Filemón 1
1
Uandajperata
1Jucheti pámpiri Filemoni, jucha Páblu ka Timoteo íni karakata jimbo uandajperakuaksïni axachesïnga. Ji Jesukristuni jimbo k'atakata jarhaska. 2Ístuni uandajperakua axakuasïnga nana Apiani ka tata Arkipuni, juchari pámbetpiri, ka ístu iámendu engasï Diósïni mintsikani jaka engaksï chénio tángorhejka. 3Diósï juchari Táte ka Acha Jesukristuksïni íntskue sési jakua ka sésiksïni p'ikuaste.
Kómarhijpekua
4Méntkisï engani uandamukukorheni jarhajka ka míjpanikini, Diósïni t'úngeni jimbo diósïmaiamu arhintasïnga. 5Jimbokani kurhachpeska eskari Acha Jesukristuni kánekua mintsikasïnga ka imeri jakajkutichanturi kánekua xénhchaasïnga, ka ísturi xénhchaasïnga iámenduechani engaksï Diósïni andarhentaka. 6Engari xáni jakajkuni jaka eska marhuatspeaka ka eska iámendu sési ambe xarharaaka engachi jucha Krístuni jimbo jatsikorheka. 7Jucheti pámpiri, kánekua tsípexaka, jimbokari Diósïrichani chéti xénhchperata jimbo mintsita uinhaperakuntaaska.
Onesimueri ambe uandani
8Ísï jimbo, nájkirukakini Krístueri sésikua jimbo úaka juramucheni ambe engari úaka, 9jíkini uéksïnga kómu arhini jimbokachi jucha xénhchperasïnga. Ji Páblu, engani t'arhepekia, ka engani Jesukristuni jimbo k'atakata jaka. 10Jucheti uátsï Onesimu jimbokinisï kómu arhini jaka, inde enga ixu k'ataperakuarhu jucheti uátsïntaka.
11Urhetku ísïkini Onesimu#11 Onesimu marhuari arhikuekasïndi. chéti jántspiri no marhuachesïrempti, ka iásïjtsïni sési marhuachexati. 12Jíkini jucheti uátsïtini axachentaxaka engani ji xánimenduni xénhchajka. 13Ji uékapiringa eska jíndeni jinguni pakarapiringa, ka eskarini marhuachepiringa engani jamberi ixu ambakiti aiangperakua jimbo k'atakata jauaka, ísï eskarini t'u na marhuachejka. 14Jíkini urheta sésikua kurhacheni uéksïnga, jimbokani no uékasïnga eskarini jíndeni sési pakaracheaka, jínisïni uéjka eskari mintsita jinguni úaka. 15Nándikakini Onesimu ísï jimbo sóndi kéndikuchepka, jimboka iásï k'óru méntkisï t'úngeni jinguni jauaka; 16nóteru jántspiri k'uanhatseatia, iásï sánderu sési jásï k'uiripueuatia eska juchari erachi xénhchakata ma. Ji kánekua xénhchasïnga, k'óruri t'u jatsiska sánderu kánekua xénhchani, eska sési jimbo chéti erachi ma, Acheri jimbo.
17Ekarini ambe jindeni ísï exejka eskani t'u jingunini, Onesimuni ísï eroka eskarini jíndeni erokani jarhani. 18Engakini ambe Onesimu ambema úcheka, ókini ambema káncheni jarhani, kántsperatarini jíndeni kundache. 19Ji, Páblusïni ísï karani jaka, eskani ji maiampentaaka. Jíkini úpiringa jamberi arhini eskarini t'újtu chéti tsípekua jamberi kánchexaka. 20Ísïsti erachi, kurhachexakakini eskarini ísï jarhuataaka, Acheri xénhchperata jimbo ka ísï jámanirini karhoataaka Krístuni jimbo. 21Ka ísïkini karachesïnga jimbokani sési mítetixaka eskarini jukari jámberi kurhandiracheaka.
22Ka jíndenturini ambantskacheniti jáia, nani engani úaka inchantani mintsikorheni; jimbokani mintsikaxaka eska chári uandamukukorhekua jimbo, Diósïrini íntskuaka sésikua ménderu cha jinguni jarhani.
Uandanuntskua
23Epafrasi, inde enga jíndeni jinguni Jesukristuni jimbo k'atakata jaka, uandajperakuakini axachexati, 24ka ístu Márkusï ka Aristarkusï ka Démasï ka Lúkasï, ánchekorheteri pámpiricha.
25Eska Acha Jesukristueri kóntperakua, chéti espiritu jinguni jauaka.
Currently Selected:
Filemón 1: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.