Mark 8
8
Yesu mimba mizli durmuk mufaɗ
(Yo pura Mat 15.32-39)
1Angi hin tayna, zigiduw a cikil le haɗi ma. T'anta ti gwat ngi zum ta. Yesu a zila mizli ngi seˀeheye, a ɓa taŋ na: 2«Zigiduw hana, ara giy ˀircece. Puraka, a gam le ani hin makir avu ya, yo t'anta ti gwat ngi zum ta. 3Da yi waha taŋ le, a ram le ti may na, may a sa sla taŋ zlambar a jiviɗe, asi mizli mekelemey a wuzla taŋ a soko kileŋ.» 4Mizli ngi seˀehey a mbiɗakaŋ di: «A ɓuh aka, mbur a lumo ɗaf ngi mba mizli hanayna amaka?» 5Yesu a cufuɗa taŋ: «Kum ti ɗaf kite ka?» A ɓakaŋ: «Tarnaˀa.»
6Joˀ a ɓa mizli ɓa a cifam a ruwuy. Dar a zuɓa ɗaf mitarnaˀ tuwa, a ga siseˀ da Buymisemuŋ, a ngila taŋ, a vula da mizli ngi seˀeheye, ɓa a wunkaka taŋ di, a wunkaka da zigiduwo. 7T'ada ti kilif memeɗehey zleˀe neˀ ma. Yesu a ɗuwul mi ara, a ɓa taŋ ɓa a wunkaka da mizli ma. 8Taŋ gar a zumam, hã a mbam. Yo a hilaka is naŋ mindir bulngus bulnguso, gadagar caɓ caɓ tarnaˀ. 9Mizli muzum naŋhaya, a gam gwat ngi durmuk mufaɗ gu. Dar Yesu a waha taŋ. 10Ar nah si na, a ci palalam ati mizli ngi seˀeheye, aru nga hirwuy Dalmanuta.
Farisahay mucufuɗam cekene
(Yo pura Mat 16.1-4)
11Farisahay a soko, a zlaka ngila mi ati Yesu. Ɓa a cam a kwacay naŋ na, a cufuɗam ɓa a ga taŋ cekene maso ti vu Buymisemuŋ. 12Yesu a niˀic ti gidaŋ fõh, a ɓi: «Mizli migweneheye, a cufuɗam cekene vur mike? Gisiŋ yi ɓu kum na: Anta sa gaka cekene da mizli migweneheye ta.» 13Joˀ a pula taŋ hirkim, a ci palalam a muŋ, a tuwuɗ nga dubazaw.
ˀIs ngi slikiɗa hapa ngi Farisahay ati ngi Herod
(Yo pura Mat 16.5-12)
14Mizli ngisi Yesuhoy a puyukam hirnga le ngi zuɓa ɗaf a haŋ. Avi taŋ angi palalama na, ɗaf purla si. 15Yesu a kuta taŋ, a ɓa taŋ: «Jam lesl, wam vu avu ˀis#8.15 Is: i wiɗi ngi nasarahay ngi slikiɗa hapa muhulɓaka le. ngi slikiɗa hapa ngi Farisahay ati ngi Herodo.»
16A zlaka ngila mi ar wala taŋ, asi t'anta ti ɗaf ta tuwaŋ. 17Yesu a si na ɓi taŋ le, a cufuɗa taŋ: «Ki ngilam mi, ki ɓam kum anta ti ɗaf ta na, vur mike? Ki cinam t'aruŋ, yo ki slaka wala nah t'aruŋ kwa? Hirnga kumo gidaŋ kwa? 18Kum ada ti hiri, ki puram ta kwa? Kum ada ti slimiɗ, ki cinam ta kwa? Ki wulkam keŋ mata mbrike? 19Ti ya mingila ɗaf zlum da mizli durmuk zlum na, ki hilaka is naŋ mubulngus bulnguso, gadagar caɓ caɓ kiteka?» A ɓam: «Kuruˀ nga cuw.» 20Yo ti ya mingila ɗaf tarnaˀ da mizli durmuk mufaɗ na, ki hilaka is naŋ mindire gadagar caɓ caɓ kiteka?» A ɓam: «Tarnaˀa.» 21Joˀ Yesu a ɓa taŋ: «Na, ki slaka wala nah t'aruŋ kwa?»
