Zaŋ 10
10
Guma ma mala ha te meley ana ma ndaw me tsukurey
1Dərka dərka na, i ɓadakwar, haɗaw ndaw ana a fuləkwey a welde ma təɓaŋ hay ta mambaw kakay, ama a hərɗey ta 'ar ma zlagam na, ndaw ana ŋga na na mahal, katsala. 2Ama ndaw me fuləkwey ta mambaw ana na, ŋga na ndaw me tsukurey təɓaŋ ana hay. 3Ndaw me hutey ka mambaw ana a wuradara mambaw, arka təɓaŋ hay, a pam sləmay ka veɗ ma ɗay ŋga. Təɓaŋ aŋga hay na, a zəlata na, kwa way way, ta mezəley ŋga. A badatərawa a bəla. 4Andza ka badatərawa tsoy a bəla na, a kəlatar ka mey, arka na a səpama zləna, kavəday a səradama vəɗe ma ɗay ŋga. 5Ɗaɗa a səpamar bəzay a ndaw mbəlak aha tikay. A fəna satsa na, a da hwadama zləna, ka vəɗay a səradama ɗay ma mbəlak hay kakay.» 6Yezu ma tsadatara bəzay ma guma neney ma mala ha, ta meley ana; amana taya ka tsənadama a tsatar na ka mey kakay. 7Yezu me ləvey sa: «Dərka, dərka na, i ləvakwar: yah na mambaw ma təɓaŋ ana hay. 8Tobiyaha ndaw ma səmawa ka mey ɗaw ana hay na, ndaw mahal hay, ta katsala hay. Amana təɓaŋ ana hay, ka pəmatar sləmay kakay. 9Yah na mambaw, haɗaw ndaw ana a fuləkwey ta yah na, a da buwama, a daway, a mawa, a ndzefey tek me zəmey. 10Mahal a daw ma ŋga na, ma da huley, ma da təzey, me zəɗey tek. Ama yah na, i sawa na ma ndaw hay ka ndzafam mendzey, ka ndzafam na haɗadzidzay. 11Yah na ndaw me tsukurey hayna, ndaw me tsukurey hayna na, a vəlada mendzey ŋga hərway ma təɓaŋ aŋga hay. 12Ndaw me key mber ma sumkwo na, təɓaŋ ana hay na, ma ŋga hay kakay, kendzey andza ŋga ka nəkada dəvar ba a sawa ha na, a mbəkadata təɓaŋ hay, a hway ta vaw ŋga. Dəvar a sawa, a həley, a zlaɗadatara 'ar ta sa na hay. 13Hərway a key na mber ma sumkwo, təɓaŋ hay a kamar da 'ar kakay. 14Yah na ndaw me tsukurey hayna, i səradata təɓaŋ a ɗaw hay, təɓaŋ a ɗaw hay a səradəmaya. 15Andza ma Baba ɗaw ma səradaya na na, i sərada Baba ɗaw; andza ha tey, i vəlada mendzey ɗaw hərway ma təɓaŋ a ɗaw hay. 16Təɓaŋ a ɗaw a sa na hay daha, ka fuləkumawa a welde na tsaray kakay, taya na ŋga na na hay tiyatsa na, hayna i ka tsəhadatərawa 'ar, a da dzəkam sləmay ka vəɗe ma ɗay ɗaw, a da key na welde na asləta, ndaw me tsukurey ana asləta. 17Baba a wuɗaya na, mavəday i ma vəlada mendzey ɗaw, i da təɓa tek a ɗaw ka mey. 18Ndaw ma təɓadaya ba na dakay, ama ma vəlada na yah ana ta ’ar a ɗaw ana. I slafa ma vəlada, i slafa ma da təɓa tek a ɗaw. Neney na mey ma mewey ana i ma ndzafawa da har ma Baba ɗaw ana.» 19Guma neney na, ma sadatərawa me tsey vaw da walaŋ ma Zuif hay sa. 20Ndaw hay da walaŋ ata haɗadzidzay ma ləvam: «Fakalaw a kar, a key na a dzadzuvey guma soha sana, ka pafama sləmay na, ka mey?» 21Ama sa na hay, ma ləvam: «Neney na guma ma ndaw ta fakalaw aha da 'ar kakay, zləna, fakalaw na a slafa ma wuradara dey ma ndaw wulaf aha ɗaw?.»
