Judas 1
1
Uénakua
1Júdasï Jesukristueri jántspiri, Santiagueri erachi jémba, iámendu uandajpakatechani enga Diósï Táte xénhchaaka ka enga Jesukristu kuájchakuani jaka. 2Eskajtsï cha kánekua p'amojkunhaaka ka eskajtsï sési jakua intsïnhaaka ka kánekuajtsï xénhchanhani.
3Jucheti xénhchakatecha: Kánekuaksïni karachenhchaxapka juchari p'ímutantskueri ambe, ka karaska jimbokaksïni uéksïrempka arhini, eskajtsï jángorheaka jakajkukuani kuájpeni, enga Diósï imeri ireta arhutakatani méntku íntskuka. 4Nóchkaksï jarhaski máru andi engaksïni sïpatekuarhu inchaakucheka, imanisï karakata arhiani jápti eskaksï arhinharhikunhaaka. Nóksï jakajkusïndi, juchari Diósïri kóntperakuanksï ísku ambe niátatarasïndi ka nóksï jiókorhesïndi juchari Acha Jesukristuni engajtsïni juchantsïni míngorhetini jaka.
5Uékasïngaksïni ma ambe míatani, eska Acha jiáni enga Israeli anapuechani Ejiptu petaatantaaka, k'amajkuaspti imani engaksï no jakajkupka. 6Ka ístu ánjelichani engaksï no uékapka jima jarhani engaksï péranhapka, ka sánderuksï imecheri irekuarhu kéndikusti. Diósï jima jatsiasti enga méntkisï pájpakandeka, tiámu jimbo jójkuatini, erokorheni ima jurhiatekuani enga arhinharhikperanhaaka. 7Ka májkuentu Sodoma ka Gomorra ka iretecha engaksï jimesï jaka, engaksï ima ísku jándi úkorhepka ka nósesi jásï ambejkuksï tsitinhchani. Ikimenhasptiksï chpíri jimbo enga nómeni pátakorhejka, eskaksïni imecheri ikimekua marhucheaka ka cha no ísï jámani.
8Ka nauejki ísï, íchkaksï májkueni ísku jándisïndi, tsánharhiparinkï jámasïndi ka Diósïri juramukuanksï no jiókorhesïndi, ka auandarhu anapu ánjelichanksï nósesi arhiasïndi. 9Migueli, ánjelicheri k'éri, engaksï nóambakitini jinguni jupiperatini jápka Moisesiri anhaanhatakuani euajperani, no tekaaspti útakuni ka sánderu jamberi jinijku uandaspti: “¡Eskakini Acha arhinharhikuaka!” 10K'óruksï inde nósesi arhisïndi imani ambe engaksï no kurhangujka, ka sáni ambe engaksï kurhangujka, jandiojku jatinksï tsînchekorhetarasïndi ísï eskaksï manakorhericha engaksï no eratsejka.
11¡Ákeruksï! Jimbokaksï Kaíniri xanhari jimbo niraska, ka tumina andakuekanksï támu ísï nirastia ísï eska Balaami. No kurhandirakua jimboksï Koreni uarhiati. 12Inde k'uratsekua ambesti engajtsï cha xénhchperani tángorhentani jarhajka ka indeksï t'iresïndi ka tsípekorhesïndiksï Diósïni nósani chénharhiparini. Jinguntku je indecha jinguni; janikuenksï járhasti enga tarhiata ísku pájka, anhatapu uauarhuntskuarhu anapuenksï járhasti engaksï no újka amanhejchakua jukani, tsimani xanhariksï uarhirixati, ísï jimboksïsï murutanhaati. 13Japunderi k'érati jenguerakuenksï jáxesti, engaksï k'uratsekua ambe k'uruarhekorhejka; jóskuenksï járhasti engaksï jini ka jini jámka, ka méntkisï anapu pájpakandekuaksï patsamenhaxati.
14Enoki, ima enga Adaniri iúmu tsimani sïrukueka jémbepka, indecheri ambe uandarixaptia: “Exe je, Acha uánekua ánjeli jémbecha jinguni janosti. 15Ka mándani arhiati arhinharhikuani imani nósesi ambe jimbo enga únhaka ka engaksï Diósïni nósesi arhika.” 16Indeksï méntku aiaimeni jarhasïndi, ka arhinhchpesïndiksï, ísïksï jámasïndi eskaksï na tsitinhchaaka jámani. K'éramakorhesïndiksï ka sésiksï jándirantasïndi k'arhajpeni.
Sési mintsikani
17K'óru cha erachicha, míani ja je ambe engaksï Jesukristueri uandakua páricha, juchari Acha Jesukristueri ambe arhijpeka. 18Imaksï uandasïrempti: “Jiájakani engaksï jurhiatekuechani k'amakurhiaka, jauatiksï máru engaksï Diósïni nósesi arhiaka ka nósesi ambeksï tsitiparini irekorheati.” 19Indeksïsï arhukpejti, parhakpeni anapuestiksï ka Espiritunksï no kámasïndi.
20Ka cha erachicha, chári pímpinhasï jakajkukua jimbo uinhaperpentsï je, ka Espiritu Sántu jimbo uandamukukorhe je. 21Diósïri xénhchperakuarhu ja je. Ka p'íjeteru juchari Acha Jesukristueri p'amojperakua engaksïni jamberi ima tsípekuarhu páaka enga méntkisïka.
22Ka andajtsïtera je imechani engaksï tsimanitsimanerhani jaka. 23Ka máteruechani chpírirhu p'íjpaantsï je, ka máteruechani p'amojkua je. K'óru xéparini je. Ikimcha je xukuparhakua jamberi enga imecheri nósesi jángua jimbo ikichakueni jáxekia.
24Diósïksïni úsïndi exeni jarhani eskajtsï no terungutanhaaka ka úatiksïni ima jinguni k'érikuarhu incharani, nómbe ma arhikua jinguni ka tsípeparini. 25Diósïni ima enga májkueka, juchari p'ímutantspiri, k'éri ambe arhinhe ka k'éri ambesti, juramue ka uinhapekua jatsini, iásï ka méntkisï juchari Acha Jesukristuni jimbo. Ka ísïue.
Currently Selected:
Judas 1: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.