Bar 1
1
Mizli Yude ngi Babiloŋhoy mislinam ng’avi ngi Zeruzalemey
1Ɗerewol hana, i Baruk mutoho a Babiloŋ. Baruk i mangal ngi Neriya, dideˀ ngi Maˀaseya, Maˀaseya i mangal ngi Sedekiyas, dideˀ ngi Asadiyas. Asadiyasa, i mangal ngi Hilkiya. 2Ɗerewol hana a bigi gwatay migam ar vi muzlum naŋ, hin mitarnaˀ naŋ ngi kiya muzlum naŋ, hirak ti mizli Kaldehey mutuɓaka Zeruzalem, a zlizliraka kup na. 3Baruk a slufa ɗerewol hana a mbuŋ Yekoniya mangal ngi Zoˀakim, buy ngi ruwuy Zuda, a slufa mur mizli gar musoko ngi cina mingiɓi ngi ɗerewolo. 4Mizli gar misi a Babiloŋ aciki mizaw Suto, t’ada adiga, kaɓa ani: mizli mislakka ngisi mbur madiɗa, ziri ngi buyoy, madiɗa ngi wuzla muyoy, mizli madiɗahay, ziri memeɗehey ati mizli madiɗahay gar. 5Mizli a ra tuwam, a ra gam dalyam, a ra diram dibiɗ a mbuŋ Bumbulvuŋ. 6A dirba nah, a cikilam dala, mbur gar a vul gidaŋ naŋ. 7Dar a slinam di nga Zeruzalem da masay Zoˀakim, i mangal ngi Hilkiya, dideˀ ngi Salum, waɗ da masay mekelemey ati mizli misi ati naŋ a Zeruzalem adiga gar.
8Ti zle zlezleˀe, angi hin mukuruˀ naŋ ngi kiya ngi Sivaŋ na, Baruk a hil gwat ngi slrahay le ar hay ngi Bumbulvuŋ, a wuɗ ɓa a mi taŋ nga ruwuy Zuda amuŋ. I gwat muvuɗa ngi ɓiri gazahay. I Sedekiyas mangal ngi Zoziyas, buy ngi ruwuy Zuda, miɓa mizli ɓa a vuɗaka taŋ. 9Naɓa Yekoniya ati buyoy, dangayay, mizli madiɗahay waɗ mizli ngisi ruwuyo, Nabukodonozor buy madiɗa ngi Babiloŋ a jo taŋ le nga Babiloŋ si.
10Mizli mijahay tuwa a ɓam na: «Puraka, i ra slinukum ti dala ani, anja ki hiɗikam di gwat ngi gi mikuli mizlam zlam waɗ gwat ngi mikuli ngi puya mungra, mukuturɓuy ngi wur. Ki sa gaka sedege nah ar li gi mikuli ngi Bumbulvuŋ Buymisemuŋ ndra. 11Diram dibiɗ vur siifa ngi Nabukodonozor buy madiɗa ngi Babiloŋ waɗ ngi mangal naŋ Baltazar aya. Cufuɗaka Buymisemuŋ, ɓa a ja taŋ hutuŋ subur, a zikam haɗa kaɓa birngiŋ mazik a hirnga ruwuy. 12Naɓa Bumbulvuŋ a sa vula ndra gidaŋ, a sa ga ɓa i mumulom, ɓa Nabukodonozor buy Babiloŋ ati mangal naŋ Baltazara, a sa ɓulam jijiwiɗ ar ndra, i sa gam gawla taŋ hã i zikam, joˀ i sa lumam gi mezle tivi taŋ. 13Yo ma na, ndr’i gam malambaˀ le avu Bumbulvuŋ Buymisemuŋ ndra, ani hã wurenna kwana, himaˀ naŋ mufõh fõh ati ji mevel naŋ ar ndra na, a tisla t’aruŋ, anja ki diram dibiɗ vur ndra vuna. 14Ngi kiɗa mi naŋ na, slufaka ɗerewol ndra muslunukum di hana, ɓa mizli a njikaka mungra taŋhay ar hay ngi Bumbulvuŋ tapas hin ngi muguzlumoy waɗ ar hin mijam haŋ le gar.
DIRA DIBIƊ NGI MIZLI MIJAHAY LE
Njika mungra
(Pura Dan 9.4-19; Esd 9.6-7; Neh 9)
15Ki sa ɓam na: «Bumbulvuŋ Buymisemuŋ ndra naŋ jeŋŋe, amma ndra, gwat ngi gi ndra misi dana na, a gi mesem! I mesem avu ndra mizli Zuda ati mizli Zeruzalemeye. 16I mesem avu buy ndrahay, avi masay ndrahay, mijiviɗ ndrahay ati cine ndrahaya. 17Ndr’i gam mungra le avu Bumbulvuŋ. 18I ndiram teŋteŋ a mbuŋ Bumbulvuŋ Buymisemuŋ ndra ta, naŋ miɓa ndra ɓa i sipaka ɓimuɗuvahay naŋ muvula ndra taŋ na, i cinakaŋ mi ta. 19Zle ti Bumbulvuŋ mubo ti dideˀ ndrahay ti ruwuy Ezipte hã dana, gi teŋteŋ ndra ta na, ko i pulaka gi naŋ avu Bumbulvuŋ Buymisemuŋ ndra ta, yo mingiɓi naŋ kwana, i cinaka ta, i gam di kaɓa ɓi ngi sefel. 20Keɗ keɗ dana na, mendere a ra gi avi ndra. Ti Bumbulvuŋ mubo ti dideˀ ndrahay ti ruwuy Ezipte, ɓa a vula ndra ruwuy misi ɗuwa ati mam maɓulom ara na, a pula jiviɗ da gawla naŋ Moyis ɓa a guco ndra mi ti nisi, ani gwat ngi nis nah vuna a ra gi muduba. 21Bumbulvuŋ Buymisemuŋ ndra, a ɓa ndra mingiɓi naŋ le, yo a slino ndra mijiviɗey le kwana, ko i cinakaŋ mi ta. 22Amma ndra jak na, i ra gam gwat ngisi mevel ndra malambaˀ na, i dilikam a mbuŋ kulihey, i ra gam gwat Bumbulvuŋ Buymisemuŋ ndra mapura kuy ta.
Currently Selected:
Bar 1: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.