Mark 15
15
Yesu a mbuŋ Pilat
(Yo pura Mat 27.1-2,11-14; Luk 23.1-5; Zaŋ 18.28-38)
1Ngi miprik prik na, masay madiɗahay a kusom ati mizli micawwahay, yo buy ngi ɓimujuwahay waɗ mizli ngir kus taŋ madiɗa ngi mingila wuyoy gar. A juwaka Yesu, a ram di, a vulaka da Pilat. 2Pilat a cufuɗaŋ: «Ki buy ngi Yudehey kwa?» Yesu a mbiɗaŋ di: «Ki ɓa le ta kwa.» 3Masay madiɗahay a soko, a kupakaŋ ɓi haɗi. 4Pilat a cufuɗaŋ ma: «Ki mbiɗa ta kwa? Cin, taŋ makupukuw ɓihey haɗa na, ki mbiɗa ta kwa?» 5Amma ko Yesu a mbiɗa neˀ mata, hã a zuma hirnga da Pilata.
Migaka kiita ngi muc da Yesu
(Yo pura Mat 27.15-26; Luk 23.13-25; Zaŋ 18.39—19.16)
6Angi muguzlum Pak migi le gar na, Pilat ada pula taŋ mbur dangay mbak le, mbur taŋ mawuɗam. 7Ti di nah na, mbur ada, a zilaka Barabas. Naŋ ar dangay ati mizli mislikiɗa ɓihey, ti taŋ mislikiɗam ɓi na, a kiɗam mbur le vagay. 8Mizli a jiɗam ng'avi Pilat a hay naŋ, a zlaka a cufuɗakaŋ, ɓa a ga kaɓa naŋ misirik di zleˀe. 9Pilat a mbiɗa taŋ di: «Ki wuɗam ɓa yi pulukum Buy ngi Yudehey na kwa?» 10Asi a si na le kuy kuy, masay madiɗahay a vulakaŋ di ti suloŋ. 11Amma masay madiɗahay a paka mi da zigiduwo, ɓa a cufuɗam, a pula taŋ Barabas zuwen. 12Pilat a zla, a ɓa taŋ: «Ki wuɗam ɓa yi gi mi ti mbur kum mazilaka Buy ngi Yudehey na ka?» 13A tilam mi, a ɓam ma: «Dira avu dum mizliraŋ!» 14Pilat a ɓa taŋ: «A gi gwat malambaˀ wanaka?» Amma a tilam mi ti gidaŋ fineˀ mizli ma: «Dira avu dum mizliraŋ!» 15Pilat a wuɗ ɓa a gi gwat ngi cira hiri da zigiduwo, a pula taŋ Barabasa, dar a vula Yesu ɓa a sliɗakaŋ, a dirba nah, ɓa a diraka avu dum mizliraŋ.
Sojehey misingiram ar Yesu
(Yo pura Mat 27.27-31; Zaŋ 19.2-3)
16Sojehey a ram ti Yesu nga wazlaray Pilat, ar li gi kiita, a zilaka sojeheye gar. 17A kakaŋ zana gagaza, a fuɗam loppol ngi hadaw, a cakaŋ di a hirnga. 18Dar a zlaka a jakaŋ salalay, a ɓakaŋ: «Zuy zuy aya, Buy ngi Yudehey!» 19A kiɗakaŋ a hirnga ti lavaɗ, a tufakaŋ tazlay, a dilkam, a hurkom a mbuŋ naŋ. 20A dirba taŋ misingiram anga na, a cukokoŋ zana gagaza tuwa avra, a kakaŋ zana naŋhay a muŋ. Joˀ a bam di ɓa ara diraka avu dum mizliraŋ.
Midiraka Yesu avu dum mizliraŋ
(Yo pura Mat 27.32-44; Luk 23.26-43; Zaŋ 19.17-27)
21Mbur ngi hirwuy Sirene ada, a zilaka Simoŋ, i cine ngi Aleksaŋdir ati Rufus. A mo ti ɓuh, ara cuh baɗ ti kẽh. A tikakaŋˀay, ɓa a zuɓa dum mizlira ngi Yesu ɓa a jijiraŋ. 22Joˀ a ram ti Yesu ng'ar li mazilaka Golgota, mbiɗeˀvra: guduguzluŋ hirnga. 23A wuɗam ɓa a vulakaŋ mbaazla milihiɗa ti gwat miɗalak, ɓa a saŋ, amma Yesu a ngum si naŋ ta. 24A diraka avu dum, a kiɗam caca ngi wuɗka zana naŋhaya, ɓa a sinaka, mbur gar a sa lum wanaka na. 25Taŋ midraka na, naɓa i pas ngi vula yam da pilisi. 26Ɓi taŋ migakaŋ kiita ngi muc aseˀe vuna, a tohoko toh toh ar dum misliprak, a tohoko na: «I buy ngi Yudehey» kini. 27A diram mufuyvuhoy le cuw avu dum aciki Yesu ma. Pal tir vay hazum naŋ, yo pal tir vay gula naŋ.#15.27 Mekelemey a tohoko aka: 28Mingiɓi ngir Ɓimutoho a gi le kahana, a ɓi na: «A slufakaŋ a wuzla mufuyvuhoy.» 29Mizli macohom ti kẽh, a hizigiɗam hirnga, a zakaŋ, a ɓakaŋ: «Hey, ka mambuzla hay ngi Bumbulvuŋ, ɓa ki ndira hiri naŋ a muŋ, angi hin makir tuwa, 30laha hirnga ɗike ta haŋ ɗike so, po sar tir dum mizlira!» 31Naŋ kanah ma, masay madiɗahay ati buy ngi ɓimujuwahay, a singiram anga ar wala taŋ, a ɓam: «A lih mizli mekelemey le, amma a laha hirnga naŋ gu ta! 32Mesi, buy madiɗa ngi Israyele, anja a po sar wurenna tir dum mizlira, ɓa i puraka, yo ɓa i tiɓakaŋ so.» Mizli midiraka taŋ avu dum aciki naŋ tuwa, a zakaŋ aya.
Muc ngi Yesu
(Yo pura Mat 27.45-56; Luk 23.44-49; Zaŋ 19.28-30)
33Ngi wuzla papas na, luvuŋ a gi asi ruwuyo gar, a zik hã a ndila pas ngi ɓula away ngi hay. 34Yo ti pas ngi ɓula away ngi hay na, Yesu a til mi: «Eloy, Eloy, lemasabaktani?» Mbiɗeˀvra: «Bumbulvuŋ ɗu, Bumbulvuŋ ɗu, ki puliy fuk vur mike?» 35Mizli mekelemey midedeŋ akẽh micinaka na, a ɓam: «Cinaka ayɗi, ara zila Eli!» 36Mbur pal a kil, a yupo gugumay angi mbaazla mikwerek, a ngika ngik avu lavaɗ, a tilaŋ di ɓa a saŋ, a ɓi: «Ɗagay, purukum di da Eli a sa sawa, a po di sar ti nga kwana.» 37Amma Yesu a til mi ti gidaŋ ma, a mucu. 38Dar godo ngir hay ngi Bumbulvuŋ a Zerusalem a ngir cããt a wuzla cuw, zle a muŋ, sesẽŋ a ruwuy. 39Madiɗa ngi soje ngi romahay mideŋ a mbuŋ naŋ na, naŋ mupura naŋ mamuc kanah tuwa na, a ɓi: «Mbur hana i Mangal ngi Buymisemuŋ zleˀe gisiŋ!» 40Ngwasay ada, taŋ zar, ara puroko hiri. I ti Mariya ngi Magdala, Mariya mumuŋ ngi Zak meciɗek ati Zozes waɗ Salome, t'ada a wuzla taŋ ya. 41Ti Yesu misi a hirwuy Galile zleˀe na, t'ada ram aseˀeŋ, ada jinakaŋ, yo waɗ ngwas mekelemey haɗi miram aseˀe nga Zerusaleme.
Mikaka vagay ngi Yesu ar vigiɗi
(Yo pura Mat 27.57-61; Luk 23.50-56; Zaŋ 19.38-42)
42Pastaˀ a gi le si, yo i hin ngi ɗiya gwatay, mbiɗeˀvra: ɓa put ti miprik naŋ na, i hin ngi sabat. 43Zozef ngi Arimate a ndilawa. Naŋ i mbur madiɗa ngi wuzla kus ngi mingila wuyoy, naŋ kwana ara kutuko Zumabuy ngi Buymisemuŋ ya. A tus didak ngi ci ngi hay Pilata, ɓa a cufuɗa vagay ngi Yesu. 44Pilat micina Yesu a muc le si na, a zumaŋ hirnga le. A zilo madiɗa ngi sojeheye, a cufuɗaŋ: «A muc zlezle, a zik le kwa?» 45A dirba madiɗa ngi sojehey miɓaŋ di tuwa na, a pula jiviɗ da Zozef, ɓa a zuɓa vagay ngi Yesu. 46Zozef a hiɗik gabaga ngi dika vu, a po sar ti vagay ngi Yesu tir dum mizlira, a tuwuɗa ti gabaga tuwa, ara ka angi vigiɗ muguroko angi mandazlay muwã zleˀe. Dar a gidigilo ɗugur dasl ameˀe. 47Mariya ngi Magdala ati Mariya, mumuŋ ngi Zozes, a puraka li taŋ mikaka anga na le.
Currently Selected:
Mark 15: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.