tey na, i ma ndza ha da ma wuɗa vaw ŋga na tey. 11I tsadakwar na aza wuiya ɗaw ka ndzey da kuray, wuiya kwar ka key na kərem aha. 12Mey ma mewey ɗaw na ŋga kəɗey: wuɗam vaw ka 'ar vaw kwar ana, andza na ŋga ɗaw, i ma wuɗəkurawa ana. 13Kwa ma wuɗa vaw ma fəna, ma ndaw ma vəlada mendzey ŋga, hərway ma ndaw aŋga ma wuɗata na hay na, dasakay. 14Kuray na dzam a ɗaw hay, haɗaw ka kam tek andza na i ma ləvakwar ana na. 15I zəlakwar na gawla ma 'ay ɗaw hay sakay, hərway gawla ma 'ay na, a sərada tek ma Bay ma 'ay ŋga me key ana kakay. I zəlakwar na dzam a ɗaw hay, kavəday tek a ɗaw ma tsənadərawa na tabiyaha ka tsakay ma Baba ɗaw na, i ka ɓadakwar ba. 16Ma səpiyawa na kuray kakay, ama ma gaɗəmukurawa na yah. I ma padakwar ma aza kuray ka dawam, ha yam bəzey arka bəzey kwar ana hay ka ndzam, ma tek a kwar ma da tsəhey tabiyaha da me zəley ɗaw ka Baba na, a da vəladakwar. 17Mewey ɗaw na ŋga kəɗey: wuɗam vaw ka 'ar vaw kwar ana hay.
Bəla a ŋgəladata dey ta Yezu ta ndaw aŋga hay kakay
18Kendzey andza bəla a ŋgəladakwar dey kakay na, səradama a ŋgəladiyawa dey kakay ka mey na ta yah. 19Kendzey kuray ma vəla hiya ma bəla na, bəla a da wuɗakwar zləna, hərway bəla a wuɗey na, tek ma dey har aŋga. Ama, kuray na, ma vəla hiya ma bəla ɗey kakay, ma padakwar gəle ta bəla na ɗey na yah, nəkafama bəla a ŋgəladakwar dey kakay na, hərwuiya. 20Sərafama ka bəzay ma guma ɗaw i ma tsukurawa na: «Gawla ma 'ay na, a fəna bay ma 'ay ŋga kakay.» Haɗaw ka kadəmaya tatakoy ba na, a da kadəmakwar tiyatsa. Haɗaw ka tsənəmiyawa sləmay ba a guma ɗaw na, a da tsənəmakwar sləmay tiyatsa. 21Tek a neney tabiyaha, a da kadəmakwar na, kavəday ma mezəley ɗaw, hərway ma mey na, a səradama ndaw ma sləradiyawa na kakay. 22Hana i ka sawa zlay, hana i ka tsatar guma zlay na, meŋgəsey ka taya dakay. Ama ekəɗey na, meŋgəsey ta na na, amboh aŋga na dakay. 23Ndaw ma ŋgəladaya dey kakay na, a ŋgəlada dey ta Baba ɗaw kakay tiyatsa. 24Hana tek a neney hay i me key da walaŋ ata na, kwa ɗaɗa ndaw ka key andza ha dakay ana zlay na, meŋgəsey ta dakay. Ama ekəɗey taya ka nəkadama ba, amana re a ŋgəladəmandar dey kakay, yah ta Baba ɗaw ana na, 25ma aza ka ndesley andza ma guma na mawinda ha da mewey ta na: «A ŋgəladəmaya dey kakay mandzara malay.» 26Aza i ka da slərafukurawa ndaw ma da dzaŋgərafakwar ana ba ka slam ma Baba, Mesəfrey ma dərka, na ma sawa ka slam ma Baba na na, a da ka seydewe ɗaw ana ta 'ar aŋga na. 27Kuray tiyatsa na, ka da kam seydewe ɗaw ana, kavəday lakwa dzaya zla da mezley ana.
Currently Selected:
Zaŋ 15: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun