Mark 1
1
Zaŋ mici mizli ar yam mitil mi
(Yo pura Mat 3.1-12; Luk 3.1-18; Zaŋ 1.19-28)
1Ɓi mezle ngi Yesu Kristu, Mangal ngi Buymisemuŋ, a zli anihĩ: 2A tohoko ɓi naŋ zleˀe angi ɗerewol ngi Ezayi, mijiviɗ ngi Buymisemuŋ, a ɓi na:
«Pura, y'ani slina mislin ɗu a mbuŋ ɗike, ɓa a ɗiyuw jiviɗi.
3Mbur ara til mi a wuzla ɓuh, a ɓi na:
«Ɗiyaka jiviɗ da Bumbulvuŋ,
cicakaŋ jiviɗ naŋhaya cir cir!»
4Naŋ kine, Zaŋ mici mizli ar yama, a bo a ɓuh, ara til mi ngi ci mizli ar yam, a ɓi: «Mbiɗaka mevel kumoyo, anja a cukum ar yam, ɓa Buymisemuŋ a puya mungra kumoy avra.» 5Mizli ngi hirwuy Yudehey ati mizli ngi Zerusalemey gar, a ram ng'avaŋ. Taŋ manjikaka mungra taŋhay na, joˀ Zaŋ a ca taŋ ar yam a mizaw Zurdeŋ. 6Zaŋ a ki zana mijaka ti ngwic ngi zlogomo, a juwa kwacaya wak ti kanda ngi garaka. Gwat ngi zum naŋ i yuk ati mam ngi ɓuh. 7A til mi, a ɓi na: «Mbur ada sawa a dirba ɗu. Naŋ gidaŋ fineˀ ya, yi ndila ter ngi guɓ ngi puska zeweɗ ngi tarak naŋhaya ta. 8Yi cukum le ar yam ɓula, amma naŋ a sa cukum ar yam ti ˀUf Mipal.»
Zaŋ mica Yesu ar yam, yo Satan mitikinaŋ
(Yo pura Mat 3.13—4.11; Luk 3.21-22; 4.1-13)
9Yo ar hin nah na, Yesu a so baɗ a Nazaret, hirwuy Galile, joˀ Zaŋ a caŋ ar yam a mizaw Zurdeŋ. 10Hirak ti Yesu mabo tir yama na, a pura muŋ a wucuh le wucah, ˀUf Mipal ara po sar nga hirnga naŋ ka gonoko. 11ˀAy a cino paɗ a muŋ, a ɓi: «Ki mangal ɗu ya mawuɗow haɗa, i hĩyã le ɓa i wunuw.»
12Ar nah na si na, ˀUf Mipal a ngi hirnga ti Yesu nga wuzlaɓuh. 13A zik a wuzlaɓuh a diga hin kukur mufaɗ, Satana ra tikinaŋ. Naŋ a wuzla gwat ngi ɓuhoy, joˀ modro ngi Bumbulvuŋhoy a gakaŋ gwat naŋ mawuɗo.
Yesu mizila miji kilifey mufaɗa
(Yo pura Mat 4.12-22; Luk 4.14-15; 5.1-11)
14A dirba taŋ mijaka Zaŋ ng'ar dangay na, Yesu aru nga Galile, ara til mi ti Ɓimezle ngi Buymisemuŋ, a ɓi na: 15«Hin a ndila le muduba, Zumabuy ngi Buymisemuŋ a kiroho le gweˀe! Mbiɗaka mevel kumoyo, tiɓaka Ɓimezle.» 16Ti Yesu macuh deŋŋe a mi yam madiɗa ngi Galile na, a pur miji kilifey cuw, Simoŋ ati sukum naŋ Andre, a ra kam zuvahay ng'ar yam ɓa a jam kilifi. 17Yesu a ɓa taŋ: «Supoko ya, yi sa tiri ti kum miji mizli.» 18Ar nah na si na, a pulaka zuva taŋhaya, a sipakaŋ. 19A kirih nga mbuŋ neˀ ma na, a pura Zak ati sukum naŋ Zaŋ, ziri ngi Zebedehey, taŋ a hur palalam taŋ, ara ɗiyaka zuva taŋhaya. 20Dar Yesu a zila taŋ kutum. Taŋ a pulaka cine taŋ Zebede ati migi slrahay a hur palalama, a sipakaŋ.
Mbur misi setene a hirnga
(Yo pura Luk 4.31-37)
21Yo Yesu ati mizli ngi seˀehey a cam ng'ar walahay Kapernahum. Ngi pas sabat na, Yesu a ci ng'ar hay ngi diradibiɗ, a dubuna gwat da mizli. 22Gwat naŋ madubuna taŋ di na, a zuma taŋ hirnga le haɗa, asi a dubuna taŋ di kaɓa mbur miwi mizli, anta kaɓa ngi buy ngi ɓimujuwahay ta. 23Hirak ti nah na, mbur ada ar hay ngi diradibiɗ taŋ, setene a hirnga. Mbur tuwa a widi, a ɓi: 24«Ki wuɗ mi avu ndra ka, Yesu mbur Nazarete? Ki so ɓa ngi ziza ndra kwa? Yi sinuw le, ki mbur Mipal ngi Buymisemuŋ.» 25Yesu a mbura himaˀ da setene tuwa, a ɓaŋ: «Taˀa mi, bi ti vu mbur hana!» 26Setene a wusa mbur tuwa ti gidaŋ gwic gwic, a widi ti gidaŋ, a bi ti vaˀa. 27Taŋ gar, ɓi nah a zuma taŋ hirnga le haɗi, a zlaka a cufuɗam vu ar wala taŋ, a ɓam: «I ɓi wana hana ma ska? Hana i dubun nawaya ngi mbur miwi li hã a wa setenehey, a cinakaŋ mi!»
28Angi nah na vuna si na, slimiɗ ngi Yesu a zil ti ka ti ka angi hirwuy Galile gar.
Yesu mumbul misi jijihey haɗa
(Yo pura Mat 8.14-17; Luk 4.38-41)
29Ti Yesu mubam tir hay ngi diradibiɗe na, a ram deŋŋe ngi hay Simoŋ ati Andre. Zak ati Zaŋ a ram aseˀeŋ ya. 30Dambalaka milar ngi Simoŋ a ro tupu, vu ava culoko. Ti Yesu mindilo ndil si na, a ɓakaŋ ɓi ngi ngwas nah. 31Yesu a kirih ng'avaŋ, a jaŋ kaw avu haŋ, a slikiɗaŋ. Vu muculok tuwa a tislaŋ, a zla a ga taŋ gwat ngi zum. 32Ngi pastaˀ naŋ, naɓa pas a diɗ le si, mizli a sakaŋ ti misi jijihey gar ati misi setenehey gar. 33Mizli ngir walahaya gar, a kusom a mizlingre Simoŋ. 34Yesu a mbulo mizli masam bonoy ti jijihey wal wal gar, yo a ɓul setenehey haɗi ti hirnga mizli ma. Ko a pula setenehey ɓa a ɓam ɓi ko neˀ ta, asi taŋ a sinakaŋ le.
Yesu mubula hirwuy Galile ti tila mi ti Ɓimezle
(Yo pura Luk 4.42-44)
35Ngi miprik, ngi li biŋ biŋ aruŋ na, Yesu a slikiɗ, a bi, aru nga pala silaŋ pal naŋ. Joˀ a dir dibiɗ a diga. 36Simoŋ ati cil naŋhay a zlaka a ram ti sipakaŋ. 37Ti taŋ mulumakaŋ na, a ɓakaŋ: «Mizli gar ara ram ti sipi ɗike.» 38Amma Yesu a ɓa taŋ: «Akum ng'ar li mekelem, ng'ar prok migweˀ gweˀhey na, ɓa yi til mi ti Ɓimezle a diga ya. Asi yi so na, vurˀe.» 39Joˀ a bula hirwuy Galile gar, a dubun gwat da mizli ar hay ngi diradibiɗ taŋhay, yo a ɓul seteneheye ma.
Yesu miɗiya mbur misi kukula
(Yo pura Mat 8.1-4; Luk 5.12-16)
40Mbur misi kukula a so ng'avi Yesu, a huruk huruk a mbuŋ naŋ, a tumbuloŋ, a ɓaŋ: «Da ki ngum na, ki ɗiyiy gu.» 41Yesu a puraŋ geˀ ˀircece, a tila haŋ, a wusaŋ, a ɓaŋ: «Yi ngum le, ɗiyi!» 42A haŋhaŋ si na, kukula a muɗ mi le vaŋ, a ɗiyi le kuleɗ kuleɗe. 43Dar Yesu a ji mevel angaŋ, a ɓula kutum, 44a ɓaŋ: «Ji lesl, anja ki ɓa ɓi nah da mbur ta. Amma ara biga vu ɗik da masay, yo vula gwat ngi mikuli vur ɗiyi ɗike, kaɓa Moyis miɓa ɗaˀ le na, ɓa mizli gar a sinaka ki ɗiyi le muduba.» 45Amma ti naŋ mucuh na, a zla til di mi ti gidaŋ, a waha ɓi nah ar li gar, hã Yesu a ci bidas ng'ar walahaya gu mata, amma a cifi ti vra ti vra ti ɓuhoy. Dar mizli a soko ng'ava ti ka ti ka gar.
Currently Selected:
Mark 1: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.