YouVersion Logo
Search Icon

DANIYEL 1

1
Daniyel ati cil naŋhay a Babiloŋ
1Ti Zoˀakiŋ, buy Zuda mazum buy ngi vi mimakir naŋ na, Nabukodonozor, buy madiɗa ngi Babiloŋ a sawa, a tiɓa Zeruzaleme. 2Bumbulvuŋ a vula Zoˀakiŋ asi haŋ ngi Nabukodonozor. Joˀ Nabukodonozor a hil cah avu gazlanga ngir hay ngi Buymisemuŋ. A ji mizli ng'ar dangay ngi Babiloŋ, yo a pa gwat mitiɓa ar vurumo ng'ar hay ngi kuli naŋhay, ar hay ngi pi zlili. 3A ɓa Asepenas, madiɗa ngi mizli naŋhay, ɓa a wini gawlahay cah ar tizer ngi buyoy waɗ a wuzla ziri ngi mizli madiɗahay. 4A wuzla ziri gawla taŋhay manja hereweɗ ko neˀ. Deŋ taŋ naŋ kuy, taŋ ti sinmijileŋ, a sinam haɗa, yo taŋ ti sin ngi gi gwata ma. Taŋ, a sa gam a hay ngi buy. A sa dubunaka taŋ mingiɓi ati toho gwat ngi mizli Babiloŋhoy. 5Buy a juwa le, ɓa vur hin gar na, a vulaka taŋ gwat ngi zum ati gwat ngi si kaɓa nga naŋ buy vuna, yo a dubunaka taŋ gwat ngi gi hã vi makir. A dirba nah, a sa gam slra ngi buy. 6A wuzla taŋ, dideˀ ngi Zudahay ada cah, i ti Daniyel, Hananiya, Mikayel waɗ Azariya. 7Madiɗa ngi migi slra ngi mamay buyo, a ca taŋ slimiɗ mekelemey. Daniyele, a zila Beltasar, Hananiya, a zila Sadrak, Mikayele, a zila Mesak waɗ Azariya, a zila Habet-Nego. 8Daniyel a juwa le a mevel naŋ, ɓa a zum gwat malla a si gwat misi kaɓa ngi buy na ta, vur naŋ masa ci ar dili. A cufuɗa madiɗa ngi migi slraˀahaya, ɓa a tikaŋ ˀay ngi zuma gwata ta, vur naŋ masa ci ar dili ti gwat ngi zumo. 9Buymisemuŋ a ga mezle da Daniyele, ɓa madiɗa ngi migi slrahay a tiɓa cufuɗ naŋ. 10Madiɗa ngi migi slrahay a ɓa Daniyele: «Muɗuviy ɓi ngi gwat ngi zum ati gwat ngi si kum, ya mavulukum di na, i buy vuna ti haŋ naŋ. Zluwun ara giy vur naŋ masa lumuw zah zah a wuzla cil ɗikeye. Asi vur zih ɗik na, a sa bukiy hirnga ti maslalam.» 11Akẽh na, mbur mekelem ada. Madiɗa ngi migi slrahay a vulaŋ Daniyel, Hananiya, Mikayel, waɗ Azariya, asi haŋ naŋ. Daniyel a ɓaŋ: 12«Ambuh takwa! Inga titila hã hin kuruˀ, ki vulam ndra ngi zumo, i lar kalafay ati yam tewle. 13A dirba nah, kisa pura dumvu ndra ati ngi mizli mazumam kaɓa buyo, joˀ kisa gi ti ndra weˀe avu ka masa pura vuna.» 14Mbur tuwa a tiɓa ɓi nah, a titila ngi hin kuruˀo so. 15A dirba hin mukuruˀo, a puraka na, hiri taŋ celelle, yo taŋ ɓiɓir ɓiɓir fineˀ mizli mazumam kaɓa buy tuwa. 16Mbur mijigin taŋ a pula gwat ngi zum ati mbaazla mavulaka taŋ di zleˀe tuwa, a vula taŋ lar kalafay. 17Gawla mumufaɗ tayna tuwa, Buymisemuŋ a vula taŋ sin ngi gi gwat ati sin ar mingiɓi waɗ ar sinmijileŋ. Daniyele, a sla wala ngi gwat gar, gwat mupura ti kleŋ ati musuwuno gu. 18Ar kiɗa mi ngi hin ngi Nabukodonozor, buy madiɗa misla, ɓa a bigakaŋ gawlahay tuwa na, madiɗa ngi migi slrahay a raŋ taŋ. 19Buy a kiɗam slir ati taŋ. A wuzla taŋ gar na, a lum misi kaɓa ti Daniyel, Hananiya, Mikayel waɗ Azariya na ta. Vurˀe, taŋ a ndiram a mbuŋ buyo. 20Da buy a cufuɗa taŋ le ar ɓi ngi sinmijileŋ, yo ar ɓi ngi lesl wanaka gar kwana, gawla tayna, a slaka wala naŋ, is kuruˀ, fineˀ misi cucukoy ati muɓula musuɗukoy misi asi ruwuy naŋ ma zum buyo anga. 21Joˀ Daniyel a gi slra ngi buyo hã ar vi mudumbuŋ ngi Kiriyus mazum buy.

Currently Selected:

DANIYEL 1: BEGDC

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy