Apocalipsis 1
1
Quisocristo anitotërinpoasoꞌ
1Tata Yosë nohuantërin yaꞌipinpoaꞌ iso nanan nitotacasoꞌ. Napoaton aꞌna tahuëri maꞌsha onpocasoꞌ nininsoꞌ Quisocristo shaꞌhuitërin anitotinpoaso marëꞌ. Inasoꞌ anquëni aꞌpaimarin ca Coanshaco shaꞌhuitiincoso marëꞌ. Quisocristoíchin casoꞌ natërahuë. Anquëni oꞌmarahuaton, nani maꞌsha aꞌnotërinco. 2Aꞌnotohuachincora, niꞌnahuë. Ina nicato, noꞌtëquën ninshitaranquëmaꞌ. Quisocristo chachin Yosë nanamën anitotërinco.
3Iso quirica nontohuatamaꞌ, noya cancantaramaꞌ. Ina natanpatamantaꞌ, noya cancantaramaꞌ. Aꞌna tahuëri maꞌsona onpocasoꞌ shaꞌhuitaranquëmaꞌ. Natëhuatamaꞌ, Yosë noya niꞌsarinquëmaꞌ. Ayaroꞌ tahuëri nani yaꞌcaririarinpoa huachi.
Canchisë ninanoroꞌsaquë Yosë imapisopita ninshitërinsoꞌ
4Ca Coanshaco quirica aꞌpataranquëmaꞌ. Asia parti yaꞌhuëramasopita ninshitaranquëmaꞌ. Imaramaꞌ niꞌton, aꞌnaya aꞌnaya ninanoroꞌsaquë niyontonatomaꞌ, Yosë chinotëramaꞌ. Canchisë ninanoquë niyontonamasoꞌ aꞌnaya aꞌnayanquëmaꞌ yonquiatënquëmaꞌ, ninshitaranquëmaꞌ. Inaora nohuanton, Tata Yosë noya catahuainquëmaꞌ. Asanocancainquëmaꞌ. Iráca quëran huarëꞌ yaꞌhuërin. Ipora huantaꞌ nanpiarin. Inasoꞌ yaꞌhuërápon. Co onporontaꞌ chimianinhuëꞌ. Huaꞌanëntacasoꞌ shiranën notënanquë canchisë ispiritoroꞌsaꞌ yaꞌhuapi catahuainquëmaso marëꞌ. 5Quisocristontaꞌ inaora nohuanton, catahuainquëmaꞌ. Asanocancainquëmaꞌ. Iráca isoroꞌpaquë oꞌmarahuaton, noꞌtëquën aꞌchintërinpoaꞌ. Inaꞌton chiminaponahuëꞌ, nanpiantarin. Chimirin minsërahuaton, yaꞌipiya huaꞌanëntarin. Yaꞌipi huaꞌanoꞌsa quëran chini chiníquën nanantarin. Naporahuaton, naꞌcon nosororinpoaꞌ. Oshanënpoaꞌ inquitinpoaso marëꞌ huënainën aꞌparin. Chiminaton, nichaꞌërinpoa. 6Huëntonënquë chachin ayaꞌconatonpoaꞌ, huaꞌanëntërinpoaꞌ. Yosëíchin yonquicaso marëꞌ corto huaꞌanoꞌsaꞌ pochin acorinpoaꞌ. ¡Ma noyacha inaso paya! Yaꞌipi piyapiꞌsari chinochinaꞌ. Ipora quëran huarëꞌ inasáchin natëinaꞌ. Amen.
7Niꞌcochi. Quisocristo oꞌmantararin. Aꞌna tahuëri chitororë chachin oꞌmantararin. Naporoꞌ yaꞌipi piyapiꞌsari niꞌsapi. Iráca ohuanpisopitarintaꞌ niꞌsapi. Nisha nisha piyapiꞌsaꞌ sëtatonaꞌ, naꞌnërapi. “¿Onpoatëhuacha co natërëhuahuë paya?” tosapi. Tëhuënchachin naporapi. Amen.
8Yosë chachin shaꞌhuitërinpoaꞌ: “Caꞌton yaꞌhuërahuë. Coꞌhuara isoroꞌpaꞌ yaꞌhuëyátërasohuëꞌ, yaꞌhuárahuë. Aꞌna tahuërintaꞌ yaꞌipi maꞌsharoꞌsaꞌ taꞌhuantopirinahuëꞌ, casoꞌ yaꞌhuápo. Iráca quëran huarëꞌ yaꞌhuërahuë. Ipora huantaꞌ nanpiárahuë. Co onporontaꞌ taꞌhuantapohuëꞌ, yaꞌhuërápo. Chini chiníquën nanantërahuë,” tënin.
