Mark 10
10
Dubun ar ɓi ngi wunuk ngi zil ati ngwas
(Yo pura Mat 19.1-12; Luk 16.18)
1Ti Yesu mucuh ti kẽh na, aru nga hirwuy Yude, a dubazaw Zurdeŋ. Zigiduw a kus le gun hirnga naŋ, a dubuna taŋ gwat kaɓa naŋ maga hõyyõ tuwa mani.
2Farisahay a kirohoko ng'ava, ɓa a cam a kwacay naŋ, a cufuɗakaŋ: «Ɓimujuwa ndra a pula jiviɗe le, ɓa mbur a ɓula ngwas naŋ kwa mbrike?» 3Yesu a mbiɗa taŋ di: «Moyis a tuhukum di ar ɓimuɗuva mbrike?» 4Taŋ a ɓakaŋ: «Moyis a pula jiviɗ le da mburo, ɓa a tuh ɗerewol ngi ɓula ngwasa toh toh na, naɓa a wunkam zuy.» 5Yesu a ɓa taŋ: «Moyis mutuhukum ɓimuɗuva nah na, vur hirnga kumo gidaŋ. 6Amma angi zli virzi ngi duniya, Buymisemuŋ miga taŋ na, i zil ati ngwasa. 7Vurˀe, zil a sa pula cine ati mumuŋ, a sa jumom ati ngwas naŋ. 8Yo taŋ cuw taŋ a sa tiram dumvu purla. Naŋ kahana, t'anta cuw mata, amma dumvu purla. 9Vurˀe, gwat Buymisemuŋ mujumo le na, anja mbur a wunka mata.» 10Ti taŋ mindilam a haya na, mizli ngi seˀehey a cufuɗaka Yesu vur ɓi nah ma. 11A ɓa taŋ: «Da mbur a ɓula ngwas naŋ le, a zuɓ mekelem le na, naɓa a gi madama le avu ngwas naŋ mudumbuŋ. 12Naŋ kine ya, da ngwasa pula zil naŋ le, a sliˀi le na, naɓa a gi madama le.»
Yesu muɗuwula mi da ziri memeɗehey
(Yo pura Mat 19.13-15; Luk 18.15-17)
13Mizli a soko ti ziri ng'avi Yesu, ɓa a buca haŋ avu taŋ, amma mizli ngi seˀehey a bucaka taŋ. 14Yesu mupura kahana na, a ji mevel, dar a ɓa taŋ: «Pulaka ziri a soko nga vi ya! Ki tikaka taŋ ta, asi zumabuy ngi muŋ i ngi mizli misi ka taŋ. 15Gisiŋ, yi ɓu kum na: mbur matiɓa zumabuy ngi Buymisemuŋ kaɓa zuŋ meciɗek ta na, anta sa ci anga ta.»
16Dar a zuɓa ziri tuwa gumbuˀ gumbuˀ a haŋ, a buca haŋ avu taŋ bacca bacca, a ɗuwula taŋ mi.
Mbur misi zlili
(Yo pura Mat 19.16-30; Luk 18.18-30)
17Ti Yesu mazuɓa jiviɗ na, mbur a kilo ti kil ng'avaŋ, a huruk huruk a mbuŋ naŋ, a cufuɗaŋ: «Kumani mezle, sey yi gi mi ɓa i lum siifa ngi sete ka?» 18Yesu a ɓaŋ: «Ki ziliy mbur mezle vur mike? Mezle sey i Buymisemuŋ pal naŋ, mekelem anta. 19Ki si na ɓimuɗuva le: ‹Ki kiɗ hirnga ta, ki gi madama ta, ki hul ta, ki gi sedewo ti slir ta, ki gi malambaˀ da mbur ta, ɗuva hirnga da bunuk ati munuko.›» 20Mbur tuwa a mbiɗaŋ di: «Kumani, yi zla ja ɓi hana a hirnga diga ya misi ti zuŋ.» 21Yesu a puraŋ cum cum, a wuɗaŋ le, a ɓaŋ: «Gwat purla a ndiruw le: ara hiɗika gwat ɗikey gar avra, ɓa ki vula dala nah da misi murgahay, ɓa kisa lum zlili ngi muŋ. Yo so sipiy so.»
22Amma mbur tuwa, naŋ micina mingiɓi hana na, a gaŋ kuy ta, aru ti ndurɗo hiri, asi naŋ ti zlili haɗi. 23Yesu a bula hiri bal bal a cikeˀe akẽh na, a ɓa mizli ngi seˀeheye: «Kay, naŋ tuwaˀ ɓa misi zlilihey a cam ng'ar zumabuy ngi Buymisemuŋ!» 24Mizli ngi seˀeheye, ɓi nah a zuma taŋ hirnga haɗa, amma Yesu a ma taŋ hiri nah ma, a ɓi: «Ziri ɗuwoy, kay, naŋ tuwaˀ ɓa ngi ci ng'ar Zumabuy ngi Buymisemuŋ! 25Zlogomo a ci tir vigiɗ ngi batala kutum fineˀ mbur misi zlili maci ng'ar Zumabuy ngi Buymisemuŋ.» 26Ɓi nah a zuma taŋ hirnga ti gidaŋ ava ma, a ɓam ar wala taŋ: «Da kine na, malih gu i waka?»