Yesu muwun hiri ngi mbur dangar a Betsayda
22Yesu ati mizli ngi seˀeheye, a ndilam a Betsayda. A sakaŋ ti mbur dangar, a tumbulokoŋ ɓa a ja haŋ ava. 23Yesu a ja mbur dangar tuwa kaw avu haŋ, a bi di nga duba gala, a gaŋ tazlay avu hiri, a buca haŋ ava, a cufuɗaŋ: «K'ada ki pur gwat kwa?» 24Dangar a wuna hiri wunno, a ɓi: «Y'ada i pur mizli, yi pura taŋ kaɓa widisey. Na, ara ram ma.» 25Dar Yesu a bucaŋ haŋ avu hiri tuwa ma. Joˀ mbur a pur kweŋ kweŋ. Hiri a wun le, a pura gwataya, a sla wala taŋ gar muduba. 26Akẽh na, Yesu ɓula ngi hay naŋ, a ɓaŋ: «Ko ki ci ar walahaya ceˀ le ta.»
Piyer miɓi njah: Yesu i Mesi
(Yo pura Mat 16.13-20; Luk 9.18-21)
27Yesu ati mizli ngi seˀeheye, ara ram kini ng'ar walahay migweˀ gweˀ avu buy Sezare ngi Filip. Ti taŋ misi a jiviɗe na, Yesu a cufuɗa mizli ngi seˀeheye: «Mizli a ɓam vur ya mbrike? 28A ɓakaŋ: «A ɓam: ki Zaŋ mici mizli ar yam. Avu mekelemeye kwana, ki Eli. Mekelemeye mana, a ɓam: ki mbur ngi wuzla mijiviɗey.» 29Joˀ Yesu a cufuɗa taŋ: «Na, avu kumo, ki ɓam yi waka?» Piyer a slaŋ di, a ɓaŋ: «Ki Kristu.» 30Joˀ a buca taŋ ɓa a ɓaka ɓi nah da mbur ta wãˀ.
Yesu miɓa ɓi ngi muc naŋ waɗ ngi slikiɗ naŋ
(Yo pura Mat 16.21-28; Luk 9.22-27)
31Dar Yesu a zla a dubuna gwat da mizli ngi seˀeheye, a ɓa taŋ: «Sey Mangal ngi Mbur a si bonoy haɗa, mizli micawwahay, masay madiɗahay ati buy ngi ɓimujuwahaya, a hizigakaŋ avra, anja a kiɗakaŋ vagay. Yo angi hin mimakir naŋ na, a sa slikiɗ a muŋ.» 32A ɓa taŋ di njah njah si. Piyer a bi di baˀ pal naŋ, a zla mbiɗaŋ hirnga.
33Amma Yesu a mbuɗo hirik, hiri taˀ avu mizli ngi seˀehey, a mbiɗa hirnga da Piyere, a ɓaŋ: «Kirih nga dirba ɗu, Satan, asi wuluk ɗike, i wuluk ngi Buymisemuŋ ta, amma i ngi mizli si.» 34Dar a zilo zigiduw gar ati mizli ngi seˀeheye, a ɓa taŋ: «Da mbur a wuɗ sipi ɗu le na, anja a pula wuluk vur hirnga naŋ, a zuɓa dum naŋ mizlira, a sipiy. 35Asi mike na, ko wa gar mawuɗ laha siifa naŋ na, a sa zizaŋ, amma ko wa gar masa ziza siifa naŋ asi ya waɗ asi Ɓimezle na, a sa lahaŋ.
36Ko da mbur a luuma gwat ngir duniya hana le gar, amma da a ziza siifa naŋ le aseˀe na, a sa lum di i mike? 37Malla gwat ada, ɓa mbur a vula ngi mbiɗa hirnga ngi siifa naŋ kwa? 38Vurˀe, da mbur ara gi mesem ti ya, yo ara gi mesem ngi ɓa ɓi ɗu a wuzla mizli migwenehey, migi mungahay, migi madama hanayna na, naɓa Mangal ngi Mburo kwana, ti naŋ masa sawa angi dudok ngi Cine ati modro naŋhay mipal na, sa gi di mesemaya.»
Currently Selected:
Mark 8: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.