Lucas 2
2
Quisoso nasitërinsoꞌ
(Mateo 1.18-25)
1Naporoꞌ tahuëriꞌsaꞌ Noma copirno nanan aꞌparin, Aocosto itopisoꞌ. Yaꞌipi parti aꞌparin. “Yaꞌipinquëmaꞌ pacoꞌ. Quiricaquë nininëmaꞌ niacotocoꞌ,” tënin. 2Naporo huarëꞌ yaꞌipi piyapiꞌsaꞌ pichirapi. Siriniosoꞌ Siria parti huaꞌanëntohuachina, naporin. 3Natanahuatonaꞌ, yaꞌipi piyapiꞌsaꞌ paꞌpi nininënaꞌ niacotacaiso marëꞌ. Huaꞌhuatopisoꞌ ninanonënaquë paꞌpi. Nisha nisha paꞌpi.
4Cosisoꞌ Cariria parti yaꞌhuërin. Nasaritoquë yaꞌhuëpirinhuëꞌ, ina quëran pipirahuaton, Cotia parti paꞌnin. Inaquë canconahuaton, Pirinꞌpaꞌ paꞌnin. Iráca Tata masho Tapi inaquë huaꞌhuatërin. Ina shiin niꞌton, inaquë paꞌnin nininën niacotacaso marëꞌ. 5Mariarë chachin paꞌnin. Nani ina macacaso marëꞌ nontaponahuëꞌ, Yosë nohuanton, inaora cayorin. 6Nani naniarin huaicasoꞌ niꞌton, inatohuaꞌ niꞌsoꞌ, huairin. 7Paninan huairin, quëmapiaꞌhuaya. Nëꞌmëtërinquë soꞌquëëtahuaton, nonaꞌhuayaquë acorin, ohuaca coshatërinquë. Huëꞌëcaisoꞌ pëiꞌ nani yaꞌsotopi niꞌton, co inaquë huëꞌëpatërinhuëꞌ. Napoaton nonaꞌhuayaquë huaꞌhuin acorin.
Ohuica pëꞌtahuanaꞌpiroꞌsaꞌ quënanpisoꞌ
8Naporoꞌ tashiꞌ ohuica pëꞌtahuanaꞌpiroꞌsaꞌ pastoquë yaꞌhuërapi. Pirin yaꞌcariya yaꞌhuërapi. Tashirë chachin ohuicanënapita aꞌpairapi. 9Inaquë niꞌsoiꞌ, aꞌnanaya Sinioro anquëninëni yaꞌnotimarin. Huënaráchin huënaráchin aꞌpintimarin. Yosë pochin aꞌpinin. Anquëni quënanahuatonaꞌ, quëmapiꞌsaꞌ paꞌyanpi. 10Anquënirisoꞌ itapon: “¡Ama paꞌyancosohuëꞌ! Noya nanan shaꞌhuichinquëmaꞌ yaꞌipi piyapiꞌsaꞌ noya cancantacaiso marëꞌ. 11Ipora tashiꞌ aꞌnara quëmapiaꞌhuaya Pirinquë nasitërin. Inasoꞌ Cristo, Yosëri aꞌpaimarinsoꞌ. Sinioro niꞌton, chinotacasoꞌ yaꞌhuërin. Nani oꞌmarin piyapiꞌsaꞌ cancanënaꞌ anoyatacaso marëꞌ. 12Inaquë paꞌpatamaꞌ, huaꞌhuishin quënanconaramaꞌ. Nëꞌmëtërinquë soꞌquëëtahuatonaꞌ, ohuaca coshatërinquë acopi. Ina quëran nohuitaramaꞌ,” itërin.
13Ina quëran aꞌnaroáchin naꞌa anquëniroꞌsari yaꞌnotantapi. Yosë chinotatonaꞌ, itaponaꞌ:
14“¡Ma noyacha Yosëso paya! Inápaquë yaꞌhuaponahuëꞌ, piyapinquëmaꞌ yonquirinquëmaꞌ.
Cancantatoma ina yanatëramasopitasoꞌ sano cancantaramaꞌ,” itopi anquëniroꞌsari.
15Nani inápaquë panantahuachinara, pëꞌtahuatonaꞌpiroꞌsaꞌ ninontopi.
—Pirinꞌpaꞌ paꞌahuaꞌ nipachin. Sinioro anitotërinpoasoꞌ niaꞌahuaꞌ, nitopi.
16Manorahuatonaꞌ, paꞌpi. Canconahuatonaꞌ, huaꞌhuasha, Maria, Cosi, inapita quënanconpi. Huaꞌhuasha ohuaca coshatërinquë quëhuëánin. 17Nani niꞌsahuatonaꞌ, naꞌa piyapiꞌsaꞌ shaꞌhuitëraꞌpiapi. “Quëmapiaꞌhuaya nani nasitërin. Inasoꞌ Cristo, Yosëri aꞌpaimarinsoꞌ. Anquëni shaꞌhuitiimarincoi,” itëraꞌpiapi. 18Natanahuatonaꞌ, “Maꞌpítacha itërinpoaꞌ paya,” topi yaꞌipi piyapi. 19Mariaso nipirinhuëꞌ naporinsoꞌ naꞌcon yonquirárin. 20Ina quëran pëꞌtahuatonaꞌpiroꞌsaꞌ paantapi. “Maꞌpítacha natanëhua paya. Maꞌpítacha niꞌnëhua paya. Anquëniroꞌsaꞌ itërinpoaso chachin quënanëhuaꞌ. ¡Ma noyacha Tata Yosëso paya!” topi.
Yosë chinotopiso pëiquë quëpapisoꞌ
21Huaꞌhuasha posa tahuëritohuachina, marca acotopi. Naporoꞌ nininën acotopi huachi. Quisoso itopi. Coꞌhuara Maria huaꞌhuayantërasohuëꞌ, anquëniri shaꞌhuitërin ina nininën acocasoꞌ niꞌton, napotopi.
22Moisësë iráca pënëntërin: “Sanapi huaihuachin, aꞌna yoqui pochin ninaꞌin. Ina quëran Yosë chinotopiso pëiquë yaꞌcoantaꞌin,” tënin. Cotioroꞌsaꞌ napopiso chachin aꞌna yoqui pochin nanihuachina, Maria, Cosi inapitaso Quirosarinꞌpaꞌ paantapi pënëntërinsoꞌ natëcaso marëꞌ. Naporoꞌ huaꞌhuin Yosë chinotopiso pëiquë quëpapi inaquë Yosë nontacaiso marëꞌ. “Iso huaꞌhuasha, Sinioro, noya aꞌpaiquëꞌ quëma piyapinën niin,” itopi. 23“Paninansoꞌ quëmapi nipachin, Yosë piyapinën ninin,” tënin Moisësë iráca pënëntaton. Napoaton ina pochin nontërin. 24Naporoꞌ catoꞌ nëpëhuë nipon, catoꞌ pëꞌtahua nëpëaꞌhuahuë nipon atëpatopi Yosë chinotacaiso marëꞌ. Inantaꞌ Moisësë pënëntërin niꞌton, inapopi.
25Quirosarinquë chachin aꞌna quëmapi yaꞌhuërin, Simion itopisoꞌ. Nóya quëmapi inasoꞌ. Nani tahuëri Yosë chinotërin. “Aꞌna tahuëri Yosë nichaꞌësarinpoaꞌ,” taꞌton, Cristo aꞌpaimacasoꞌ ninarárin. Ispirito Santori noyá yaꞌcoancantërin. 26Ina nohuanton, Simion nani ninorin. “Siniorori aꞌpaimarinsoꞌ nohuitapo. Coꞌhuara chimiyantërapohuëꞌ, Cristo oꞌmararin, niꞌsarahuë,” tënin yonquiaton. 27Naporoꞌ tahuëri Ispirito Santo nohuanton, Yosë chinotopiso pëiquë paꞌnin antaꞌ. Cosintaꞌ saꞌinë chachin inaquë nisapi. Pënëntopisoꞌ natëtonaꞌ, inaquë Quisosoaꞌhuaya quëpapi niꞌton, Simioni quënanconin. 28Huaꞌhuasha quënanahuaton, Simion nóya cancantërin. Iporahuaton, Yosë nontërin.
29“¡Ma noyanquëncha quëmasoꞌ, Sinioro, niꞌton, aꞌpaimaransoꞌ nani anohuitëranco paya!
Napoaton noya ipora casoꞌ chimiin, tënahuë. Shaꞌhuitërancoso chachin nanirin huachi.
30Iso huaꞌhuasha nani niꞌnahuë. Nichaꞌëincoiso marëꞌ aꞌpaimaran.
31Yaꞌipi piyapiꞌsaꞌ yonquiaton, aꞌpaimaran.
32Nisha nisha nananquë nonpisopita aꞌpintarin noꞌtëquën yonquicaiso marëꞌ.
Israiroꞌsantaꞌ catahuaarin. Piyapinënpita niꞌton, noya noya acorarin,” itërin.
33Ina natanahuaton, “¡Maꞌpítacha naporin paya!” tënin Cosi. Mariantaꞌ inachachin yonquirin.
34—Yosë noya aꞌpainquëmaꞌ, itërin Simioni. Ina quëran aꞌshin itantapon:
—Huaꞌhuan mashotohuachin, yaꞌipi israiroꞌsaꞌ pënënarin. Natanahuatonaꞌ, aꞌnaquën natëtonaꞌ, noya cancantapi. Aꞌnaquënso nipirinhuëꞌ co nohuantapihuëꞌ niꞌton, anotërëso pochin nisapi. Yosë nohuitacaiso marëꞌ noꞌtëquën pënëntapirinhuëꞌ, chiníquën noꞌhuiapi. 35Inahuara cancanëna quëran nisha nisha yonquiapirinahuëꞌ, inari aꞌninquëchin anitotarin. Huaꞌhuan noꞌhuihuachinaꞌ, quëmasoꞌ chiníquën sëtaran. Sahuëniquë ohuaninënposo pochin sëto yaꞌcoancantarinquën huachi, itërin.