27Yesu a pura taŋ cum cum, a ɓa taŋ: «Avu mizli, i gwat magi ta ɓula, amma avu Buymisemuŋ, kanah ta, asi gwat mafucuka Buymisemuŋ, anta.» 28Piyere zla a ɓaŋ: «Ani, ndra, i puloko gwat ndraˀahaya le gar ɓa i supukuw.» 29Yesu a ɓaŋ: «Gisiŋ, yi ɓu kum na: da mbur a pula hay naŋ le, malla sukum naŋ mizilehey ati mongosohoy, mumuŋ, cine, ziri naŋhay, malla guva naŋhay asi ya, yo asi Ɓimezle na, 30angi hin misi wurenna, a sa lum hayay, sukum naŋ mizilehey ati mongosohoy, mumuŋ naŋhay, ziri naŋhay ati guva naŋhay, waɗ a sa lum mizli masipakaŋ nder ndere ma, makaw skat. Yo angi hin masa sawa, a sa lum siifa ngi sete. 31Amma mizli ngi mbuŋhoy haɗi a sa tiram ngi dirbahay, yo mizli ngi dirbahay haɗi, a sa tiram ngi mbuŋhoy.»
Yesu miɓa ɓi ngi muc naŋ waɗ ngi slikiɗ naŋ sar mimakir naŋ
(Yo pura Mat 20.17-19; Luk 18.31-34)
32Yesu ati mizli ngi seˀeheye, taŋ a jiviɗ, ara ram nga Zerusalem. Yesu naŋ ɓaˀ a mbuŋ taŋ. Mevel ara sla mizli ngi seˀeheye, yo mizli maram asi taŋ ara zluwunam. Yesu a hila mizli mukuruˀ nga cuwo baˀ pal taŋ, a zla a ɓa taŋ ɓi ngi gwat masa gi ava: 33«Cinam, ani i ra ram nga Zerusalem. Adiga, a sa vulaka Mangal ngi mburo da masay madiɗahay ati buy ngi ɓimujuwahay, ɓa a jakaŋ. A sa gakaŋ kiita ngi muc, a sa vulakaŋ asi haŋ ngi mizli duniyahay. 34A sa singiram angaŋ, a sa tufakaŋ tazlay, a sa sliɗakaŋ, a sa kiɗakaŋ vagay. Yo hin makir a dirba nah na, a sa slikiɗi.»
Zak ati Zaŋ mucufuɗaka Yesu
(Yo pura Mat 20.20-28)
35Yo Zak ati Zaŋ, ziri ngi Zebedehey, a kirohoko ng'avi Yesu, a ɓakaŋ: «Kumani, gwat ndra masa cufuɗam avu ka na, i wuɗam anja ki ga ndra di.» 36Yesu a ɓa taŋ: «Ki wuɗam ɓa yi gukum mike?» 37A ɓakaŋ: «Pula ndra jiviɗ ɓa i cifam ar li ngi dudok ɗike, mbur pal tir vay hazum ɗik, pal mekeleme kwana, tir vay gula ɗiki.» 38Amma Yesu a ɓa taŋ: «Ki sinaka gwat kum macufuɗama ta. Sikiɗ ngi bonoy ya masa sa na, ki saka gu kwa? Malla ci ar yam ya masa ci na, ki cam anga gu kwa?» 39Zak ati Zaŋ a ɓakaŋ: «I ɓusaka gu.» Yesu a ɓa taŋ: «Sikiɗ ngi bonoy ya masa sa na, kisa saka, yo ci ar yam ya masa ci na, kisa cam. 40Amma ɓa ngi cifi tir vay hazum ɗu ati vay gula ɗu na, mavula jiviɗ naŋ, i ya ta. Asa vulaka da mizli miɗiyaka hĩˀĩ vur taŋ.» 41Mizli mekelemey mukuruˀhoy micinaka ɓi nah kahana na, a jam mevel ar Zak ati Zaŋ. 42Yesu a zila taŋ, a ɓa taŋ: «Ki sinaka le, mizli micifaka taŋ le kaɓa buyoy angi zigiduw na, ara tikaka ˀay da mizli, mizli madiɗahay kwana, ara waka mizli. 43Amma a wuzla kumo, kanah ta. Da mbur a wuzla kumo, a wuɗ le ɓa a tiri madiɗa na, anja a tiri gawla kum jak. 44Yo da mbur a wuzla kumo, a wuɗ le ɓa a tiri mbur mudumbuŋ na, sey a tiri beke ngi mizli gar. 45Asi Mangal ngi mbur a so na, ɓa mizli a gam gawla naŋ ta, amma ɓa a gi gawla ngi mizli, yo ɓa a vula siifa naŋ ngi mbiɗi hirnga ngi mizli haɗi.»
Yesu muwuna hiri ngi Bartime, mbur dangar
(Yo pura Mat 20.29-34; Luk 18.35-43)
46A ndilam le a Zeriko. Ti Yesu mabi ti Zeriko ati mizli ngi seˀehey waɗ zigiduw haɗi na, Bartime, mbur dangar, mangal ngi Time, a cifi le aciki jiviɗi, ara suk gwat avu mizli macohomo. 47Ti naŋ micina, i Yesu mbur Nazaret macuh na, a zla tila mi: «Yesu, Mangal ngi Davit, puriy ˀircece takwa!» 48Mizli haɗi a bucakaŋ ɓa a taˀa mi, amma naŋ a til mi ti gidaŋ ava ma jak: «Mangal ngi Davit, puriy ˀircece takwa!» 49Yesu a cici, a ɓi: «Ziloko di.» A ziloko mbur dangar tuwa, a ɓakaŋ: «Tum vu, slikiɗi, ara ziluw.» 50A hiziga godo naŋ kacap avra, a slikiɗ bap, a so ng'avi Yesu. 51Yesu a cufuɗaŋ: «Ki wuɗ ɓa i guw mike?» Dangar a mbiɗaŋ di: «Kumani, anja ɓa yi pur.» 52Yesu a ɓaŋ: «Tiɓi ɗik a lihuw le, a ru.» Ar nah si na, ara pur, dar a zuɓa jiviɗ, a sipa Yesu.
Currently Selected:
Mark 10: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.