Filipenses 2
2
Quisocristo nonanacasoꞌ yaꞌhuërinsoꞌ
1Quisocristo achinicancaninquëmaꞌ. Naꞌcon nosororinquëmaꞌ niꞌton, noya cancantaramaꞌ. Ispirito Santo yaꞌcoancantohuachinquëmaꞌ, catahuarinquëmaꞌ. Catahuahuachinquëmaꞌ, noya ninosoroaramaꞌ. 2Napoaton yaꞌipinquëmaꞌ nóya niniꞌtomaꞌ, yaꞌhuëcoꞌ. Noya noya ninosorocoꞌ. Ama, iyaroꞌsaꞌ, nisha nisha yonquicosohuëꞌ. Napopináchin cancantocoꞌ. Ina pochin cancantohuatamaꞌ, noya noya cancantarahuë. 3Aꞌnaquën chiníquën nanan nohuantopi. Inasáchin yonquiatonaꞌ, aꞌnapita nocanpi. “Casoꞌ noya noyaco,” topi yonquinëna quëran. Canpitaso nipirinhuëꞌ ama ina pochin cancantocosohuëꞌ. Aꞌnapita noya noya niꞌcoꞌ. 4Ama canpitaora nohuantëramasoráchin yonquicosohuëꞌ. Aꞌnapita nohuantërinsontaꞌ yonquiatomaꞌ, catahuacoꞌ.
5Noya ninicatomaꞌ, Quisocristo pochachin cancantocoꞌ.
6Inasoꞌ, iráca quëran huarëꞌ Yosëꞌpaꞌ yaꞌhuërin. Yosë chachin niponahuëꞌ,
co inaora nipaꞌyatacasoꞌ yonquirinhuëꞌ. Nosoroatonpoaꞌ, yonquirinpoaꞌ. Inápaquë chini chiníquën nanantaponahuëꞌ, co ina naꞌcon naꞌcon nohuantërinhuëꞌ.
7Noya noya yaꞌhuërinsoꞌ huëshimarahuaton, isoroꞌpaquë oꞌmarin.
Piyapi chachin nasitimarin. Nani mashotohuachina, co huaꞌan pochin chiníquën nanantacasoꞌ nohuantërinhuëꞌ.
Topinan piyapi pochin cancantaton, aꞌnapita catahuacasoráchin yonquirin.
Canpoa pochachin ninin.
8Isoroꞌpaquë yaꞌhuëhuachina, Yosëíchin natërin.
Ina nohuanton, canpoa marëꞌ chiminin.
Yosë huiꞌnin niponahuëꞌ, corosëquë patanantohuachinara, chiminin.
9Yosëíchin natërin niꞌton, inari ananpitaantarahuaton, inápaquë quëpantarin.
Inaquë chini chiníquën nanan quëtërin. Yosë nohuanton, yaꞌipiya huaꞌanëntarin. “Sinioro” itarëhuaꞌ.
10Napoaton Quisocristo yonquiatonaꞌ,
yaꞌipi piyapiꞌsari isonahuatonaꞌ chinochinaꞌ.
Inápaquë yaꞌhuërinsopita, isoroꞌpaquë yaꞌhuërinsopita,
noꞌpaanaquë yaꞌhuëpisopita, inapitarintaꞌ chinochinaꞌ.
11“Quisocristosoꞌ Yosë huiꞌnin niꞌton, yaꞌipiya huaꞌanëntarin,” tëcaponaꞌ.
Ina quëran Tata Yosë naꞌcon naꞌcon yonquiarëhua huachi.
Tashiꞌ aꞌpininso pochin ninëhuasoꞌ
12Iráca canpitataquë yaꞌhuapo, noya natanamaco. Noya natanatomaco, Yosë natëramaꞌ. Iporantaꞌ iyaroꞌsaꞌ nosororanquëmaꞌ niꞌton, co inatohuaꞌ yaꞌhuaporahuëꞌ, noya noya natëcoꞌ. Yaꞌnan imapomaꞌ, Yosë anoyacancantërinquëmaꞌ. Napoaton noya cancantatomaꞌ, imamiatocoꞌ. “Catahuaco Sinioro noya imainquën. Co caora nanitërahuëꞌ,” taꞌtomaꞌ imamiatocoꞌ. Niꞌcona Yosë naniantotamaꞌ. 13Co noyahuëꞌ cancantatomaꞌ, co canpitaora nanitëramahuëꞌ Yosë natëcamasoꞌ. Nipirinhuëꞌ, Yosë nontohuatamaꞌ, catahuarinquëmaꞌ nohuantacasoꞌ. Ina quëran Yosë yanatëhuatamaꞌ, inari chachin catahuarinquëmaꞌ noꞌtëquën natëcamasoꞌ. Inasoꞌ noya noya ayonquiarinquëmaꞌ.
