ZAŊ MIMAKIR NAŊ 1
1
Ji haŋ
1I ya mbur micawwa matoho ɗerewol hana da Gayus, yeme ɗu, ya mawuɗaŋ gisiŋ gisiŋ wãˀ. 2Yeme ɗu, anja k'ada jam jam ar gwat gar, yo anja ka zuy zuy ti vu ɗike kaɓa ka muzuy zuy a mevel ɗik na ya. 3Asi mike na, sukum ɗu mekelemey musoko aka na, ara gaka sedewo ngi ɓi mikaslsla, taŋ mupuraka ar cifi ɗik na, a ɓam: ka, ki ra ru ar li minjahha ngi ɓi mikaslsla, i mumul le haɗi teˀ vurˀe. 4Da ya mira cina, ziri ɗuwoyo, ara ram ar li minjahha ngi ɓi mikaslsla na, gwat magiy mumul fineˀ nah anta mata.
Gayus micifi teŋteŋ
5Yeme ɗu, gwat ka maga vur sukum ɗikey, yo vur mulakay na, ka anga teŋteŋ. 6Wuɗavu ɗik na, a gaka sedewo naŋ le a mbuŋ cikil ngi misikristuhoyo. Ambuh takwa! Anja ki jina taŋ ar zuɓa mulak taŋ na kuy kuy, ti jiviɗ macira hiri da Buymisemuŋ. 7Asi zuɓa mulak taŋ na, naŋ vur slimiɗ ngi Kristu. A lumam gwat neˀ avu mizli duniyahaya ta. 8Anja ndra so na, i jinaka mizli tayna, ɓa i bigaka, ndr'ada jom ar slra ngi ɓi mikaslsla.
Diyotref ati Demetriyus
9I toho ɗerewol le neˀ da cikil ngi misikristuhoyo, amma Diyotref, mbur mawuɗ wa gwatay gar na, a ngum ki slimiɗ ar ɓi ɗu ta. 10Vurˀe, da ya misa ndil le na, i sa njika malambaˀ naŋ, naŋ maga na gar. Mi ngi kuw ati slir naŋ, naŋ maga ar ndra na, i nah tew ta ma, sukum ndra mekelemey mindilam le gar na, a ngum tiɓa taŋ ta. Mizli mawuɗam a tiɓaka taŋ ma na, a tika taŋ, a ɓula taŋ ti wuzla cikil ngi misikristuhoyo avra. 11Yeme ɗu, ki sipa gi malambaˀa ta, amma sipi gimezleŋ. Mbur magi mezle na, i mbur ngi Buymisemuŋ. Amma mbur magi malambaˀ na, naŋ anta pura Buymisemuŋ ta. 12Amma Demetriyuso, mizli gar, ara ngilam di wuy. Ko ɓi mikaslsla vuna ti haŋ naŋ kwana, ara gi sedewo ar naŋ. Ndra kwana, i ra gam sedewo vurˀe ya, na ki si na le, gi sedewo ndra, naŋ jeŋŋe.
Ji haŋ ngi kiɗa mi naŋ
13Y'ada ti ɓi haɗa ngi tuhuw di, amma y'anta wuɗ i toho ti zlara waɗ ti yam ngi hilseɓ ta. 14Asi i ra wuɗ pur ɗike tumbuŋ, yo i sa ra kiɗam slir hiri taˀ taˀa. 15Anja ki ndir zuy zuy so. Ngama ɗikey a jukuw haŋ le. Ja haŋ da ngama ndraˀahaya pal pal gar aya.
Currently Selected:
ZAŊ MIMAKIR NAŊ 1: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.