Zuif hay a kəladama Yezu ba
22Da har ana ŋga na na, a kam aha magurlam ma bəzləmey ’Ay me Key Kuley da Zeruzalem, da har ma memeɗ kusey. 23Da 'Ay me key Kuley na, Yezu a daway a mawa ka slam ma veranda na ma zəlamar veranda ma Salomoŋ ana. 24Zuif hay ma ɗawalama, ma ləvamar: «Ka da ndzadandar da waway na, kasl ka waray, haɗaw kah Kriste na, ɓadandar ndar ndar kwa.» 25Yezu ma mbəɗatar kava: «I ka tsakwar ba, amana kuray ka təɓama kakay, tek a ɗaw ana hay yah ma kata da mezəley ma Baba ɗaw ana na, a kaya seydewe ɗaw ana. 26Ama ekəɗey ka pəmaya 'ar kakay na, kavəday kuray da walaŋ ma təɓaŋ a ɗaw hay kakay. 27Təɓaŋ a ɗaw hay na, a pam sləmay ka vəɗe ma ɗay ɗaw, i səradata, a səpəmaya bəzay. 28Arka yah tey na, i vəlatar mendzey me ndəvey kakay ana, ɗaɗa a da mətsam aha kakay, ɗaɗa ndaw ma slafa ma buwatərawa ba da har a ɗaw na, dakay. 29Baba ɗaw ana ma vəladatiyawa na na, a fənata tek hay tabiyaha, kwa ndaw ma slafa me təɓey tek da har ma Baba na dakay. 30Yah ta Baba na, la na ndaw asləta. 31Arka Zuif hay ma kwakusam ŋgwa, ma da kwuytsa satsa. 32Ama Yezu ma ləvatar sa: «I ka ɓakwar mber hayna ma Baba ɗaw ba haɗadzidzay, ka slam dey kwar, ka wuɗam ma kwuytsəmaya na ka mber ana waray?» 33Zuif hay ma mbəɗamar kava: «La wuɗam ma kweytsəmaka na ka mber hayna me key ana kakay, amana, ka guma ɗek a neney, kah ma tsaɗa Bay ma Bəla ana. Ka vəɗay kah na ndaw tok na, ka tərada vaw ɗek Bay ma Bəla aha.» 34Yezu ma mbəɗatar kava: «Ma winda ha da Mewey kwar na: I ləvey na, kuray na 'ərlam ahiya kakay ɗaw? 35Azlakwa a da key na, Mewey a zəlata ndaw ma tsadəmatara guma ma Bay ma Bəla ana hay, 'ərlam ahiya na. Arka tok na, kwa tek ma slafa ma davasada Mewindey Kokwoɗ ana hay na dakay 36A ndaw ana Baba ma wala na, ma sləradərawa ka bəla na na, ka ləvamar: «Ka tseɗey Bay'ərlam hərway yah me ləvey, yah Bəzey ma Bay ma Bəla. 37Kendzey hana i key aha mber ma Baba ɗaw kakay ŋgey, na ŋga na na, ka pəmaya 'ar zlay! 38Ama haɗaw i kata ha na, kwa ha pəmaya 'ar kakay na, pam 'ar ka mber a neney hay, ma kuray ka səradama, ha səradama haya hayaha, Baba ŋga da yah, andza yah da Baba na tey.» 39Arka satsa a səpama ma da zəga, amana, ma ləhafata ba da har ata. 40Arka Yezu ma mey təŋga a diya ma Zurdeŋ, ka slam ma Zaŋ ma zlar me dzuhəɓey ndaw hay kava na, me ndzey təŋga da huɗa. 41Ndaw hay haɗadzidzay ma dawam ka tsakay ŋga, ma ləvam: «Zaŋ na ɗaɗa, ka key zeheɗ ma tek daha tikay, ama guma ŋga na me tsawa ka ndaw a neney tabiyaha na, dərka na.» 42Arka a da key na, ndaw hay haɗadzidzay ma pam 'ar ka ŋga.
Currently Selected:
Zaŋ 10: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun