YouVersion Logo
Search Icon

San Juan 16

16
1Indeni ambeksïni arhixaka eskajtsïni no jámaaka ísku jatini nóteru mintsikani jarhani. 2Tángorhentskuarhuecharhujtsï chúnhantaaka. Ka niáraati jurhiata engaksïni jamberi ataaka uandikuni ka eratseatiksï eskaksï Diósïnisï marhuakuni jaka. 3Ka ísïksï jámaati jimbokajtsïni Táteni ka jíndeni nótki mítesïnga 4Íni ambeksïni arhixaka, uékani eska enga na niáraaka jurhiata ka ísï úkorheni, eskajtsï miántaaka eskaksïni aianguspkia.
Espiritu Sántuntsïni axacheati
“Íni ambeksïni no arhixapka jimbokani cha jinguni jámaxapka. 5Ka iásï imani jinguni niántaxamka engarini axaka, ka nónemarini sáni kurhamarhesïndi ji nani niraxamki; 6jimintsï ménderueni jámsïnga, kánekuajtsï mískorheska engaksïni indeni ambe arhika. 7Ka jíksïni imanisï arhini jaka enga ísïka: Chári jimbo sánderu sésisti eskani ji níntaaka. Jimboka ekani no níntaska, Espiritu Sántu no juuati chánksïni jinguni jarhani; ka ekani ji niraska, jíksïni axacheaka. 8Ka na enga jatini ima juuaka, iámendu parhakpeni anapuechani k'amak'amasï jánhastauati ne enga k'amanharhintstika ka ne enga kaxumbitika ka ne engaksï arhikua jukaka; 9imaksïsï k'amanharhintstiti engajtsïni no mintsikajka; 10ka jísïni kaxumbitika, engani Táte jinguni nirani jámka, ka nóterujtsïni exeakia; 11ka imani enga Diósï arhinharhikukia, íni parhakpeni anapu juramutini, ima k'amanharhiranhantastia.
12Uánekua ambeteruksïni arhikuekaxaka, enga úka, iásïjtsï nótki úaka kurhanguni. 13Enga Espiritu na juuakia, ima enga ísïka, imaksïni sési iámu ambe jánhastapaati; jimboka no imeri jimbo uandaaka, jimboka imanisï uandaaka enga kurhauaka, ka imaksïni aianguati ambe engateru jurhani jaka. 14Imarini k'érikuarhu péraati, jimboka imani ambe uandaaka engani ji arhiaka. 15Juchetisti iámu ambe enga Táte xáni jatsika. Jimboksïnisï arhika eskaksïni imani ambe aianguntaaka engani ji arhiaka.”
16“No ióni jimbojtsïni cha nóteru exeni jauakia, ka no ióni jimbojkujtsïni ménderu exeaka.”
Mískorhekua tsípekua úkorhentaati
17Ka jurhengorheri jémbechaksï kurhamarhperaspti:
–¿Ambesï arhikuekajki? Enga arhijka eskachi no ióni jimbo nóteru exeakia, ka eskachi no ióni jimbojku ménderu exentaaka, ka eska Tátjemba jinguni niraxamka. 18¿Ambe arhikuekajki enga uandajka no ióni jimbojku arhini? Nóchi kurhangusïnga ambesï arhikuekani jaki.
19Jesusi jánhaskaspti eskaksï kurhamarhekuekaxapka ka arhiaspti:
–¿Kurhamarhperaxakijtsï jíksïni andisï arhi eskajtsïni no ióni jimbo nóteru exeakia ka eskajtsïni ménderu no ióni jimbojku exentaaka? 20Sési jimboksïni arhixaka eskajtsï ueraska ka eskajtsï p'amondakorheaka, ka parhakpeni anapuechaksï tsípeati. Mískorheakajtsï, enga úka, chári mískorhekua tsípekua úkorhentaati. 21Uarhiti nósesi p'ikuarherasïndi enga sapini kángorheni jámkia; ka enga na sapini kángorhejkia, miripakurhisïndi imani enga p'amerani jápka, xáni tsípeni eska parhakpeni sapi ma andajpenuska. 22Chájtujtsï iásï nósesi p'ikuarheraxaka, enga úka jíksïni ménderu exentaaka ka chájtsï mintsita jinguni tsípeaka ka chári tsípekuanksïni nónema úati euantani.
23“Jiájkantsïni nóteru ambe ma kurhamarheakia. Sésimendu jimboksïnisï arhini jaka: Ambe engajtsï Táteni xáni jucheti jimbo kurhakuska, íntskuatiksïni. 24Iásï jamberijtsï cha nótki ambe ma jucheti jimbo kurhakuxaka. Kurhajkorhe je ka intsïnhaakajtsï, ka ísï jámantsï k'amak'amasï tsípeaka.”
Parhakpeni jurhaska
25“Iámendu indeni ambeksïni terukutarantskua jimbo aianguska. Ka jurhiata niáraxatiia engaksïni nóteru terukutaratskua jimbo uandaxecheakia; Táteri ambeksïni méntku jurhimbitku aianguaka. 26Imani jurhiatekuajtsï jucheti jimbo kurhajkorheaka; ka no arhixaka eskaksïni Táteni ji arhicheaka. 27Táteksïnisï xénhchakorhejti jimbokajtsïni cha jíndeni xénhchasïnga ka jimbokajtsï jakajkuska eskani ji Diósï uéjtateska. 28Táteni uéakuska ka parhakpeni jurhaska. Ka iásï ménderuni uéjpentaaka Táte jinguni niántani.”
29Ka jurhengorheri jémbechaksï arhispti:
–Iásï k'óruri jurhimbitku uandaxakaia, ka nóteruri terukutarantskua jimbo undaxakaia. 30Kurhanguskachia eskari iámendu ambe míteska ka eskari mítetini jarhasïngia amberisï kurhamarhenhaa náuekiksïni nótki ambe ma kurhamarheni jarhani. Indeni jimboksïni jakajkuchesïnga eskari Diósï uéjtateska.
31Jesusi arhiaspti:
–¿Mintsikaxakijtsïnia? 32Jurhiatachka janostia ka iásïstichkia, engajtsï cha táchantku isï etsajkamaaka ka engajtsïni jandiójku jurarkuaka. Eka úka no jandiójku jarhaska, jimboka Táte jíndeni jinguni jarhaska. 33Íni ambeksïni arhixaka eskajtsï úaka jíndeni jinguni sési p'ikuarherantani. Parhakpentsï kómu nitamaaka. Eka úka uinhapekorhentsï je: Ji andaskia parhakpeni anapu uinhapekuani.

Currently Selected:

San Juan 16: DKPJ

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy