Efesios 1
1
Uandajperata
(1.1-2)
1Páblu, Krístu Jesusiri uandakua pári, jimboka Diósï ísï uékaska, karakuaxati Éfesu anapuechani engaksï Krístu Jesusini jimbo kaxumbentakia ka imanksï jakajkuni jarhani. 2Eskaksïni Diósï juchari Táte ka Acha Jesukristu kóndentaaka ka sési jakuaksïni íntskuni.
Diósï k'éri ambe arhinhe
(1.3—3.21)
3Diósï, juchari Acha Jesukristueri Tátjemba k'éri ambe arhinhe, engajtsïni iámendu sési járhati újchakurakuechani Krístuni jimbo auandarhu uératini juácheaka; 4jimbokajtsïni Diósï jimajkantki Krístu jimbo erakuska enga parhakpeni nótki kueraanhempka, eskachi imani jimbo Diósïripiringa ka pímbinharhanchi. Ka jimbokajtsïni xénhchaska; 5erakutixaptijtsïnia eskachi Jesukristuni jimbo, Diósï uájpentaaka jimboka ima ísï tsípentaska, 6ka eskachi ísï, Diósïri kóntperatani k'érikuarhu péraaka, engajtsïni Uájpa jimbo kóndentaka enga ima xáni xénhchajka. 7Juchachi Krístueri iurhiri jimbo euajpenhantaska ka k'amanharhintskuechanchi púamenhantaaska. Diósï xáni engajtsïni kóndejka, 8engajtsïni mímixekua ka eratsekua jinguni xáni kánekua kóndeka. 9Diósïjtsïni aianguntasti ambe enga eratsetini jápka enga no káni mítekorhepka, eska ima Krístuni jimbo, námendu tsípentatini jápka 10jiájkani úni enga jurhiatekua niárapiringa: Eska Krístu juramukuaka iámendu ambeni enga xáni auandarhu ka parhakpeni jaka.
11Krístuni jimbochi jucha p'iuaka ambe engachi míndamenhatini jaka; Diósï, enga újka néna enga ima tsípentajka eraantatixaptijtsïnia, 12eskachi jucha judiuecha, engachi Krístuni uénaka mintsikani, eska jucha jimbo imeri k'érikua k'éri ambe arhinhaaka. 13Chájtujtsï imani uandakuani kurharini enga ísïka, ka ambakiti aiangperakuani kurharini enga chári p'ímutantskueka, ka Krístuni jakajkutini, ka Espiritu Sántu enga aiatspekata jápkia, imani jimbojtsï chájtu míngorhenhatixakaia, 14ka inde Espiritu arhikuekasïndi eskajtsï intsïnhaaka ambe engajtsï míndanhaka, ka Diósïri aiatsperakua jiájkani janoati engachi jucha euajpenhantaaka ka ísï jámanchi imeri k'érikuani k'éri ambe arhiaka.
Jakajkutichani kómarhijpekuani
15Ísï jimbosïni jíjtuni mítetini, na engajtsï cha Acha Jesusini mintsikani jáka, ka na engajtsï iámendu Diósïrichani jarhuatajka, 16no kuatantka chánksïni jimbo diósïmaiamukua arhijpentani, míaparinksïni engani uandamukorheni jarhajka. 17Eska Diósï, Táte k'éri, juchari Acha Jesukristueri Tátjemba, Espiritu mímixekuerinksïni ka sési jánhastperakueriksïni íntskuaka, engajtsï jimbo úaka imani k'amak'amasï sési míteni; 18eskaksïni Diósï mintsita mítacheaka ka úntsï jánhaskani Diósïksïni ambesï úrani ióarhintsï; na enga xáni ambakeka ima k'érikua enga Diósï imerichani íntsajka. 19Ka na enga xáni k'éka imeri uinhapekua engajtsïni juchantsïni jakajkutichani íntskuka, xáni k'éri imeri uinhapekua, 20enga Krístuni jimbo xarhataka enga tsítantaka ka auandarhu jurhijkandani uaxastani. 21Ka iámendu járhati juramukuecha jinguni ka iámendu ambe jimbo sánderu juramukua ka jarhamekua ka uinhapekua íntskusti iásï ka méntkisï. 22Ka Krístuni iámendu ambe jatandutarantasti, ka jakajkuticheri tángorhekua jinguni, Krístuni éjpueni pérasti enga iámendu ambeni juramukujka, 23ka tángorhekua ísïsti eska Krístueri anhanhatakua, enga iámendu ambe séserajka.
Currently Selected:
Efesios 1: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.