Hebreos 1
1
Diósï uájpani jimbo xarhatasti
1Tata Kuerajpiri, mémechani uéntani, ka imeri uandaricheri uandakua jimbo juchari ióntki anapuechani mámaru uandaxekuasti. 2Íni jurhiatekuechantsïni Tata Kuerajpiri, Uájpani jimbo uandajpasti Uájpa enga iámu ambe míndakuka jurajkukuni, imani engajtu jimbo iámendu ambe kueraaka. 3Uájpani, enga Diósïri k'érikueri t'íntskueka, ka enga xarhatajka Diósï néna enga jáxeka, ka enga imeri uandakua uinhapiti jimbo iámendu ambe exeni jaka, enga urheta k'amanharhintskuechani p'ímbinhajkpentatini auandarhu anapu irechani t'irerkandani uaxantaka. 4Sánderu kánekua k'érikua jinguni eskaksï ánjelicha, xáni sánderu eska na jakangurhikua p'ika.
Diósï Uájpa ánjelicha jinguni sánderu k'éristi
5Sésitkiru exe je, Diósï nóma ánjelini méni arhisti:
“T'úri jucheti uatsïtiska;
jíkini úska iásï.”#1.5 Pirekuecha 2.7.
Ka nójtu ma ánjelini arhiristi:
“Ji imeri táteuaka,
ka ima jucheti uátsïtiuati.”#1.5 2 Samueli 7.14; 1 Jurhiateri uandantskuecha 17.13.
6Ka ménderu uéntani, enga Uájpa urhetini parhakpeni kéjpani jámempka uandaspti:
“Eskaksï iámendu
Diósïri ánjelicha
k'éri ambe arhiaka.”#1.6 Dt 32.43 ka Pirekuecha 97.7.
7Ánjelicheri ambe Diósï uandasïndi:
“Ánjelichani jémbechani tarhiateni manataasïndi,
ka jántspiri jémbechani
chpírini t'íntskaasïndi.”#1.7 Sal 104.4.
8Ka Uájperi ambe arisï uandasïndi:
“Chéti juramukua,
Acha Diósï, méntkisïsti,
ka inde juramukua
terujkani anhaxurhitixati.
9Sési jásï amberi xénhchaska
ka nósesi jásï amberi ikichaska;
Diósïkini jimbosï t'úngeni erakuti,
ka iámukini tsípekua íntskusti
sánderu eska máteru
chéti pámpirichani.”
10Ka uandastijtu:
“T'úri Acha,
t'úri uénani jámantki
echerini sési uaxastaska,
ka t'úri úska auandani.
11Iámendu ima ambe k'amakurhiati,
ka t'u k'óruri méntiksï jauaka.
Iámendu ima ambe
takusïni niuati k'amakurhini.
12¡Eska takusï ambe,
ísïri irhintaaka,
ísïri mójtakuaka
eska ambe mórhekorheni!
Ka t'u k'óruri májkueni jauaka
ka chéti irekua
nómeni k'amarhuati.”
13Ka Diósï ¿Náki ánjelini méni arhiski?:
“Jucheti t'irerkandanirini uaxanda,
engani jámberi chéti
ikiatspirichani péracheauaka
eskari jatanduantauaka.”
14¿Andi nóksï iámendu ima espiritueski engaksï Diósïri jántspirika imecheri engaksï p'ímutperatskua p'iuaka?
Currently Selected:
Hebreos 1: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.