Zaŋ 14
14
Yezu na tsəveɗ ma daway a 'ay Bay'ərlam
1Hayna 'ərev ka da həɓakwar zlay, ka pam 'ar ka Bay ma Bəla kakay ɗaw, pam 'ar ka yah ana tiyatsa. 2Da 'ay Baba ɗaw na, slam mendzey na belem belem. Hana na atay andza ha kakay na, i ka ləvakwar, i daway, i da ləmakwar slam mendzey da huɗa kakay seŋgey. 3Kendzey andza i ka daway, i ka ləmadukurawa slam ana ba na, i da mawa, i da həlukuraɓa ka tsakay ɗaw, ma kuray ka da ndzam ka slam a ɗaw, i ma ndza ha kava na tey. 4Slam a ɗaw ana i ma daw a huɗa na na, ka səradama ha tsəveɗ ana. 5Tomas ma ləvar: «Bay’ərlam a ɗaw, slam eɗek ana ma daway a huɗa na dzay na, la səradama kakay tok na, la da səradəməraɓa tsəveɗ ana na teŋgey?» 6Yezu ma ləvar: «Yah na tsəveɗ, yah na mey ma dərka, yah na mendzey, ɗaɗa ndaw ma slafa me husey ka tsakay ma Baba mandzara yah na dakay. 7Kendzey ka səradəmaya na, ka da səradama Baba ɗaw tiyatsa. Zla ekəɗey ana na, ka səradama, kuray ka nəkadama ba.» 8Filip ma ləvar: «Bay’ərlam a ɗaw, ɓafandar har ka Baba na na, na ŋga na na ɗarandar.» 9Yezu ma ləvar: «Filip, zla ekəɗey kakay lakwa dzaya tok na, ha ekəɗey ka səradaya tsaray kakay ɗaw? Ndaw ma nəkadaya na, a nəkey na, Baba ana. Ka ləvey: ɓafandar har ka Baba na na, teŋgey? 10Ka pey aha 'ar, yah na ma ndza ha da Baba, Baba tey ma ndza ha da yah kakay ɗaw? Guma ɗaw a neney hay, i ma tsakwar ana hay na, i tsata ma bay ’ar ma vaw ɗaw ana kakay! Dzadzak na Baba ma ndza ha da yah ana na, a ndasladata mber aŋga hay. 11Pəmaya 'ar yah ma ndza ha da Baba, Baba tey ma ndza ha da yah. Haɗaw ka pam 'ar ka guma ɗaw kakay na, dakay na pam 'ar kavəday ma mber a neney hay kwa. 12Dərka dərka na, i ləvakwar ndaw me pey 'ar ka yah na, a da key tek na yah me key ana hay, a da key na tek na ɗuhwa hiya a fəna sa. Hərway ma mey na, i daway aha 'ar a 'ay Baba. 13Tek a kwar tabiyaha, ma tsəham da mezəley ɗaw na, i da kata, ma aza Baba ka ndzefey maram da Bəzey. 14Haɗaw ka tsəhafəmaya tek da mezəley ɗaw na, i da ka tek ana.
Yezu a ləvey waya i da slərawa Mesəfrey Kokwoɗ ana
15«Haɗaw ka wuɗəmaya na, ka da kam andza mey ma mewey ɗaw me ləvey ana hay. 16Yah tey na, i da ɗular mey a Baba, a da vəlukurawa ndaw ma dzaŋgərey ana mekelehe, a da ndzey ta kuray ma tsoy aha. 17Ŋga na, Mesəfrey ma Dərka, na bəla ma slafa ma ŋgəla kakay ana, mavəday a nəkar a dey kakay, a sərada kakay. Kuray na ka səradama zləna, hərway ma ndza ha ka tsakay kwar, ma ndza ha da vaw kwar. 18I da mbəkadakwar aha matakwam ahiya kakay, i da sawa ka tsakay kwar. 19Ekəɗey mendzey nekəɗey adiya na, bəla a da nəkadaya ha sakay, ama kuray na ka da nəkadəmaya werwer, arka kuray ana tiyatsa na, ka da səfram. 20Ta pas ana ŋga na na, ka da səradama yah da Baba ɗaw, kuray da yah, yah tey da kuray. 21Ndaw ma zəgafata har ka mey ma mewey ɗaw hay, me key andza ha na, ndaw aŋga na na, a wuɗaya. Arka ndaw ma wuɗaya na, Baba ɗaw a da wuɗa tiyatsa. Arka yah ana tey na, i da wuɗa, arka na, i da ɓada vaw ɗaw da ŋga.» 22Zud, zləna Zudas Iskariyot kakay, ma ləvar: «Bay’ərlam a ɗaw, ɗagay ka da ɓandar vaw na a la dada ama na a bəla tikay na teŋgey?» 23Yezu ma mbəɗar kava: «Haɗaw ndaw ana a wuɗaya na, a da tsənar sləmay a guma ɗaw, arka na, Baba ɗaw a da wuɗa. La da səmawa ka tsakay ŋga, la da ləmam slam ala me ndzey da ’ay ŋga. 24Ndaw ana a wuɗaya kakay tey na, a wafa vaw ka guma ɗaw kakay, amana, guma neney kuray ma tsənadama na na, a bawa na da yah ana kakay, ama na da ndaw ma sləradiyawa na. 25I ɓadakwar tek a neney hay na, zla da lakwa ma ndza hiya dzaya mba. 26Ndaw ma dzaŋgərey ana, Mesəfrey Kokwoɗ ana, na Baba ma da slərawa da mezəley ɗaw ana na, a da tatəkadakwar tek hay tabiyaha. Ka da sərafəmata ka tek na i ma tsakwar ana hay tabiyaha. 27I mbəkadakwar zozoy, i vəladakwar zozoy ɗaw. I vəladakwar na andza ma ndaw ma bəla hay tikay, 'ərev ka da həɓakwar zlay, ka da wasam zlay. 28Kuray ka tsənadama ba i ka ləvakwar ba: i daway, i da mawa ka slam a kwar, haɗaw ka wuɗəmaya na, ma daw ɗaw a neney a 'ay Baba na na, a da mbafakwar, hərway Baba na, a fənaya. 29I ɓadakwar ba zla ekəɗey ana, amba tek ana ka kam, ma aza ka da husəmawa ba na, kuray ka pam 'ar. 30Zla ekəɗey na I da tsakwar aha ka tek hay a kuray dasakay: hərway bay ma bəla neney a sawa ha. Dərka na tek aŋga ma slafa ma da kaya na dakay. 31Ama a sawa na, ma bəla ka sərada, i wuɗa Baba ɗaw, i key na kassla andza ma Baba ma ləviyawa, i ka key andza ha na. Lətsam, nakwama ba ka sləna na!.
Currently Selected:
Zaŋ 14: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun