MALASI 1
1
1Bumbulvuŋ a ɓa Malasi ɓa a ɓa mingiɓi naŋ da Israyeley.#1.1 Malasi, a mbiɗeˀvra: ‹mislin ɗu›, (pura 3.1). Weˀ na, mijiviɗ malasi a til mi ti mingiɓi naŋ ar wala ngi vi 480/460, dumbuŋ ar so ngi Yesu Kristu, mbiɗeˀvra vi kukur cuw malla kukur makir dumbuŋ ar Nehemi mindil a Zeruzalem (pura Neh: 1.1)
Bumbulvuŋ a wini di i Israyel
2Bumbulvuŋ a ɓi na: «I ra wuɗukum», amma kumo, ki ɓam: «Mabiga ki ra wuɗa ndra vuna i mike?» Bumbulvuŋ a mbiɗa taŋ di: «Esaw i sukum ngi Zakop takwa? Amma yi wuɗ di i Zakop. I ya Bumbulvuŋ maɓi. 3Dar yi hirsa Esawa. Yi pula muwã ngi Esawaya mbak, a tiram daŋ daŋ, yo hirwuy naŋ a ndir da kiriɓuh ngi wuzlaɓuh mikirɗak kirɗakay. 4Da Edomoy ara ɓam: «Mesene ndrahay a waham ndra walahayaya le, amma ndra, sey i ndiraka hiri taŋ a muŋ» na, ya Bumbulvuŋ misi gidaŋ wãˀa, i ɓa taŋ na: «Taŋ, anja a ndiraka taŋ a muŋ ɓula, na ya i sa waha taŋ avra na si. Dar mizli a sa caka taŋ slimiɗe: ‹Hirwuy ngi moˀore.› waɗ ‹Mizli misi Bumbulvuŋ mambiɗa taŋ hirnga, ko mbak le ta›. 5Ki sa puraka ti hiri kumo, joˀ kisa ɓam: «Bumbulvuŋ i madiɗa asi ruwuy Israyele gar.»
Ɓi ngi huruk huruk mizlir avu Bumbulvuŋ ta
6Mangal a cika hirnga da cine, yo gawla ngi mbur a cika hirnga da buy naŋ takwa! Na, da yi cine kum na, ama ani kum macikikiy hirnga vuna ska? Yo da yi buy kum na, ama ani kum macinikiy mi vuna ska? I ya Bumbulvuŋ misi gidaŋ wãˀ maɓi da kum masayay, kum maburɗaka slimiɗ ɗu na. Joˀ ki ɓam jak ma na: «I burɗaka slimiɗ ɗike ar wanaka» kini ma mbrike? 7Ki hiryaka ti kum masoko ti gwat ngi zum misi dili ng'ar li gi mikuli ɗu. Na ki ɓam: «I hiryukuw vuna mbri mbrike?» kini ma. Ki hiryaka ti kum maɓam zlahzlah: «Li gi mikuli ngi Bumbulvuŋ naŋ puɗaw ta na.» 8Da kum masoko di ngi gi mikuli i ginew dangar na, i gwat malambaˀ takwa? Yo da ki soko di i ginew mikiciɗek sar malla misi jiji na, i gwat malambaˀ takwa? Ani inga vulaka ginew misi kanah vuna da buy kum miwi li so. Ada sa ciraŋ hiri kwa? N'ada sa tuɓukum di ti mevel mezle kwa? I ya Bumbulvuŋ misi gidaŋ wãˀ maɓi. 9A dirba nah so na, ki tumbulikiy ya Buymisemuŋ, ɓa i purukum ircece. Magaka kahana gar na i kum. Y'ada i sa tuɓukum ti mevel purla sukwani? Macufuɗ kahana i ya Bumbulvuŋ misi gidaŋ wãˀa? 10Anja ɓa kisa ra bulam vu ar li gi mikuli ɗu lambaˀ ta na, a wuzla kumo, zliv mbur ada ngi gica mizlingre muduba sukwa? I ya Bumbulvuŋ misi gidaŋ wãˀ maɓi. Gwat maciriy hiri neˀ avu kum anta. Gwat kum mavulikiy di angi mikuli na, y'anta hĩyã ta ani! 11Slimiɗ ɗu ara zil haɗa a wuzla sukwi ngi mizli, zle tisi pas ngi miprik hã tisi pas ngi pastaˀa. Ar li gar na, mizli ara zlumam urdi vur ya, yo ara vulikiy gwat manja dili ngi gi mikuli, asi slimiɗ ɗu ara zil haɗa a wuzla sukwi gar. I ya Bumbulvuŋ misi gidaŋ wãˀ maɓi. 12Amma na, ki hiryaka li gi mikuli ɗu, dar ki ɓam: «Li gi mikuli ngi Bumbulvuŋ, i mihirya le, yo gwat ngi zum ngi raˀa mavulakaŋ di da naŋ, naŋ anta puɗaw wãˀ ta» kini ma! 13Yo ki ɓam ma na: «Kayya, hana i gira vu ngatara», yo ki gam di kaɓa ɓi nah a cukum ta, i ya Bumbulvuŋ misi gidaŋ wãˀmaɓi. Ginew muhulo, mikiciɗek sar, malla misi jiji na, ki soko di, dar ki gikiy di mikuli. Ki waka na ɓa i tiɓa tisi haŋ kumo sukwani? I ya Bumbulvuŋ maɓi. 14Mbur misi ti ginew mizile mezle ar gezleŋ naŋ, a pula nah mbak murvay. Amma a ɓi ngi vul, yo ngi gi mikuli da ya Bumbulvuŋ i ginew mezle ta na, nis a jaŋ le. Asi yi buy madiɗa, yo slimiɗ ɗu ara ga zluwun da sukwi ngi mizli. I ya Bumbulvuŋ misi gidaŋ wãˀ maɓi.
Currently Selected:
MALASI 1: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.