Zaŋ 14
14
Yesu i jiviɗ ng'avi Cine
1Yesu a ɓa mizli ngi seˀeheye: «Anja didak a muɗukum ta. Tuɓaka Buymisemuŋ, yo tiɓikiy ya aya. 2Li ada haɗa a hay Baha, ya muɓukum: ‹I ra ru nga ɗiyukum li kum masa ndiram ara› na, vurˀeŋ. 3Da yi ru le a ɗiyukum li na, i sa mawa, yisa hulukum a haŋ, hã kisa ndiram angi li ya misi anga na ya. 4Li ya maru ng'ara na, ki sinaka jiviɗ naŋ le.» 5Tomas a ɓaŋ: «Buy, i sinaka li ka maru ng'ara vuna ta, i sa sinaka jiviɗ naŋ gu mbri mbrike?» 6Yesu a ɓaŋ: «Yi jiviɗ, yi ɓi mikaslsla, yo yi siifa. Ko mbur maru ng'avi Baha gu anta, sey a bi ti vi ya. 7Da ki sinikiy ya le na, kisa sinaka Baha ya. Zle wurenna, ki sinakaŋ le, ki purakaŋ le si.»
8Filip a ɓaŋ: «Buy, inga biga ndra Bunuk vuna, naɓa a kiɗa ndra may le si.» 9Yesu a ɓaŋ: «Yi zik le haɗa ati kumo, dambalaka ki siniy t'aruŋ kwa Filip? Mbur mupuriy le na, naɓa a pura Baha le si. Ki ɓi: ‹Buga ndra Bunuko› na, mbri mbrike? 10Ya, ya jom ati Baha, yo Baha kwana, naŋ jom ati ya na, ki tiɓa t'aruŋ kwa? Mingiɓi ya maɓukum di na, i ɓukum di ngi mongoy ɗu ta. I Baha misi jom ati ya na maga slra nga naŋ jaka. 11Ya maɓi: ‹Ya jom ati Baha, Baha kwana, naŋ jom ati ya› na, tiɓaka sini. Yo da ki tiɓaka mingiɓi ɗu ta tekeɗe kwana, tiɓam, asi slra ya maga taŋ hanayna tekeɗe sini. 12Gisiŋ gisiŋ, yi ɓukum na: mbur matiɓiy na, a sa ga slra ya maga taŋ na ya. A sa gi slra madiɗa mifineˀ tayna ma jaka, asi i ra ru le ng'avi Baha. 13Ko mike gar, kum misa cufuɗam le ti slimiɗ ɗu na, i sa gaŋ, ɓa Cine a lum gi dudok tisi naŋ mujum ati Mangala. 14Da ki ra cufuɗam gwat avu ya ti slimiɗ ɗu na, i sa gaŋ.
Cine a ɓa ɗaˀ le a sa slino ˀUf Mipal
15«Da ki ra wuɗikiy na, naɓa ɓimuɗuva ɗuwoyo, kisa jaka taŋ a hirnga. 16Yo yi sa tumbulo Baha ɓa a vulukum Mijiniˀis mekelem masa ndir caˀa ati kum. 17Naŋ i ˀUf mijeŋŋe. Naŋ na, duniya a tiɓaŋ gu ta, asi naŋ anta puraŋ ta, yo a sinaŋ ta. Amma kumo, ki sinakaŋ le, vur naŋ da ati kumo, yo naŋ da a hur kumo ma. 18Y'anta sa pulukum i mutuhoy ta, i ra mo ng'avu kum. 19Neˀ nga mbuŋ ka na, duniya anta sa puriy mata. Amma kumo, kisa purikiy, y'ada ti siifa. Yo kumo kwana, kisa ndiram ti siifa ya. 20Tapasa, kisa sinaka, ya jom ati Baha, kumo, kum jom ati ya, yo ya kwana jom ati kum aya. 21«Ɓimuɗuva ɗuwoyo, mbur maja taŋ a hirnga, yo masipa taŋ na, naɓa i mbur muwuɗ ɗu. Mbur muwuɗ ɗu vuna, Baha a sa wuɗaŋ, yo ya kwana, yi sa wuɗaŋ, yi sa bigaŋ vu.»
22Yudas, mbak Yudas Iskariyoto le, a ɓaŋ: «Buy, kisa biga vu da ndra mbak da duniya le mbri mbrike?» 23Yesu a mbiɗaŋ di: «Da mbur ara wuɗiy na, a sipa mingiɓi ɗu. Baha a sa wuɗaŋ, Baha ati ya i sa soko, i sa paka hay ndra wãˀ a hur naŋ. 24Mbur mawuɗ ya ta na, naŋ anta ja mingiɓi ɗu a hirnga ta. Ɓi kum micinaka avu ya na, i ɓi ngi mongoy ɗu ta, amma i mingiɓi ngi Baha mislino ya. 25Ya muɓukum ɓi hana na, zle ti ya misi ati kum aruŋ. 26Mijiniˀis, ˀUf Mipal, Baha masa slinukum di ti slimiɗ ɗu na, a sa dubunukum gwataya pay, yo ɓi ya muɓukum di gar na, a sa so keŋ ar wuluk kumo. 27«Yi pulukum di i zuy, i ra vulukum zuy ɗu. Y'anta i vulukum di kaɓa ngi duniya mavula na ta. Anja didak a muɗukum ta, ki zluwunam ta. 28Ki cinaka le, yi ɓukum: ‹I ra cuh le, yo i sa mo ng'avu kum.› Da kum ada wuɗikiy zleˀe na, anja ani ki mumulom le ti ru ɗu ng'avi Baha na, vur Baha i madiɗa fineˀ ya. 29Yi ɓukum di le zle wurenna, daf le angi gwat nah masa gi, ɓa tapas naŋ misa gi le na, kisa tiɓam. 30Zle dana, y'anta sa ɓi ɓi ati kumo haɗa mata, asi buy ngi duniya misenna ara sawa. Ko naŋ anta ti gidaŋ neˀ a hirnga ɗu ta wãˀ. 31Amma ara sawa, ɓa duniya a sina, i ra wuɗ Baha, yo gwat ngi gi ɗu, naŋ kaɓa Baha miɓiy di ɗaˀ le. Slikiɗam, cuhukum le ti ka!»
Currently Selected:
Zaŋ 14: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.