2 Zaŋ 1
1
Mewey na ma sawa da 'ərlam ana
1I ndaw ma səka na, i windəraɓa a ŋgwas ma gaɗəma na ta wawa ŋga hay, na i ma wuɗata da waw me nəkey dey ma dərka ana - yah dada tsa kakay, amana ndaw ma ndzafama ma səradama dərka ana hay tabiyaha - 2kavəday ma dərka ana ma ndza ha da vaw lakwa na, arka a da ndzey na da lakwa ma kwozaha: 3ta lakwa na, ma da ndzey na hahaya, me key da vaw ta zozoy ma sandukurawa da Bay ma Bəla Baba, ta Yezu Kriste Bəzey ma Baba, da dərka, ta ma wuɗa vaw. 4Andza ma ma nəkadata wawa ɗek hay a dam aha ta tsakay tsəveɗ ma dərka, andza na mey ma mewey lakwa ma ndzafukwawa da Baba na na, ma vəlaya wuiya ɗuhwa ha. 5Ana ekəɗey tok ŋgey dəme, i tsəhafaka na -i windəkaɓa ɗey na, mey ma mewey waya ha kakay, amana na lakwa ma səradakwa na zla da mezley ana- wuɗakwama vaw ka 'ar vaw lakwa na hay. 6Nəkafa me wuɗey vaw ana tok: haya i ka nakwama na, ta tsəveɗ ma mey ma mewey ŋga hay. Mey ma mewey ana kuray ma tsənadəmərawa zla da mezley ana na, ŋga ha, ma aza kuray ka dawam ta tsəveɗ ana ŋga na na.
Me tetəkey ma Kriste
7Hərway ndaw me pey wuiya ka ndaw hay na, ma pa mey a hiya ka bəla kambəlaɓa, a tələkam mey na, ka me pey 'ar ma ma sawa ma Yezu da slaw vaw ana tikay. Nəkafa, ŋga na ndaw me pey wuiya ka ndaw ana, ndaw dugwan ma Kriste ana. 8Wam daw ka vaw ka 'ar vaw kwar ana hay, ma kuray ka da zəɗadama tek ma merɓey ma meslərey kwar zlay, ama kuray ka da ndzafam na masa ɗuhwa ha dzay. 9Kwa way way ma daway ka mey kambəlaɓa na na, ma ndza ha da me tetəkey ma Kriste kakay na, Bay ma Bəla ta ŋga dakay. Ndaw andza ma ndza ha ta me tetəkey ana na, ŋga na, Baba ta Bəzey na, ma ndza hiya da ŋga. 10Haɗaw ndaw ana a daɓa ta tsakay kwar, mandzara ka dadəraɓa me tetəkey a neney na, ka da ŋgəlama a 'ay kwar zlay, ka tsamar guma zlay. 11Ndaw ma tsar guma, ma ŋgəla mambay aha na, a dzəmam a tek aŋga na hana na me key haya kakay ana hay. 12Guma ɗaw ma windukuraɓa haɗadzidzay daha, i wuɗey ma windadukuraɓa ta windey a ɗeriwel kakay, hərway i dzeley aha ma da daɓa a 'ay kwar ana, arka aza i da tsadakwar ta huɗa mey ɗaw ana, ma aza wuiya kwar ka key ɗuhwa ha dzay. 13Wawa ma Malam eɗek ana diŋgwas ana, ma gaɗəma na ka tsadukuraɓa guma.
Currently Selected:
2 Zaŋ 1: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun