ABDIYAS 1
1
1Abdiyas mupur gwat ti kleŋ.
Bumbulvuŋ, Buymisemuŋ a ɓi ani vur hirwuy Edomo:
Bumbulvuŋ mitil mi ti Edom masa tiri diŋ
I cinam labara le, i labara muso ti vu Bumbulvuŋ.
Asi a slin le ng'avu sukwi ngi mizli, a ɓi:
«Akum kutum, i ra zlaka hirwuy Edomo ngi kiɗa vu!»
2Buymisemuŋ a ɓi: «Yawwa Edom, i wuɗ i tiri ti ka sukwi meciɗek a wuzla sukwi mekelemeye.
Mizli a sa hirsukuw putuk wãˀ.
3Maguw gilaw i huhumo vu ɗik na,
ki ndir kulaˀ ar butumoy,
yo ki hin tup ar li miɗingirey,
joˀ ki wuluk, ki ɓi na:
«Masa pi ti ya sar nga ruwuy i wa maka?»
4Ko da ki ru le sindik nga muŋ kaɓa kurom,
ɓa ki ɗiya hay ɗik ngi ki tesle a wuzla wurzlaŋhay tekeɗe kwana,
yi sa pu haŋ nga ruwuy na si.
I ya Bumbulvuŋ maɓi.
5Pura ɗi: da muhuloy a coko le ngi hay ɗike,
yo da mivi vuhoy a soko le ngi hay ɗike ti duvuɗu na,
a pulukuw mbak k'ada setette kwa!
A huloko gwat ngi hay ɗikeye cek ta kwa?
Yo da muhuva gudubunoy a ngilaka yi ngi gudubuno le na,
a pulam miya naŋ ngi ngile neˀkini si takwa?
6Naŋ kanah ya, ka dideˀ ngi Esaw, gwat ɗikey i mupura taŋ le bleŋ bleŋ wãˀ!
Zlili ɗik muɗumohoyo i mubo taŋ le ngbay ar li babara.
7Mizli mujuwam ɓi ati ka, ara ɓulukuw tisi ruwuy ɗik avra,
ara tukunukuw.
Ngama ɗikey ara jukuw,
mizli, kum mazumam ar sikiɗ purla, a ɗuɗukuw le ng'ar kwar taŋ.
A ɓam ar ka na: «Ko lesl anta avu ka mata.»
8Ya Bumbulvuŋ i ɓi na: Na gisiŋ takwa?
«Ti hin mevel misa jiy le na,
misi sinmijileŋhey misi a Edom,
yo misi lesley misi a muwã Esaw na, i sa ngizla taŋ avra pay kini takwa?
9Ka walahay Temaŋ, soje bugawla ɗikeye, didak a sa muɗa taŋ haɗi,
hã mbur gar misi a muwã Esaw na, a sa kiɗakaŋ vagay,
asi kiɗa hirnga a gi le haɗi.
Edomoy miciram tisi mendere ngi Israyeley
10Kum masa pam mesem,
yo taŋ masa ngizlukum pay wãˀ na,
asi moˀore kum migaka da sukum kum, dideˀ ngi Zakopoy na.
11Tapas kum mizliram dibiɗ ati taŋ,
yo mizli mulakay majaka soje taŋhay,
mizli mekelemey micam nga viŋ taŋhay, dar a gam ceregezleŋ ngi zuma zlili ngi Zeruzaleme na,
naɓa kum vuna kwana, kum zleˀe kaɓa mizli mulak tayna vuna ya.
12Edomoy, hin ngi bonoy ngi sukum kumoy na,
anja ki hĩyãka ta.
Hin ngi bonoy ngi Zudahay mangizlam na,
ki mumulom di ta.
Ar hin ngi tuwuyo
ki singiram ar taŋ ta.
13Tapas mizli ɗuwoy mingizlam na,
anja ki ci ng'ar walahay taŋ zleˀe ta.
Tapas walahay taŋ mitiri diŋ na,
anja ki hĩyã zleˀe ta.
Tapas mizli ɗuwoy mingizlam na,
anja ki hila zlili taŋhaya zleˀe ta.
14Mizli mindiram ti siifahaya,
anja ki cici ar mifiliw ngi bi taŋ, ɓa ki ngizla taŋ zleˀe ta.
Mizli taŋhay mindiram ti siifa na,
ti hin ngi bonoyo ki vula taŋ ɓa a jaka taŋ ta.
15Asi hin ngi Bumbulvuŋ a ndilo le gweˀe,
hin ngi gi kiita da sukwi ngi mizli.
Gwat ka miga na, a sa gukuw di da ka aya.
Israyeley mupulaka cuwal taŋ ar Edomoy
16Naŋ kine Israyeley, kum misam bonoy ti himaˀ ɗu ar muwã ɗu mipal na,
sukwi mekelemey gar kwana, a sa sam hã mbak aya.
A sa sam bonoy, hã a wam di…
a sa susuymom.
17Amma mizli mindiram ti siifahay, a sa ɗumom a muwã Siyoŋ,
Siyoŋ a sa tiri pal a muŋ.
Mizli ngi Zakopoy a sa tiɓaka li taŋ a muŋ avu mizli mitiɓaka avu taŋ zleˀe na.
18Mizli ngi Zakopoy a sa tiram kaɓa vu,
yo ngi Zozefeye, kaɓa irne vu.
Amma mizli ngi Esawaya, a sa tiram kaɓa giziŋ.
Mizli ngi Zakopoy ati ngi Zozefey a sa bulam kaɓa vu, waɗ a wuraka mizli hanayna tuwa avra.
Ko mbur ngi Esaw masa ndir ti siifa anta loŋ ta.
Asi i ya Bumbulvuŋ miɓi.
19Mizli Zudahay mikini tir vay ruwuyo a sa pam a muwã Edom. Misi ngir li vay zugudumoyo ar hirwuy ngi Filistihey. Yo a sa pam a Samari, li ngi dideˀ ngi Efrayimey. Yo dideˀ ngi Benjameŋheye, a sa pam a Galaˀat.
20Mizli mihilahay zleˀe mumoko ti ruwuy mulak, soje tayna a sa ɓulaka mizli Fenisiheye sesẽŋ a Sarepta. Mizli mumoko tir ruwuy mulak nga Zeruzalemey misi a Sefarata, a sa tiɓaka walahay vay ruwuyoyo.
21Mizli milahay a sa jiɗam nga muwã Siyoŋ,
ɓa a waka hirwuy Edomo.
Joˀ Bumbulvuŋ a sa cifi buy taŋ.
Currently Selected:
ABDIYAS 1: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.