BUYOY MUCUW NAŊ 1
1
Bumbulvuŋ miga kiita da Ahaziya asi gwat ngi gi naŋ
1A dirba buy Akap mumuc na, Moˀapay a slikiɗam ɓi avu Israyeley mawaka taŋ na. 2Ngi pas numuŋ ada na, buy Ahaziya a ro ar viŋ ngi hay naŋ mijirngasl a hirnga cala a Samari. A diɗo tir fenetir na, a gaŋ waˀa le haɗa. Akẽh na, buy a slin mizli nga cufuɗa Baˀal Zebub ar walahay Ekroŋ. Asi buy a wuɗ ɓa a sina, zliv a sa mbul gu tir naŋ mulum mendere hana vuna kwa mbrike na, kini. 3Ar nah na, modro ngi Buymisemuŋ a ɓa Eli, mbur Tisebe: «Slikiɗ, ara ji hirnga ti gawla ngi buy Samarihey ani, ɓa ki ɓa taŋ: ‹Bumbulvuŋ anta ar hirwuy Israyele takwa? Ki ram nga cufuɗa ɓi avu Baˀal Zebub, kuli ngi Ekroŋ vur mike?›» 4Naŋ kine, Buymisemuŋ a ɓa buy Israyel kum ani: «Arngawo, naŋ mutup ara na, naŋ anta pi sar cak le ti ra mata, a sa mucu.» 5Misliney a moko ng'avu buyo, dar buy tuwa, a ɓa taŋ: «Ki moko a muŋ vur mike?» 6«Misliney a mbiɗakaŋ di: mbur ada, a kiroho ng'avu ndra, a ɓa ndra ɓa i moko ng'avu ka a muŋ, ɓa i ɓukuw na, Buymisemuŋ a ɓuw ani: ‹Bumbulvuŋ anta ar hirwuy Israyele takwa kini? Ki slin mizli ɓa nga cufuɗa ɓi avu Baˀal Zebub, kuli Ekroŋ vur mike? Vurˀe, arngawo ka mihin tup ara na, k'anta sa pi sar cak le ti ra ta, kisa mucu.›» 7Akẽh na, buy tuwa, a cufuɗa taŋ: «Mbur muso nga ji hirnga ti kum, yo muɓukum ɓi hana vuna, naŋ mbrike?» 8Misliney a mbiɗakaŋ di: «Naŋ ti zana ɓaˀ avu vu, zana mija ti ngwic ngi zlogomo, waɗ a juwa kwacaya wak ti kanda.» Akẽh na, buy a si na le, a ɓi: «Ey, i Eli, mbur Tisebe.»
Ahaziya muwuɗ ɓa a ja Eli
9Ar nah na, buy a slin madiɗa ngi sojehey ti mizli kukur zlum aseˀe, ɓa nga jo Eli. A jiɗam ng'avi Eli a hirnga muwã ar li naŋ muro angaŋ. Madiɗa ngi sojehey a ɓaŋ: «Mijiviɗ ngi Buymisemuŋ, buy a ɓuw ɓa ki po sar.» 10Amma, Eli a mbiɗa da madiɗa ngi mizli kukur zlum tuwa: «Da yi mijiviɗ ngi Buymisemuŋ na, anja vu a po sar ti muŋ, a zumukum, ka ati mizli mizli ngir zlum na.» Dar vu a po sar paɗ ti muŋ, a zuma taŋ kap ati mizli naŋhay mizli ngir zlumo.
11Buy Ahaziya tuwa, a slin madiɗa ngi soje mekelem ma, ti sojehey kukur zlum aseˀe. Madiɗa ngi sojehey a zla a ɓa Eli: «Ka mijiviɗ ngi Buymisemuŋ, buy a ɓuw na, wus vu, po sar kutum.» 12Amma, Eli a mbiɗaŋ di: «Da yi mijiviɗ ngi Bumbulvuŋ na, anja vu a po sar paɗ ti muŋ, a zumukum, ka ati mizli ɗikey mizli ngir zlum na.» Vu a po sar paɗ ti muŋ, a zuma taŋ kap ati mizli naŋhay mizli ngir zlumo.
13Buy a slin madiɗa ngi sojehey mimakir taŋ ma, ti sojehey kukur zlum aseˀe. Madiɗa ngi sojehey mimakir taŋ nah, naŋ mindil a ciki Eli na, a huruk huruk a mbuŋ Eli, a tumbuloŋ, a ɓaŋ: «Mijiviɗ ngi Bumbulvuŋ, ya ati gawla ɗu mizli ngir zlum hanayna, pula ndra ar siifa takwa! 14Madiɗa ngi sojehey mucuw ngi dumbuŋhoy ati gawla taŋhaya, i si na le, vu a po sar paɗ ti muŋ, a zuma taŋ le kap. Amma, ambuh, puliy ti siifa takwa!» 15Modro ngi Bumbulvuŋ a ɓaŋ: «Pam sar bummoˀ! Ko ki zluwun ta!»
Eli a slikiɗ, a pam sar bummoˀ ng'avu buyo. 16Dar buy a ɓa Eli: «Buymisemuŋ a ɓi ani: Naŋ kine, ka mislin mizli nga cufuɗa ɓi avu Baˀal Zebub, kuli ngi Ekroŋ na, Bumbulvuŋ anta ar hirwuy Israyele, ɓa a cufuɗam ɓi ava takwa! Vurˀe, arngawo ka mutup anga na, k'anta sa pi sar cak le ti ra mata, asi kisa muc gisiŋ gisiŋ.» 17Ahaziya a muc le kaɓa Buymisemuŋ miɓa da Eli tuwa. Ahaziya, naŋ anta ti mangal ta. Vurˀe, sukum naŋ Zoram a zuɓa li naŋ. Naɓa ti di nah na, Zoram, mangal ngi Zozafat, buy Zuda, a ɓul di i vi mucuw naŋ ar zuma buyo.
18Mindir is ngi ɓi ngi Ahaziya ati gwat naŋ miga gar na, i mutoho le angi ɗerewol mazilaka: ‹Ɗerewol ngi ɓi ngi buyoy.›
Currently Selected:
BUYOY MUCUW NAŊ 1: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.