36Aꞌna sanapintaꞌ inaquë yaꞌhuërin, Ana itopisoꞌ. Inasoꞌ Panino huiꞌnin, Asirë huëntonquë yaꞌhuërinsoꞌ. Yosë nohuanton, nitoninorin. Nani paiya. Nanon nipon, aꞌna quëmapiri manin. Canchisë piꞌipiachin niquëpasoiꞌ, 37soꞌini ayananpirin niꞌton, nani huaꞌquiꞌ quëyoronin. Nani posa shonca catapini piꞌipitërin. Yosë chinotopiso pëiquë yaꞌhuëmiatërin. Tahuërirë chachin, tashirë chachin Yosë chinotërin. Apira apira Yosë yonquirin. Co cosharoꞌ yonquiatonhuëꞌ, Yosë nontárin. 38Naporoꞌ inantaꞌ huëcaton, Quisosoaꞌhuaya niꞌnin. Noya cancantaton, Yosë nontërin.
—Iso huaꞌhuasha nasitërinso marëꞌ: “Yosparinquën Sinioro,” itëranquën, tënin. Ina quëran Yosë imapisopita shaꞌhuitërin.
—Yosë nohuanton, aꞌpaimarinsoꞌ nani nasitërin. Inasoꞌ nichaꞌësarinpoaꞌ, itërin. Naꞌa Quirosarinquë yaꞌhuëpisopita ina ninarapi niꞌton, napotërin.
Nasaritoquë pantapisoꞌ
39Yaꞌipi iráca pënëntërinsoꞌ nani natëhuachinara, Cosiso saꞌinë chachin Cariria parti paantarin. Nasaritoquë yaꞌhuantarin. 40Quisoso soꞌsorahuaton, chinirarin. Nóya yonquirin. Yosëri naꞌcon catahuarin.
Huiꞌnapitahuaton, Yosë chinotopiso pëiquë paꞌninsoꞌ
41Nani Pascoa tahuëri aꞌshin, paꞌpin, inapita Quirosarinquë pantapi. 42Quisoso shonca catoꞌ piꞌipitohuachina, naquëranchin pantapi cotio niyontonpiso tahuëri naꞌhuëcaiso marëꞌ. 43Nani naꞌhuëhuachinara, yaꞌhuëpiꞌpaꞌ paꞌmantapirinahuëꞌ, Quisososoꞌ co paꞌmarinhuëꞌ. Huiꞌnapi niponahuëꞌ, inaquë inaora quëparitërin. Aꞌshinsoꞌ co nitotërinhuëꞌ. Cosintaꞌ co nitotërinhuëꞌ. 44Naꞌa piyapiꞌsaꞌ paꞌsapi niꞌton, “Nisha huëꞌsarin,” taꞌtonaꞌ, aꞌna tahuëriraꞌ iratopirinahuëꞌ. Iꞌhuanahuanquë Quisoso yonisápirinahuëꞌ, co quënanpihuëꞌ. Quëmopinënpita, nohuitopisopita, inapita natanpirinahuëꞌ, 45co quënanpachinarahuëꞌ, yonicaiso marëꞌ inatohua chachin paantapi.
46Cara tahuëri quëran Yosë chinotopiso pëiquë quënanpi huachi. Maistroꞌsaꞌ aꞌchinpiquë huënsërahuaton, aꞌchinpisoꞌ natanarin. Natanahuaton, natantaantarin antaꞌ. 47Naꞌa piyapiꞌsaꞌ natanpi. “Ma noyacha yonquirin paya. Nóya aꞌpanitërin,” topi. 48Inaquë quënanahuatonaꞌ, aꞌshinsoꞌ paꞌyanin.
—¿Onpoatontaꞌ huaꞌhua napotërancoi? Niꞌquëꞌ. Paꞌyanatoi, cara tahuëri yonisápirainquënhuëꞌ, ipora huarëꞌ quënanainquën huachi, itërin.
49—¿Onpoatontaꞌ yonisápiramacohuëꞌ? Tatahuë pëinënquë yaꞌhuëcaꞌhuasoꞌ ¿co nitotëramahuëꞌ ti? itërin.
50Natanaponahuëꞌ, maꞌsona tapon naporinsoꞌ co nitotopihuëꞌ.
51Ina quëran pipihuachina, aꞌshin, paꞌpin inapitarëꞌ Nasaritoquë paantarin. Inaquë paaton, aꞌshin, paꞌpin, inapita noya natërin huachi. Naporinsoꞌ aꞌshini cancanën quëran yonquirárin. 52Naporahuaton, Quisoso huiꞌnapitarin huachi. Noya noya yonquirin. Yosëri noya niꞌnin. Piyapiꞌsarintaꞌ noya niꞌpi.
Currently Selected:
Lucas 2: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.