ZOWEL 1
1
1Bumbulvuŋ miɓa ɓi da Zowel, mangal ngi Petuwel.
Jaray ati kwalay
2Kum mizli micawwahay, cinam ɗagay,
kum mizli ngi si ruwuy Zudahay gar, jikaka slimiɗe.
Gwat misi kahana a gi le ɗaˀ mur kumo
malla mur dideˀ kumoyo kwa?
3Slufaka ɓi nah da ziri kumoy,
ziri kumoy a sa slufaka da ziri taŋhay,
yo taŋ kwana, a sa slufaka da tizer taŋ nga mbuŋ ya.
4Gwat ngi migam, misi mi ngi mumuyuŋ na, yuk a zuma le tirneˀ,
yo misi mi ngi yuko, tuˀuf a zuma le tirneˀ,
waɗ misi mi ngi tuˀufo, jaray a zuma le leɗeɗ.
5Kum muwam le, puɗkam, tuwam,
kum misi mbaazlahay gar, tuwam kaɗam kaɗam,
asi kum anta sa lumam mbaazla si mata.
6Mizli a zlaka hirwuy ɗu le ngi kiɗa vu,
taŋ gidaŋ haɗi, yo a slufam ta.
Taŋ ti sliŋ kaɓa ngi mobor,
mi taŋhayakaɓa ngi madiya moboroy.
7A tiram ti guva ngi gudubun ɗu kirɗak kirɗak,
a hiryaka guva ngi uruf ɗu liɓasl liɓasl wãˀ,
a kurɗoko duba taŋhaya kuruɗ kuruɗ, a paka taŋ haŋ saɓaɓaɓa a ruwuy,
mbak mihaŋ taŋhaya babara faw.
8Hislikam tuwuy, kaɓa zuŋ diili muzuɓ zil le wureˀ,
matuwuy vagay ngi zil naŋ, naŋ muzuɓa paɗ ngi diili naŋ.
9Hapa ngi vul ati mbaazla ngi puslo,
anta sa ram di ng'ar hay ngi Bumbulvuŋ mata.
Migi mikuli, mizli ngi slra ngi Bumbulvuŋhoyo,
a roko ti tuwuy ngi vagay.
10Guvahaya, i mumusukuɗohoy le tir tir,
hirwuy a ro ti tuwuy ngi vagay.
Alkamari i mitirnaˀa le, mbaazla dedeɗeke anta mata,
zuŋ mal muɗuco wureˀ anta ɗek mata.
11Kum muhuvoy, gam dəh dəh lambaˀ,
kum muhuva gudubunoy, tuwam irslik irslik,
vur ɓi ngi daw alkamari ati daw giziŋ kumoyo:
gwat ngi migam gar a hiryi le.
12Gudubun a muˀul le,
uruf a guvuˀ le,
widis grenade, Babazla waɗ widis pomoy,
na zle widis ngi zum ngir guvahay gar, a muˀulom le.
Mumul a kiɗ mi le avu mizli.
Mijiviɗ a ɓa mizli ɓa a gam dalyam, yo ɓa diram dibiɗ
13Kum masayay, kam zana ngi vagay,
tuwam kaɗam kaɗam,
kum migi slra ngir li gi mikulihey, tuwam ˀirslik ˀirslik.
Migi slra ngi Buymisemuŋ ndrahay,
soko, hinam ti zana ngi vagay ɓaˀ ɓaˀ avu vu,
hapa ngi vul ati mbaazla ngi pusl, anta ram di ar hay ngi Buymisemuŋ kumo mata.
14Gam dalyam ɓa ki tiram pal,
tilam mi ngi gi cikil mipal,
kusoko mizli micawwahaya,
waɗ mizli ngi si ruwuyo gar,
ng'ar hay ngi Bumbulvuŋ, Buymisemuŋ kum,
yo tilam mi ng'avu Bumbulvuŋ.
Hin ngi Bumbulvuŋ naŋ gweˀ
15Kayya! Hin nah na!
Hin ngi Bumbulvuŋ a ndilo le,
i hin ngi hirya gwat, Buymisemuŋ mupulo jiviɗ naŋ.
16Gwat ngi zum mikiɗ mi,
yo ar hay ngi Bumbulvuŋ,
mumul ati jiɗa mececẽleŋ anta mata na,
a gi a mihiri ndra ta kwa?
17Hilfa gwat mizliga, a ji ngbok ngbok avu ruwuyo, a muˀul,
hay ngi dawaya njoŋ njoŋ,
dirgwaɗaya i muwahahhay le,
asi alkamari anta mata.
18Cinam ginewey matuwam!
Sla taˀ gezleŋ, a ram taˀ dibiɗ lambaˀ:
asi li zum ginewey anta.
Ko tumuŋ ati ˀaway kwana, ara ngizlam.
Mijiviɗ midir dibiɗi
19Ya matil mi na ng'avi ka Bumbulvuŋ:
vu ara zuma li jigina ginewey a ɓuh,
irne vu njilim njilim, ara zuma widis ngir guvahaya cek.
20Ko gwat misãmi ngi ɓuhoy kwana,
ara mbiɗam hiri ng'avi ka:
Mizaway a hisikam le ngbasl ngbasl,
yo vu ara zuma li jigina ginewey a ɓuh.
Currently Selected:
ZOWEL 1: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.