Quisocristo yaꞌnorinsoꞌ
9Ca Coanshaco ninshitaranquëmaꞌ. Canpitaroꞌco chachin imarahuë. Ina marëꞌ parisitopirëhuahuëꞌ, huaꞌanëntërinquë ayaꞌconinpoaꞌ. Quisocristo chachin catahuahuachinpoaꞌ, noya ahuantarëhuaꞌ. Yosë nanamën aꞌchinahuëso marëꞌ aparisitërinaco. Quisocristo imarahuë niꞌton, aꞌna soꞌtonꞌpaꞌ aꞌparinaco, Patomosë itopiquë. 10Iꞌhua Tomio tahuëri Yosë chinotasoco, Ispirito Santo nohuanton, huaꞌnarëso pochin quënanahuë. Co huëꞌëpirahuëꞌ, pinëhuë quëran chiníquën nontërinco, natanahuë. Tronpita pihuirinso pochin natanahuë. 11Nontatonco, shaꞌhuitërinco:
—Apira nani maꞌsha aꞌnotaranquën, quiricaquë ninshitëquëꞌ. Ina quëran canchisë ninanoroꞌsaquë aꞌpatëquëꞌ imarinacosopita nonchinaꞌ. Ipisoquë, Ismirinaquë, Pircamoquë, Tiatiraquë, Sartisiquë, Piratiripiaquë, Naotisiaquë inaquëpita yaꞌhuëpisopita aꞌpatëquëꞌ nitochinaꞌ, itërinco.
12“¿Intaꞌ nontarinco?” taꞌto, tahuërëtopirahuëꞌ, canchisë sëꞌparahuan nanparinoꞌsa pochin nininsopita quënanahuë, oro quëran nipisoꞌ. Inapamiáchin huanipi. 13Ina huancánachin quëmapi huaniarin, niꞌnahuë. Piyapi pochachin niponahuëꞌ, noya noya yaꞌnorin. Naporopi aꞌmosahuaton, oro pochin nininso quëran tëꞌtëtëntaquëchin nitonporin. 14Huiríchin aintërin. Huirihuaita pochin huiritërinsoꞌ. Naporahuaton, yaꞌpirin chachin pën nënërinso pochin yaꞌnorin. 15Nantëontaꞌ shaꞌpi huaꞌna pënquë aꞌpërëso pochin huënaráchin yaꞌnorin. Naporahuaton, chiníquën nonin. Panca soꞌpora tënëntërinso pochin natanahuë. 16Inchinan imirin quëran canchisë tayora pochin nininsoꞌ sëꞌquërin. Naporahuaton, nanamën quëran sahuëni pochin nininsoꞌ pipirarin. Cato quëran chachin toꞌnapinan. Yaꞌipi yaꞌpirinsoꞌ piꞌi pochin aꞌpinin. Huënaráchin huënaráchin yaꞌnorin.
17Ina niꞌsahuato, paꞌyanahuë. Chimipi pochin anotërahuë. Nantën pirayan anotopirahuëꞌ, inchinan quëran sëꞌhuarahuatonco, nontërinco.
—Ama tëꞌhuatocosohuëꞌ. Casoꞌ iráca quëran huarëꞌ yaꞌhuërahuë. Co onporontaꞌ taꞌhuantarahuëꞌ. 18Nanpiárahuë. Chiminaporahuëꞌ, nanpiantarahuë. Casoꞌ chini chiníquën nanantërahuë. Onporosona chiminacaisoꞌ cari shaꞌhuitarahuë. Ca nohuantohuato, nanpiapi. Ca nohuantohuato, chiminaponaꞌ. Co imarinacosopitahuëꞌ chiminpachinaꞌ, parisitopiquë aꞌpararahuë. 19Niꞌnansoꞌ ninshitëquëꞌ. Apira Yosë nohuanton, naquëranchin nani maꞌsha niantaran. Ipora naporapisoꞌ, aꞌna tahuëri maꞌsha onpocasontaꞌ, inapita aꞌnochinquën ninshitantaquëꞌ. 20Niꞌnansoꞌ co quëmaora nitotopiranhuëꞌ, aꞌchinchinquën nitotëquëꞌ. Canchisë sëꞌparahuan nanparinoꞌsasoꞌ noya aꞌpinin. Inapochachin canchisë ninanoroꞌsaquë imarinacosopita yaꞌhuapi. Niyontonatonaꞌ, chinotarinaco. Canchisë tayoraroꞌsaꞌ sëꞌquërahuëso pochin ansianoꞌsaꞌ aꞌpaiarahuë, itërinco.
Currently Selected:
Apocalipsis 1: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.