14Noya ninicatomaꞌ iyaroꞌsaꞌ yaꞌhuëcoꞌ. Ama ninoꞌhuicosohuëꞌ. Maꞌsona tërantaꞌ nipatamaꞌ, noya cancantatomaꞌ, nicoꞌ. 15Noyasáchin nicoꞌ aꞌnapita nicatënquëmaꞌ, Yosë yonquiꞌinaꞌ. Ina huiꞌninpita pochin nicatomaꞌ, noyápiachin cancantocoꞌ. Co imapisopitasohuëꞌ nipirinhuëꞌ co Yosë nohuitatonahuëꞌ, co noyahuëꞌ cancantopi. Ninoꞌhuipi, monshihuanacaisoráchin yonquipi, nonpinápi. Co noyahuëꞌ yonquiatonaꞌ, tashi pochin cancantopi. Canpitaso nipirinhuëꞌ, tayoraroꞌsaꞌ tashiꞌ aꞌpintërinso pochin piyapiꞌsaꞌ catahuacoꞌ noꞌtëquën yonquicaiso marëꞌ. 16Quisocristo nanamën chachin aꞌchintocoꞌ. Ina imapatëhuaꞌ, Yosë nohuitatëhuaꞌ, nanpimiatarihuaꞌ. Ina quëran Quisocristo oꞌmantahuachin, co atapanaramacohuëꞌ. “Parisitaporahuëꞌ, co topinan quëran Yosë nanamën aꞌchintërahuëꞌ, noya imamiatopi,” taꞌto, nóya cancantarahuë huachi. 17Iráca maꞌsha Yosë marëꞌ tëpahuachinaꞌ, huinontaꞌ opotopi. Inapochachin cantaꞌ canpita noya noya imacamaso marëꞌ tëpahuachinacontaꞌ, noya nisarin, co sëtarahuëꞌ. Aꞌchintëranquëmaꞌ niꞌton, noya imaramaꞌ. Napoaton noya cancantërahuë. 18Tëpahuachinaco, ama sëtocosohuëꞌ. Ca pochachin noya cancantocoꞌ.
Timotio, Ipapirotito inapita yaaꞌparinsoꞌ
19Huaꞌquiꞌ iyaroꞌsaꞌ canpitata quëran co nanan natantërahuëꞌ niꞌton, yonquiáranquëmaꞌ. Napoaton Timotio yaaꞌparahuë natantacaso marëꞌ. Quisocristo nohuantohuachin, co huaꞌqui quëranhuëꞌ aꞌpaarahuë. Ina quëran shaꞌhuitintahuachinco, noya cancantarahuë. 20Inasoꞌ naꞌcon nosororinquëmaꞌ. Cancanën quëran huarëꞌ yacatahuarinquëmaꞌ. Ca pochachin nosororinquëmaꞌ. Inasáchin ina pochin cancantërin. 21Aꞌnapitasoꞌ inahuara nohuantopisoráchin yonquipi. Co Quisocristo naꞌcon yonquipihuëꞌ. 22Timotioso nipirinhuëꞌ nohuitëramaꞌ. “Inasoꞌ noya quëmapi,” topi yaꞌipi piyapiꞌsaꞌ. Huiꞌnahuë pochin niꞌton, catahuarinco Yosë nanamën aꞌchinaꞌhuaso marëꞌ. Inantaꞌ nitotëramaꞌ. 23Maꞌsona coisë onpotaponco nimara, co casoꞌ nitotërahuëꞌ. Nitotohuato, Timotio aꞌparahuë shaꞌhuitinquëmaso marëꞌ. 24Yosë nohuanton, tashinan pëi quëran ocoiarinaco, topirahuëꞌ. Ocoihuachinco, cantaꞌ nicaponquëmaꞌ paꞌsarahuë. Co huaꞌqui quëranhuëꞌ paꞌsarahuë, tënahuë.
25Iporaso nipirinhuëꞌ Iya Ipapirotito aꞌpatantaranquëmaꞌ. Iꞌhua chachin aꞌpatiramaco catahuaincoso marëꞌ. Canquihuachina, nóya catahuarinco. Achinicancaninco. Naporahuaton, inantaꞌ Quisocristo nanamën aꞌchinin. Ina marëꞌ parisitaponahuëꞌ, noya ahuantërin. Iporaso nipirinhuëꞌ canpitataquë panantaꞌin, tënahuë. 26Iꞌhuamiáchin chiníquën caniorin, natantëramaꞌ. Nani noyatahuaton, yaꞌhuërinꞌpaꞌ yapanantarin. Yaniꞌninquëmaꞌ. “Caniorahuësoꞌ natantatonaꞌ, paꞌyamaraiꞌ,” taꞌton, manorarin. Napoaton “Noyahuaꞌ. Panantaquëꞌ nipachin,” itërahuë. 27Tëhuënchachin chiníquën caniorin. Piꞌpishachin shichiminin. Nipirinhuëꞌ, Yosëri nosoroaton, anoyatërin. Cantaꞌ nosoroatonco, iyahuë anoyatërinco. Ama aquëtëꞌ sëtacaꞌhuaso marëhuëꞌ Yosë nohuanton, co chimininhuëꞌ. 28Napoaton manoton aꞌparahuë. Ina quënanpatamaꞌ, nóya cancantarama huachi. Noya cancantohuatamaꞌ, cantaꞌ noya cancantarahuë. Co huachi aquëtëꞌ sëtarahuëꞌ. 29-30Canconpachin, noya cancantatomaꞌ, nontocoꞌ. “Ma noyacha Sinioro catahuarinquën niꞌton, noya huënantaran paya,” itatomaꞌ, noya nontocoꞌ. Co canpitasoꞌ nanitëramahuëꞌ isëquë huëcacamasoꞌ. Napoaton ina aꞌpatiramaco. Isëquë huëcaton, shichiminin. Chiníquën parisitërin catahuaincoso marëꞌ. Ina pochin cancantopisopita nóya niꞌcoꞌ.
Currently Selected:
Filipenses 2: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.