DIMIS MIMEZLE 1
1
1Hana i dimis mimezle wãˀ ngi Salomoŋ.
Ngwas ati zil. Bubuɗ ngi mangaslay
Ngwasa
2Jiy kuɓuy so, curɓiy mi ko mbak le ta,
asi wuɗa vu ɗike, a wiy duwlak fineˀ mbaazla,
3i mezle fineˀ zĩˀĩ ngi urdi ɗikey na.
Deŋ ɗike, naŋ ka urdi mipal naŋ kine mazĩˀĩ ndum.
Diilihey mawuɗokuw haɗa na vurˀe.
4Jiy haŋ kaw, kulukum cuwa.
Buy ɗu ci ti ya nga viŋ ɗiki.
Juɗukum mececẽleŋ, mumulukum asi mezle ɗik na.
Gukum muguzlum ngi wuɗa vu ɗik mundum fineˀ mbaazla na.
Ziri mongosohoy mawuɗam ka haɗa na, naŋ kaslsla.
5Kum diili Zeruzalemey, ya kakayak kakayak ɓula, amma yi diili mukuy,
ya kakayak kakayak kaɓa guɗuk a Kedar,
kaɓa godo hirngahay.
6Ki jam lesl vur ya mikakayak kakayak na ta,
i pas mulusiy kanah.
Sukum ɗuwoy a jam mevel le ar ya,
a cifikiy ɓa yi jigin guva ngi gudubun,
amma kuy ngi vu ɗu, yi jigina ta.
7Ka mbur ngi si mevel ɗu wãˀ, inga bigiy
li ka majigina ginew ɗik mitaˀ gezleŋ,
li ka mamusuk vu ti taŋ ti wuzla papas na.
ɓa y'anta rudigi kiŋkiŋ lambaˀ
ngir ti ciki ginew ngi ngama ɗikey ta.
Mbur mizile
8Ka mukuy teˀ ngi wuzla ngwasay, da ka, ki si na ta na,
bi, sipa baraf ngi tumuŋhoy,
pula ziri ˀaw ɗikey a zumam aciki hay ngi mijigineye.
Mbur mizile
9Ka yeme ɗu, ka njikimaˀ ka jagara pilis
mujuwa le da mota ngi vurum ngi buy madiɗa ngi Ezipte.
10Kwala ɗik a pur fetek fetek tisi ngwic hirnga ɗik muslupa na,
ˀay ɗike ndat ti virzle ɗikeye.
Mijiginey
11I sa vuɗukuw gwat ngi slimiɗeye ti ɓiri tapasl tapasl,
waɗ ti ɓiri bara.
Ngwasa
12Buyo, da naŋ mira zum ɗaf ngi muguzlum na,
urdi ngi nardi#1.12 Nardi i hirnga ngi dum magam di urdi misi cikili naŋ haɗi. ngivi vu ɗu a zĩˀĩ jirre.
13Mikiɗa may ɗu nga ya, naŋ kaɓa gojogoɗ ngi urdi mazilaka mir,#1.13 Mir i urdi hirnga magaka ti mukuturɓuy ngi widis ngi ruwuy Arabi.
a hin gumbuˀ a didak ɗu.
14Mikiɗa may ɗu nga ya, naŋ docok kaɓa yi ngi widis hene#1.14 ti mi franse, hene i widis mamusukuɗoko kalaf naŋ ngi nduva zlenek malla ngwic hirnga
a wuzla guva ngi gudubun a En-Gedi.
Zil
15Yeme ɗu, kay, ka kuy teˀe, kay, ka kuy teˀe!
Hiri ɗike sleɗeɗe ka gonoko!
Ngwasa
16Kay, ka kuy teˀ, mikiɗamay ɗu, kay, ka kuy teˀe!
Gwat ngi hin ndra kuluf kulf ka kalaf tukuzoŋ!
17Hay ndra i miɗiya ti mbal ngi dum ngi miter,
baburum ndra i miɗiya ti dum ngi migidaŋ mimezle.#1.17 Sipre i widis misi dum naŋ a gam di slra ngi ɗiya gwat mezlehey.
Currently Selected:
DIMIS MIMEZLE 1: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.