Zaŋ 20
20
Zivi naŋ njoŋ
(Yo pura Mat 28.1-8; Mark 16.1-8; Luk 24.1-12)
1Cẽẽt ngi dimas, naɓa li mapur t'aruŋ na, Mariya ngi Magdala aru nga mizivi. A pura na, a gidigilaka ɗuguro le ti mizivi vuna. 2Dar a kil, ara luuma Simoŋ Piyer ati mbur ngi si Yesu, Yesu mawuɗaŋ zleˀe haɗa na, a ɓa taŋ: «A zuɓaka vagay ngi Buy Yesu tuwa le tir zivi, da ara kaka amaka na, i si na ka ta» 3Ti Piyer a bam ati mbur mekelem ngi si Yesu tuwa, a ram nga mizivi. 4A kilam cuw taŋ zlaɓ zlaɓ arleˀeŋ, amma mbur mekelem na, a kil fineˀ Piyere, a ndil dumbuŋ a mizivi. 5A guɓ guɓɓo ng'ar zivi, keɗ keɗ na, gabagahay sek anga, amma a ci ta ɓula. 6Simoŋ Piyer masupo di tuwa, a ndilawa ya. A ci ng'ar zivi, keɗ keɗ na gabagahaya t'ada sek akẽh. 7Amma gabaga misirtaka hirnga ngi Yesu ti naŋ na, naŋ anta a wuzla taŋ ta ɓula, i mufuɗa le faɗ faɗ ɓaˀ ar li mekelem pal. 8Dar mbur mekelem ngisi Yesu mindilo dumbuŋ tuwa, a ci ng'ar zivi ya, keɗ keɗ na, a tiɓa le, Yesu a slikiɗ le. 9Naŋ kine, Ɓimutoho miɓi: sey Yesu a slikiɗ ti wuzla mumucahay na, a slaka wala nah zleˀe t'aruŋ. 10Dar mizli ngisi Yesu mucuwoy tuwa, a mam ngi hay taŋ a muŋ.
Buy Yesu mibiga vu da Mariya ngi Magdala
(Yo pura Mat 28.9-10; Mark 16.9-11)
11Mariya a ro deŋ zleˀe avra, gweˀ a mizivi. Naŋ matuwuy na, ara guɓ ng'ar zivi cici. 12Keɗ na, modrohoy cuw, zana babarahay ɓaˀ ɓaˀ avu vu, joˀangi li mikaka vagay ngi Yesu anga tuwa, mekeleme tir li ki hirngaŋ, numuŋ tir li pi saray. 13Modrohoy tuwa a ɓakaŋ: «Ngwasa, ki tuwuy mike?»
A mbiɗa taŋ di: «A zuɓaka vagay ngi Buy ɗu le, da ara kaka amaka na, yi si na ta.»
14Naŋ maɓi kahana na, ara mbiɗi duba cici, keɗ na, Yesu naŋ da deŋ akẽh, amma i Yesu na, a si na ta. 15Yesu a ɓaŋ: «Ngwasa, ki tuwuy mike? Ki ru ti sipi waka?» Mariya a wa na, kaɓa i mbur mijigina jarne, a ɓaŋ: «Da i ka muzuɓa na, Buy, bigiy li ka mira ka na, ɓa i ra zuɓaŋ.» 16Yesu a ɓaŋ: «Mariya.» Mariya a mbiɗi hiri ng'avaŋ, a ɓaŋ ti mi Hebere: «Rabuni!» A mbiɗiavra: «Kumani». 17Yesu a ɓaŋ: «Ki tikiy ta, asi yi ru ng'avi Baha t'aruŋ. Amma ka, ara luuma sukum ɗuwoyo, ɓa taŋ na: i ra ru le ng'avi Baha, Cine kum, ng'avu Buymisemuŋ ɗu, Buymisemuŋ kum.» 18Dar Mariya ngi Magdala aru ng'avi mizli ngi si Yesuhoy tuwa, a ɓa taŋ: «Yi pura Buyo le!» Joˀ a slufa taŋ ɓi Yesu miɓaŋ di tuwa gar.
Yesu mibiga vu da mizli ngi seˀehey (Mat 28.16-20; Mark 16.14-18; Luk 24.36-49)
19Kalla tapas dimas nah vuna, ngi pastaˀa, mizli ngi si Yesuhoy a roko a hay, a gicaka miviŋheye le kap kap, vur ara zluwunam ti Yudehey. Yesu a so cici deŋ a wuzla taŋ, a ɓa taŋ: «Ndiram zuy zuy.» 20Naŋ maɓa taŋ kahana na, ara biga taŋ haŋhay ati cakaya cici. Mizli ngi seˀehey mupuraka Buy Yesu na, a mumulom haɗa. 21Dar Yesu a ɓa taŋ ma: «Ndiram zuy zuy. Ya i slinukum kaɓa Baha mislino ya na ya.» 22A dirba naŋ miɓi kahana na, a ˀufo ˀuf ar taŋ, a ɓa taŋ: «Tuɓaka ˀUf Mipal. 23Mizli kum masa puyaka taŋ mungra taŋhay avra na, Buymisemuŋ a sa puya taŋ mungra taŋhaya. Mizli kum masa ngumam puya mungra taŋhay avra ta na, Buymisemuŋ anta sa puya taŋ di ta ya.»
Yesu ati Tomas
24Ti Yesu muso na, a wuzla mizli mukuruˀ nga cuwoyo, naɓa mbur pal anta, i Tomas mazilaka Misa. 25Mizli ngi si Yesu mekelemey a sa ɓakaŋ di: «I puraka Buy Yesu le!» Amma naŋ a mbiɗa taŋ di: «Da yi pura li ngi ponti misi a hur haŋ naŋhay na ta, da yi ca muzuŋ haŋ ɗu anga ta, yo da yi ca haŋ ɗu ar vivi ngir cakay naŋ na ta na, y'anta tiɓa ta ndilaˀ!»
26Yo luuma pal a dirba nah ma na, mizli ngi si Yesuhoy tuwa a cikilam le ar hay tuwa ma, Tomasa naŋ da ati taŋ muduba. Miviŋhey i migicahay le giceˀ giceˀe, Yesu a so deŋ a wuzla taŋ, a ɓa taŋ: «Ndiram zuy zuy.» 27A dirba nah, a ɓa Tomasa: «Tulo muzuŋ haŋ ɗike, pura haŋ ɗuwoy tuwa. Tulo haŋ ɗike, ca ar vivi ngir cakay ɗu tuwa. Pula ngila mi, tiri mbur mitiɓi!» 28Tomas a mbiɗaŋ di: «Aw Bumbulvuŋ Buymisemuŋ, ɗu!» 29Yesu a ɓaŋ: «Ki tiɓi na, asi ka mupuriy na kwa? Mizli matiɓam manja a puram keɗ le na, taŋ ar mumul!»
Ɓi mutohoko ɗerewol misenna hĩˀĩ vurˀe
30Yesu a gi cekene mekelemey le haɗa mur mizli ngi seˀeheye, i mutoho taŋ gar ar ɗerewol misenna ta. 31Amma ɓi mutohoko misi ani hana gar na, ɓa ki tiɓam: Yesu i Mesi, i Mangal ngi Buymisemuŋ, yo ɓa kum mira tiɓam na, ki lumam siifa ngi sete ti slimiɗ naŋ.
Currently Selected:
Zaŋ 20: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.